ଭୁବନେଶ୍ୱର(ଓଡ଼ିଶା ରିପୋର୍ଟର): କରୋନାମୁକ୍ତ ହେଲା ରାଜଧାନୀ ଭୁବନେଶ୍ୱର ଓ ଜଗତସିଂହପୁର ଜିଲ୍ଲା। ଏଠାରେ ଆଉ କରୋନାର ଗୋଟିଏ ହେଲେ ଆକ୍ଟିଭ୍ କେସ୍ ନଥିବା ସୂଚନା ଦେଇଛି ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ।
୩ ଆକ୍ରାନ୍ତଙ୍କ ଡିସ୍ଚାର୍ଜ ପରେ ଭୁବନେଶ୍ୱର ଏହି ମହାମାରୀରୁ ମୁକ୍ତି ପାଇଥିବା ବେଳେ ଜଗତସିଂହପୁର ଜିଲ୍ଲାରେ ବି ଆକ୍ରାନ୍ତ ହୋଇଥିବା ୫ ଜଣ ଯାକ ସୁସ୍ଥ ହୋଇ ଘରକୁ ଫେରିଛନ୍ତି।
ଉଲ୍ଲେଖଯୋଗ୍ୟ, ରାଜ୍ୟରେ ଆଉ ୫୭ କରୋନା ଆକ୍ରାନ୍ତ ସୁସ୍ଥ ହୋଇଥିବା ବେଳେ ସେମାନଙ୍କ ମଧ୍ୟରେ ଗଂଜାମର ସର୍ବାଧିକ ୪୦ ଜଣ ଅଛନ୍ତି। ସେହିପରି ଜଗତସିଂହପୁର ଜିଲ୍ଲାର ସମସ୍ତ ୫ ଆକ୍ରାନ୍ତ , ମୟୂରଭଞ୍ଜର ୪ ଓ ଭୁବନେଶ୍ୱରର ୩ ସୁସ୍ଥ ହୋଇ ଘରକୁ ଫେରିଛନ୍ତି। ସେମାନଙ୍କ ବ୍ୟତୀତ ବଲାଙ୍ଗିରର ୨ ଜଣ, ସୁନ୍ଦରଗଡ଼, ବାଲେଶ୍ୱର ଓ କେନ୍ଦ୍ରାପଡ଼ାର ଜଣେ ଲେଖାଏ ସୁସ୍ଥ ହୋଇଛନ୍ତି।
Bhubaneswar and Jagatsinghpur district now have no active cases of Covid-19.
The total recovered cases of Odisha now stand at 277.
— H & FW Dept Odisha (@HFWOdisha) May 18, 2020
ଜଗତସିଂହପୁରର ସମସ୍ତ ୫ ଆକ୍ରାନ୍ତ ସୁସ୍ଥ ହୋଇଥିବା ବେଳେ ସେମାନଙ୍କ ମଧ୍ୟରେ ଜଣେ ୭୦ ବର୍ଷୀୟ ବ୍ୟକ୍ତି ରହିଛନ୍ତି। ଏନେଇ ଖୋଦ୍ ଜିଲ୍ଲାପାଳ ଗଣମାଧ୍ୟମକୁ ସୂଚନା ଦେଇଛନ୍ତି ।
ଜିଲ୍ଲାପାଳଙ୍କ ସୂଚନା ମୁତାବକ, ଜଗତସିଂହପୁରରୁ ଚିହ୍ନଟ ୫ ଆକ୍ରାନ୍ତଙ୍କ ମଧ୍ୟରୁ ୪ ଜଣ ସୁରତରୁ ଫେରିଥିବା ବେଳେ ବୃଦ୍ଧଜଣକ କୋଲକତାରୁ ଫେରିଥିଲେ। କୋରନା ଚିହ୍ନଟ ପରେ ସେମାନଙ୍କୁ କିମ୍ସ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ସୁସ୍ଥ ହୋଇ ସମସ୍ତେ ଘରକୁ ଫେରିବା ପରେ ଜିଲ୍ଲାବାସୀ ବେଶ୍ ଖୁସି ଥିବା ଜଣାଯାଇଛି।