ଝାରସୁଗୁଡ଼ାକୁ ରାଜ୍ୟର ଦ୍ୱିତୀୟ ବିମାନ ବନ୍ଦର ମାନ୍ୟତା

ଝାରସୁଗୁଡ଼ା,(ଭାଗିରଥୀ ସାହୁ): ଝାରସୁଗୁଡ଼ାକୁ ମିଳିଲା ରାଜ୍ୟର ଦ୍ୱିତୀୟ ବିମାନ ବନ୍ଦର ମାନ୍ୟତା। ରାଜ୍ୟର ଦ୍ୱିତୀୟ ବିମାନ ବନ୍ଦର ଭାବେ ଝାରସୁଗୁଡ଼ାକୁ ଡିଜିସିଏ ସ୍ୱୀକୃତି ଦେଇଥିବା ନେଇ କେନ୍ଦ୍ର ବେସାମରିକ ବିମାନ ଚଳାଚଳ ଯୁଗ୍ମ ସଚିବ ଉଷା ପାଢ଼ୀ ଟ୍ୱିଟ୍‌ କରି ସୂଚନା ଦେଇଛନ୍ତି। ଏଥିସହିତ ଖୁବ୍‌ଶୀଘ୍ର ରାଉରକେଲା, ଜୟପୁର ଓ ଉତ୍କେଲାକୁ ବିମାନ ବନ୍ଦର ମାନ୍ୟତା ମିଳିବ।

ଏନେଇ ଝାରସୁଗୁଡ଼ା ଏୟାରପୋର୍ଟ ନିର୍ଦ୍ଦେଶକ ଲୋକନାଥ ପାଢ଼ୀ କହିଛନ୍ତି,“ ଦୁଇଟି ଏୟାରକ୍ରାଫ୍ଟ ପାଇଁ ଲାଇସେନ୍ସ ମିଳିଛି। ଏହି ଲାଇସେନ୍ସ ଫଳରେ ଏଠାରୁ ଅତିଶୀଘ୍ର ଉଡ଼ାଣ ଆରମ୍ଭ ହେବାର ସମ୍ଭାବନା ରହିଛି। ଆସନ୍ତା ୧୦ରେ ସଚିବ ସ୍ତରରେ ଏକ ବୈଠକ ଅନୁଷ୍ଠିତ ହେବ। ଏହାପରେ ଜଣାପଡ଼ିବ କେବେ ଉଡ଼ାଣ ହେବ।”

ସୂଚନାଯୋଗ୍ୟ, ଗତ ଏପ୍ରିଲ ୩ ତାରିଖରେ କୋଲକତା ଓ ଦିଲ୍ଲୀର ଡିଜିସିଏର ୧୦ ଜଣିଆ ଏକ୍ସପୋର୍ଟ ଟେକନିକାଲ ଟିମ୍‌ ଝାରସୁଗୁଡ଼ା ଆସି ଉଡ଼ାଜାହାଜ ପଡ଼ିଆକୁ ଯାଞ୍ଚ କରିଥିଲେ।