କିଟ୍‌ର ଗୁଣ୍ଡାଗର୍ଦ୍ଦି : ବେଆଇନ୍ କୋଠା ନିର୍ମାଣ ବେଳେ ସୁଟିଂ କରିବାରୁ ଓଟିଭି ପ୍ରତିନିଧିଙ୍କୁ ଆକ୍ରମଣ, ଦେଖନ୍ତୁ ଭିଡିଓ

ଭୁବନେଶ୍ୱର, (ଓଡ଼ିଶା ରିପୋର୍ଟର): କିଟ୍‌ର ଗୁଣ୍ଡାଗର୍ଦ୍ଦି। ସବୁ ସୀମା ସରହଦ ଲଂଘିଗଲେ କିଟ୍ କର୍ତ୍ତୃପକ୍ଷ। ଖବର ସଂଗ୍ରହ କରୁଥିବା ଓଟିଭି ପ୍ରତିନିଧିଙ୍କୁ କଲେ ଆକ୍ରମଣ।  କିଟ୍ ଜମି କେଳେଙ୍କାରୀ ଖବର ପ୍ରସାରଣ କରିବାରୁ  ପ୍ରତିଶୋଧ ପରାୟଣ ହେଲେ କିଟ୍‌ କର୍ତ୍ତୃପକ୍ଷ। କ୍ୟାମେରାମ୍ୟାନ୍‌ଙ୍କୁ କିଟ୍ ଗୁଣ୍ଡାଙ୍କର ଧକ୍କା ପେଲା ସାଙ୍ଗକୁ କ୍ୟାମେରା ଛଡ଼ାଇ ନେବା ଅଭିଯୋଗ ଘଟଣା ସମୟରେ ପୋଲିସ ମଧ୍ୟ ସେଠାରେ ଉପସ୍ଥିତ ଥିଲେ।  କିଛି ଦିନ ତଳେ କିଟ୍‌ ଜମି କେଳେଙ୍କାରୀ ସମ୍ପର୍କରେ ଓଟିଭିରେ ଖବର ପ୍ରସାରଣ ପରେ କିଟ୍ କର୍ତ୍ତୃପକ୍ଷ କିଭଳି ପ୍ରତିହିଂସା ପରାୟଣ ହୋଇ ପଡିଛନ୍ତି ତାହା ଆଜିର ଘଟଣାରୁ ସ୍ପଷ୍ଟ ହୋଇଛି ।

ସୂଚନା ଅନୁସାରେ, କିଟ୍ କ୍ୟାମ୍ପସକୁ ଲାଗି ରାସ୍ତା କଡରେ ପଟିଆ ନୂଆବନ୍ତ ଗାଁରେ ଚନ୍ଦ୍ରଧ୍ୱଜ ସାହୁଙ୍କ ଜମି ଉପରେ ଜୋର ଜବରଦସ୍ତ କିଟ୍ ୯ ମହଲା କୋଠା ନିର୍ମାଣ କରୁଛନ୍ତି। ଏହାକୁ ଚନ୍ଦ୍ରଧ୍ୱଜ ବାରମ୍ବାର ବିରୋଧ କରୁଥିଲେ ବି ତାଙ୍କୁ ସବୁବେଳେ କିଟ୍ ନାଲି ଆଖି ଦେଖାଇ ଆସୁଛନ୍ତି। ଚନ୍ଦ୍ରଧ୍ୱଜଙ୍କ ନାଁରେ ଜମିର ଅସଲ କାଗଜପତ୍ର ରହିଛି ଓ ସେ ନିୟମିତ ଭାବେ ଜମିର ଖଜଣା ମଧ୍ୟ ପୈଠ କରୁଛନ୍ତି । କିଟ୍‌ ଜବରଦଖଲ ବିରୁଦ୍ଧରେ ହାଇକୋର୍ଟର ଦ୍ୱାରସ୍ଥ ହୋଇଥିଲେ ଚନ୍ଦ୍ରଧ୍ୱଜ ।

୨୦୦୮ ମସିହାରେ ଉଚ୍ଚ ନ୍ୟାୟାଳୟ ଚନ୍ଦ୍ରଧ୍ୱଜଙ୍କୁ ବେଦଖଲ ନକରିବା ପାଇଁ ରାୟ ଦେଇଥିଲେ।  ହାଇକେର୍ଟଙ୍କ ନିର୍ଦ୍ଦେଶ ଅନୁସାରେ ମାପଚୁପ ପରେ ଚନ୍ଦ୍ରଧ୍ୱଜ ଫେରିପାଇଥିଲେ ୧ ଏକର ୭୦ ଡେସିମିଲ ଜମି । ହେଲେ ପରେ ହାଇକୋର୍ଟଙ୍କ ରାୟକୁ ବେଖାତିର କରିଥିଲେ କିଟ୍ କର୍ତ୍ତୃପକ୍ଷ । ଜୋରଜବରଦସ୍ତ ସେ ଜମିକୁ ଜବରଦଖଲ କରି ତିଆରି କରି ଚାଲିଛନ୍ତି କୋଠା ଉପରେ କୋଠା। ଆଜି ପୁନର୍ବାର ଗୁଣ୍ଡା ଲଗାଇ କିଟ୍ କାମ ଆରମ୍ଭ କରିଥିବାରୁ ଚନ୍ଦ୍ରଧ୍ୱଜ ସେଠାରେ ପହଞ୍ଚି ବିରୋଧ କରିଥିଲେ। ତେବେ ପ୍ରତିବାଦ କରିବାରୁ ଚନ୍ଦ୍ରଧ୍ୱଜଙ୍କୁ କିଟ୍‌ କର୍ତ୍ତୃପକ୍ଷ ଗୁଣ୍ଡା ଲଗାଇ ମରଣାନ୍ତକ ଆକ୍ରମଣ କରିଛନ୍ତି।

ସେହିପରି ଖବର ସଂଗ୍ରହ କରିବାକୁ ଯାଇଥିବା ମିଡିଆ ପ୍ରତିନିଧିଙ୍କୁ ବି ଆକ୍ରମଣ  କରାଯାଇଛି। ଖବର ସଂଗ୍ରହ କରୁଥିବା ବେଳେ କ୍ୟମେରା ମ୍ୟାନ୍‌ଙ୍କ କ୍ୟାମେରା ଛଡ଼ାଇ ନିଆଯାଇଛି।   ଉଭୟଙ୍କ ମଧ୍ୟରେ ବଚସା ସାଙ୍ଗକୁ ଉତ୍ତେଜନା ଦେଖା ଦେଇଥିଲା।  ସେଠାରେ ପ୍ରଥମେ ପୋଲିସ ଓ ପରେ ଗଣମାଧ୍ୟମ ପ୍ରତିନିଧି ପହଞ୍ଚିଥିଲେ । ତେବେ ଖବର ସଂଗ୍ରହ ବେଳେ ଓଟିଭି ପ୍ରତିନିଧିଙ୍କୁ ମଧ୍ୟ ଆକ୍ରମଣ ହୋଇଛି।