ବ୍ରହ୍ମପୁର (ଓଡ଼ିଶା ରିପୋର୍ଟର): ରାଜ୍ୟରେ ଯେଉଁ ସ୍କୁଲ ଗୁଡ଼ିକରେ ୧୦ରୁ କମ୍ ଉପସ୍ଥାନ ରହିଥିବ ବନ୍ଦ ହେବ। ଏନେଇ ରାଜ୍ୟ ସରକାର ନିଷ୍ପତ୍ତି ପରେ ଗଞ୍ଜାମ ଜିଲ୍ଲା ଆସିକା ବ୍ଲକ୍ରେ ଦୁଇଟି ସ୍କୁଲ ବନ୍ଦ ହୋଇଯାଇଛି। ସେଥିରୁ ଗୋଟିଏ ହେଉଛି କିଶୋରଚନ୍ଦ୍ରପଲ୍ଲୀ ପ୍ରାଥମିକ ସ୍କୁଲ। ଏହି ସ୍କୁଲ ବନ୍ଦ ହେବା ପରେ ୮ଜଣ ପିଲାଙ୍କୁ ୧ କିଲୋମିଟର ଦୂର ଭାଲିଆପଲ୍ଲୀ ସ୍କୁଲକୁ ସ୍ଥାନାନ୍ତର କରାଯାଇଛି। ତେବେ ଏତେ ରାସ୍ତା ଅତିକ୍ରମ କରି ଛାତ୍ରଛାତ୍ରୀମାନେ ଯିବାକୁ ସୁରକ୍ଷିତ ମଣୁ ନାହାନ୍ତି। ଯାହାକୁ ନେଇ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି।
କିଶୋରଚନ୍ଦ୍ରପଲ୍ଲୀ ପ୍ରାଥମିକ ସ୍କୁଲ ବନ୍ଦ ହେବା ପରେ ଗଛଲତାରେ ଭର୍ତ୍ତି ହୋଇ ଜଙ୍ଗଲ ଭଳି ଦିଶୁଛି ସ୍କୁଲ ପ୍ରାଙ୍ଗଣ। ସ୍କୁଲ୍ ପରିସର ଭୂତକୋଠୀରେ ପରିଣତ ହୋଇଯାଇଛି। ସବୁ ଶ୍ରେଣୀଗୃହରେ ତାଲା ଝୁଲୁଛି। ଉକ୍ତ ସ୍କୁଲରେ ପଢ଼ୁଥିବା ୮ଜଣ ପିଲାଙ୍କୁ ପ୍ରାୟ ୧ କିଲୋମିଟର ଦୂର ଭାଲିଆପଲ୍ଲୀ ସ୍କୁଲକୁ ଯିବା ପାଇଁ କୁହାଯାଇଛି।
ଭାଲିଆପଲ୍ଲୀ ଭାରପ୍ରାପ୍ତ ପ୍ରଧାନଶିକ୍ଷକ ଧୋବା ବେହେରା କହିଛନ୍ତି-“କିଶୋରଚନ୍ଦ୍ରପଲ୍ଲୀ ପ୍ରାଥମିକ ସ୍କୁଲରୁ ଆସିଥିବା ଛାତ୍ରଛାତ୍ରୀଙ୍କୁ ସବୁ ପ୍ରକାର ସୁବିଧା ଯୋଗାଇ ଦିଆଯିବ। ସରକାରଙ୍କ ସମସ୍ତ ନିୟମ ପାଳନ କରାଯାଉଛି।”