କୋରାପୁଟ ମେଡିକାଲ କଲେଜରେ ଆସନ୍ତାକାଲିଠୁ ପାଠପଢ଼ା, ଉଦ୍‌ଘାଟନ କରିବେ ମୁଖ୍ୟମନ୍ତ୍ରୀ

ଜୟପୁର: ଆସନ୍ତାକାଲିଠାରୁ କୋରାପୁଟ ସ୍ଥିତ ସହିଦ ଲକ୍ଷ୍ଣଣନାୟକ ମେଡିକାଲ କଲେଜରେ ପାଠପଢ଼ା ଆରମ୍ଭ ହେବା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଉଦ୍‌ଘାଟନ କରିବେ। ଏଥିପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି।

ଏହି ନୂଆ ମେଡିକାଲ୍ କଲେଜରେ ପ୍ରଥମ ବର୍ଷ ପାଠପଢ଼ା ପାଇଁ ଅଗଷ୍ଟ ୩୧ରେ ନାମଲେଖା ପ୍ରକ୍ରିୟା ଶେଷ ହୋଇଛି। ନୂଆ ମେଡିକାଲ କଲେଜରେ ନାମ ଲେଖାଇଥିବାରୁ ଛାତ୍ରଛାତ୍ରୀଙ୍କ ସହିତ ସେମାନଙ୍କ ଅଭିଭାବକମାନେ ମଧ୍ୟ ବେଶ୍ ଉତ୍ସାହିତ ଅଛନ୍ତି।  ବହୁ ଦୂରଦୂରାନ୍ତୁ ଆସି ଛାତ୍ରଛାତ୍ରୀମାନେ ଏହି କଲେଜରେ ନାମ ଲେଖାଇଛନ୍ତି ଓ ନିଜର କ୍ୟାରିୟର ଗଢ଼ିବାକୁ ଯାଉଛନ୍ତି। ସେଥିପାଇଁ ସେମାନେ ନର୍ଭସ ମଧ୍ୟ ଅଛନ୍ତି।

ଏହି ମେଡିକାଲ କଲେଜରେ ନାମ ଲେଖାଇଥିବା ସୌରମ୍ୟ କୁମାର ଦାସ କହିଛନ୍ତି,“ସହିଦ ଲକ୍ଷ୍ଣଣନାୟକ ମେଡିକାଲ କଲେଜରେ ପଢ଼ିବାକୁ  ସୁଯୋଗ ମିଳିଥିବାରୁ ବହୁତ  ଖୁସି ଲାଗୁଛି।  ମା’ବାପାଙ୍କ ସ୍ୱପ୍ନ ସଫଳ ହୋଇଥିବାରୁ ଆହୁରି ଅଧିକ ଖୁସି ଲାଗୁଛି।”

ନୂଆକରି ଆରମ୍ଭ ହେବାକୁ ଯାଉଥିବା ଏହି ମେଡିକାଲ କଲେଜରେ ୧୦୦ଟି ସିଟ୍ ରହିଛି। କ୍ଲାସ ରୁମଠାରୁ ଆରମ୍ଭ କରି ପ୍ରାକ୍ଟିକାଲ ରୁମ୍, ହଷ୍ଟେଲ୍ ଏବଂ ଅଫିସ ରୁମ୍ ସବୁ କିଛି ଶେଷ ହୋଇ ସାରିଛି।

ଏସ୍‌ଏଲ୍‌ଏନ୍‌ ମେଡିକାଲ୍‌ କଲେଜର ଡିନ୍‌ ପ୍ରଫେସର ବିଜୟୀନୀ ମହାପାତ୍ର କହିଛନ୍ତି,’“ଛାତ୍ରଛାତ୍ରମାନେ  ନୂଆ ମେଡିକାଲ କଲେଜରେ ପାଠ ପଢ଼ିବା ନେଇ ଖୁସି ଅଛନ୍ତି। ଯେଉଁମାନେ ମେଡିକାଲ କଲେଜ ଦେଖୁଛନ୍ତି ସେମାନେ ବି ଖୁସି ହେଉଛନ୍ତି। ଏହି ଅଞ୍ଚଳରେ ମେଡିକାଲ କଲେଜର ବହୁତ ଆବଶ୍ୟକତା ଥିଲା। ଏବେ ଏହା ଆରମ୍ଭ ହେବାକୁ ଯାଉଛି। ସେଥିପାଇଁ ଆମେ ବି ବହୁତ ଖୁସି ଅଛୁ।”