ଅନ୍ତର୍ଜାତୀୟ ଫ୍ୟାସନ ପ୍ରତିଯୋଗିତାରେ କ୍ରିସିତା ଚାମ୍ପିଅନ୍‌

ବାଲେଶ୍ୱର(ରଶ୍ମୀରଞ୍ଜନ ଦାସ): ବିଶ୍ୱସ୍ତରୀୟ ମଡେଲିଂ ପ୍ରତିଯୋଗିତାରେ ଓଡ଼ିଆ ଝିଅ କ୍ରିସିତା ମହାପାତ୍ର କମାଲ ଦେଖାଇଛନ୍ତି। କେରଳରେ ଅନୁଷ୍ଠିତ ଇଣ୍ଟରନ୍ୟାସନାଲ ଚିଲଡ୍ରେନ୍ସ ଆର୍ଟ ଟ୍ୟାଲେଣ୍ଟ ଆଣ୍ଡ ଫ୍ୟାସନ ପ୍ରତିଯୋଗିତାରେ ସେ ଚାମ୍ପିଅନ୍‌ ହୋଇଛନ୍ତି। ୧୨ ବର୍ଷ ବୟସରେ ଏହି ସଫଳତା ପାଇଛନ୍ତି କ୍ରିସିତା।

ନିକଟରେ କେରଳର କାଲିକଟଠାରେ ଅନୁଷ୍ଠିତ ହୋଇଥିବା ଜୁନିୟର ମଡେଲ ଇଣ୍ଟିରନ୍ୟାସନାଲ-୨୦୧୮ ପ୍ରତିଯୋଗିତାରେ ଓଡ଼ିଶାରୁ ୪ଜଣ ଝିଅ ଭାଗ ନେଇଥିଲେ। ଯେଉଁଥିରେ ବାଲେଶ୍ୱର ସୁନ୍ଦରୀ କ୍ରିସିତା ଥିଲେ। ପ୍ରତିଯୋଗିତାର ପ୍ରତ୍ୟେକ ରାଉଣ୍ଡରେ ତାଙ୍କର ନୂଆନୂଆ ରୂପ ସମସ୍ତଙ୍କୁ ଚକିତ କରିଥିବା ବେଳେ, ଶେଷରେ ସେ ଚାମ୍ପିଅନ ମୁକୁଟ ପିନ୍ଧିଥିଲେ।

ଗତ ଦୁଇ ବର୍ଷ ଧରି କ୍ରିସିତା ଏହି ପ୍ରତିଯୋଗିତାରେ ଅଂଶ ଗ୍ରହଣ କରୁଥିଲେ। ଏଥିପାଇଁ ୟୁଟ୍ୟୁବ୍‌ ଓ ଇଣ୍ଟରନେଟରୁ ଡ୍ୟାନ୍ସ ଓ ଫ୍ୟାସନ ମଡେଲିଂ ଶିଖୁଥିଲେ। ଆଉ ତାଙ୍କର କ୍ରମାଗତ ନିଷ୍ଠା ଏବଂ ପରାକାଷ୍ଠା ତାଙ୍କୁ ସଫଳତାର ଶୀର୍ଷରେ ପହଞ୍ଚାଇଛି।

 କ୍ରିସିତା ବାଲେଶ୍ୱର ସେଣ୍ଟ ଭିନସେଣ୍ଟ ସ୍କୁଲର ଷଷ୍ଠ ଶ୍ରେଣୀର ଛାତ୍ରୀ।  ପ୍ରିନର୍ସରୀ ପଢିବା ଦିନଠୁ ହିଁ ତାଙ୍କର ମଡ଼େଲିଂ ପ୍ରତି ଆଗ୍ରହ ବଢିଥିଲା। ପରେ ଅନେକ ଫ୍ୟାସନ ଶୋ’, ମଡ଼େଲିଂ, ଡ୍ୟାନ୍ସ ଓ ସଂଗୀତ କାର୍ଯ୍ୟକ୍ରମରେ ଭାଗ ନେଇ  ସେ ସଫଳତା ପାଇଥିଲେ।

କ୍ରିସିତା ଏବେ ଓ୍ୱାର୍ଲଡ ଜୁନିୟର ମଡେଲ ଇଣ୍ଟରନ୍ୟାସନାଲ ପ୍ରତିଯୋଗିତା ପାଇଁ ମନୋନୀତ ହୋଇଛନ୍ତି। ଏହାସହ ଫିଲିପାଇନ୍ସଠାରେ ହେବାକୁ ଥିବା ଓ୍ୱାର୍ଲଡ ଟୁରିଜିମ୍ ଫେଷ୍ଟିଭାଲ୍ ପାଇଁ ମଧ୍ୟ ମନୋନୀତ ହୋଇଛନ୍ତି। ଏଥିରେ ପ୍ରତିନିଧିତ୍ୱ କରି ସେ ଭାରତ ପାଇଁ ସୁନାମ ଆଣିବେ ବୋଲି ତାଙ୍କ ବାପା ମାଆ ଆଶା ରଖିଛନ୍ତି। କମ୍ ବୟସରୁ କ୍ରିସିତାଙ୍କ ଏଭଳି ସଫଳତାକୁ ନେଇ ପରିବାର ଲୋକେ ବେଶ୍ ଖୁସି ଅଛନ୍ତି। ଫ୍ୟାସନ ଓ ମଡ଼େଲିଂରେ ରୁଚି ରଖୁଥିବା କ୍ରିସିତା ଆଗାମୀ ଦିନରେ ମିସି ଓ୍ୱାର୍ଲଡ ହେବା ପାଇଁ ଲକ୍ଷ୍ୟ ରଖିଛନ୍ତି।