କାନ୍ଥ ତଳେ ଚାପି ହୋଇ ଶ୍ରମିକଙ୍କ ମୃତ୍ୟୁ

କଟକ(ଓଡ଼ିଶା ରିପୋର୍ଟର): ଡ୍ରେନ୍‌ କାମ କରୁଥିବା ପକ୍କା କାନ୍ଥ ଭୁଶୁଡ଼ି ପଡିଲା। ଫଳରେ କାନ୍ଥ ତଳେ ଚାପି ହୋଇ ଶ୍ରମିକଙ୍କ ମୃତ୍ୟୁ ଘଟିଛି। ଆଜି ଅପରାହ୍ନରେ ଏପରି ଅଘଟଣ କଟକ ଶଙ୍କରପୁର ଡ଼ିହସାହିରେ ଘଟିଛି।

ଗତ ତିନି ଦିନ ହେଲା ଶଙ୍କରପୁର ଡ଼ିହସାହିରେ କଟକ ମହାନଗର ନିଗମ(ସିଏମ୍‌ସି) ପକ୍ଷରୁ ଡ୍ରେନ୍‌ କାମ ଚାଲିଥିଲା। ଆଜି ୩ ଜଣ ଶ୍ରମିକ ଡ୍ରେନ୍‌ କାମରେ ନିୟୋଜିତ ହୋଇଥିଲେ। ସେମାନଙ୍କ ଭିତରୁ ଜଣେ ଶ୍ରମିକ କାମ କରୁଥିବା ବେଳେ ହଠାତ୍‌ ଡ୍ରେନ୍‌ ପାଖରେ ଥିବା ଏକ ପକ୍କା ଘରର କାନ୍ଥ ଭୁଶୁଡ଼ି ପଡ଼ିଥିଲା। ଫଳରେ ଶ୍ରମିକ ଜଣକ କାନ୍ଥ ଭିତରେ ଚାପି ଯାଇଥିଲେ।

ସ୍ଥାନୀୟ ଲୋକମାନେ ତାଙ୍କୁ ସଙ୍ଗେ ସଙ୍ଗେ ଗୁରୁତର ଅବସ୍ଥାରେ ଉଦ୍ଧାର କରି କଟକ ବଡ଼ ମେଡିକାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଠିକାଦାରଙ୍କ ଅବହେଳା ଯୋଗୁ ଏହି ଅଘଟଣ ଘଟିଥିଲା ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।