ଜଳେଶ୍ୱର (ଅଜିତ ଦାସ): ଭୁଜାଲି ଦେଖାଇ ଅଧ୍ୟାପିକାଙ୍କ ବେକରୁ ସୁନାଚେନ ଲୁଟି ନେଲେ ଦୁଇ ଦୁର୍ବୃତ୍ତ। ଏହା ପରେ ସ୍ଥାନୀୟ ଲୋକେ ଦୁଇ ଦୁର୍ବୃତ୍ତଙ୍କୁ କାବୁ କରି ନିସ୍ତୁକ ପିଟିଲେ। ଆଜି ଏଭଳି ଘଟଣା ବାଲେଶ୍ଵର ଜିଲ୍ଲା ବାଲିଆପାଳ ଥାନା ଅନ୍ତର୍ଗତ ରେମୁ ଛକରେ ଘଟିଛି। ପୁଲିସ ଘଟଣାସ୍ଥଳରେ ପହଞ୍ଚି ଦୁଇ ଲୁଟେରାଙ୍କୁ ଉଦ୍ଧାର କରିଛି।
ନବରା ମହିଳା ମହାବିଦ୍ୟାଳୟର ଅଧ୍ୟାପିକ ସାଧନା ଦାସ ଅଧିକାରୀ ସ୍କୁଟିରେ ଘରକୁ ଯାଉଥିଲେ। ଏହି ସମୟରେ ଦୁଇ ଜଣ ଯୁବକ ଏକ ବାଇକ୍ରେ ତାଙ୍କୁ ପିଛା କରିଥିଲେ। ରେମୁ ଛକରେ ତାଙ୍କ ସ୍କୁଟିକୁ ଧକ୍କା ମାରିଥିଲେ। ତା’ପରେ ଅଧ୍ୟାପିକାଙ୍କୁ ଭୁଜାଲି ଦେଖାଇ ତାଙ୍କ ଚେନ୍ ଝାମ୍ପି ନେଇଥିଲେ। ତେବେ ଅଧ୍ୟାପିକା ଶ୍ରୀମତୀ ଦାସଅଧିକାରୀ ଚିତ୍କାର କରିବାରୁ ସ୍ଥାନୀୟ ଲୋକେ ଦୌଡ଼ି ଆସି ଲୁଟେରା ଦୁଇ ଯୁବକଙ୍କୁ ଧରି ପକାଇଥିଲେ। ତା’ପରେ ସେମାନଙ୍କୁ ବାନ୍ଧି ପକାଇ ନିର୍ଧୁମ ଛେଚିଥିଲେ।
ଖବର ପାଇ ବାଲିଆପାଳ ଥାନା ପୁଲିସ ଘଟଣା ସ୍ଥଳରେ ପହଞ୍ଚି ୨ ଲୁଟେରାଙ୍କୁ ଉଦ୍ଧାର କରି ତଦନ୍ତ ଆରମ୍ଭ କରିଛି। ଦୁଇ ଅଭିଯୁକ୍ତ ହେଉଛନ୍ତି ବାଲେଶ୍ଵର ହଳଦୀପଦା ଅଞ୍ଚଳର ରଞ୍ଜନ ପରିଡା ଓ ରବି ନାଏକ। ଜାତୀୟ ରାଜପଥ ଲୁଟ୍ ଘଟଣାରେ ଏମାନଙ୍କ ସମ୍ପୃକ୍ତି ରହିଛି। ଏମାନଙ୍କ ନାଁରେ ବିଭିନ୍ନ ଥାନାରେ ଅଭିଯୋଗ ରହିଛି।