ଭୁବନେଶ୍ୱର(ଓଡ଼ିଶା ରିପୋର୍ଟର): ବିମାନରେ ଏ ସହରରୁ ସେ ସହରକୁ ଉଡ଼ି ବୁଲୁଥିଲେ। ହୋଟେଲରେ ରହି ପ୍ରସ୍ତୁତ କରୁଥିଲେ ଲୁଟ୍ର ବ୍ଲୁ ପ୍ରିଣ୍ଟ। ସବୁବେଳେ ଏଟିଏମ୍ ରହୁଥିଲା ସେମାନଙ୍କ ଟାର୍ଗେଟରେ । ଏଟିଏମ୍ରୁ ଲୁଟି ଖୁବ୍ ଶୀଘ୍ର ଫୁର କିନା ଉଡ଼ି ପଳାଇବାକୁ ଗେମ୍ ପ୍ଲାନ୍ ବି ଆଗରୁ ପ୍ରସ୍ତୁତ ହୋଇ ରହୁଥିଲା।
ଭୁବନେଶ୍ୱର ପଟିଆ ପିଏନ୍ବି ଏଟିଏମ୍ ଲୁଟ୍ ପଛରେ ରହିଛି ଏପରି ଏକ ଆନ୍ତଃରାଜ୍ୟ ଗ୍ୟାଙ୍ଗ । ଦୁଇ ଅଭିଯୁକ୍ତ ଧରାପଡ଼ିବା ପରେ ମାମଲା ଉପରୁ ହଟିଛି ପରଦା । ଆଜି ସାମ୍ବାଦିକ ସମ୍ମିଳନୀରେ ଲୁଟ୍ ନେଇ ସବିଶେଷ ତଥ୍ୟ ରଖିଛନ୍ତି ପୁଲିସ୍ କମିଶନ୍ର ସୁଧାଂଶୁ ଷଡ଼ଙ୍ଗୀ ।
କମିଶନ୍ରଙ୍କ ତରଫରୁ ମିଳିଥିବା ସୂଚନା ଅନୁଯାୟୀ, ବେଙ୍ଗାଲୁରୁରୁ ଭୁବନେଶ୍ୱର ଭାୟା ଦିଲ୍ଲୀରେ ହେଉଥିଲା ଲୁଟ୍ର ପୁରା ପ୍ଲାନିଂ । ଗତ ମାସ ୧୦ ତାରିଖରେ ପଟିଆରେ ଥିବା ପିଏନ୍ବି ଏଟିଏମ୍ରେ ପଶି ଗ୍ୟାସ୍ କଟର୍ ଦେଇ ଲୁଟ୍ କରିଥିଲେ ଦୁଇ ଲୁଟେରା । ନିକଟରେ ଥିବା ସିସିଟିଭିରେ କଏଦ ହୋଇଥିଲା ଦୁଇ ଅଭିଯୁକ୍ତଙ୍କ କଳା କାରନାମା। ପରେ ସେମାନଙ୍କ ଚେହେରା ଏବଂ ବ୍ୟବହାର କରିଥିବା ବାଇକ୍ର ସୁରାକ୍ ଖୋଜି ପୁଲିସ୍ ସେମାନଙ୍କ ସମ୍ପର୍କରେ ଜାଣିବାକୁ ପାଇଥିଲା ।
ଭୁବେଶ୍ୱରରେ ଲୁଟ୍ କରିବା ପୂର୍ବରୁ ଏହି ଲୁଟେରାଦ୍ୱୟ ଏକ ହୋଟେଲ୍ରେ ରହି ଲୁଟ୍ ଯୋଜନା ପ୍ରସ୍ତୁତ କରିଥିଲେ । ଗ୍ୟାସ୍ କଟର ଓ ବାଇକ୍ ଭଡ଼ାରେ ଆଣି ଏଟିଏମ୍ରୁ ଲୁଟି ନେଇଥିଲେ ଟଙ୍କା । ପରେ ଭୁବନେଶ୍ୱରରୁ ବିମାନରେ ଦିଲ୍ଲୀ ଯାଇଥିଲେ । ସେଠୁ ଚଣ୍ଡିଗଡ଼, ବେଙ୍ଗାଲୁରୁ ଏବଂ ବିଶାଖାପାଟଣାକୁ ଯାଇଥିଲେ ।
ତେବେ ବିଶାଖାପାଟଣାରେ ଏକ ଲୁଟ୍ ହୋଇଥିବା ବେଳେ ଷ୍ଟାଇଲ ପୂରା ସମାନ ଥିଲା। ଏହି ଘଟଣା ନଜରକୁ ଆସିବା ପରେ କମିଶନରେଟ୍ ପୁଲିସ୍ ଆନ୍ଧ୍ର ପୁଲିସ୍ ସହ ଯୋଗାଯୋଗ କରିଥିଲା । ଦୁଇ ଅଭିଯୁକ୍ତଙ୍କୁ ରିମାଣ୍ଡରେ ଆଣି ମାମଲାର ଅଧିକ ଖୋଳଲତାଡ଼ କରିବାକୁ ଯୋଜନା ରଖିଛି କମିଶନରେଟ୍ ପୁଲିସ୍। ଅଭିଯୁକ୍ତ ଦୁଇ ଜଣ ହେଉଛନ୍ତି ପଞ୍ଜାବର ସମରଜିତ୍ ସିଂହ ଓ କେରଳର ଜାଫର ସାଦ୍ଦିକ୍ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
