ପ୍ରତାରକ ସାମ୍ୱାଦିକ! ଫେସ୍‌ବୁକରେ ପ୍ରେମ, ପରେ ପ୍ରତାରଣା କରି ଲୁଟ୍‌

ଝାରସୁଗୁଡ଼ା (ଭାଗିରଥୀ ସାହୁ): ପ୍ରତାରକ ୱେବ ସାମ୍ୱାଦିକ! ଫ୍ରେସ୍‌ବୁକ୍‌ରେ ପ୍ରେମ ନିବେଦନ କଲେ। ପରେ ବିବାହର ପ୍ରତିଶ୍ରୁତି ଦେଇ ନିଜ ପ୍ରମ ଜାଲରେ ଫସାଇଲେ ଯୁବତୀଙ୍କୁ। ତା’ପରେ ତାଙ୍କ ଆକାଉଣ୍ଟରୁ ଲୁଟି ଥିଲେ। ଏପରି ଅଭିଯୋଗ ଝାରସୁଗୁଡ଼ା ଜିଲ୍ଲାରୁ ଆସିଛି। ଏବେ ପୁଲିସ ଜାଲରେ ପଡ଼ିଛି ପ୍ରତାରକ ସାମ୍ୱାଦିବ। ପୁଲିସ ତାଙ୍କର ଓ ତାଙ୍କ ପ୍ରଥମ ପତ୍ନୀଙ୍କ ଆକାଉଣ୍ଟକୁ ଫ୍ରିଜ୍‌ କରି ତଦନ୍ତ ଚଳାଇଛି। ମିଳିଥିବା ସୂଚନା ଅନୁସାରେ ସେ ଏକାଧିକଙ୍କ ଯୁବତୀଙ୍କୁ ନିଜ ପ୍ରେମ ଜାଲରେ ଫସାଇ ଏପରି ଲୁଟ୍‌ କରିଥିବା ଅଭିଯୋଗ ହେଉଛି।

ରାଉରକେଲା ଅଞ୍ଚଳର ଦୀପକ ଦେହୁରୀ। ତାଙ୍କର ଗୋଟିଏ ୱେବ ଚ୍ୟାନେଲ୍‌ ରହିଛି। ସେ ସୋଶାଲ୍‌ ମିଡ଼ିଆ ଫେସ୍‌ବୁକ୍‌ରେ ବଡ଼ମାଲ୍‌ ଅଞ୍ଚଳର ଜଣେ ଯୁବତୀଙ୍କୁ ପ୍ରେମ ନିବେଦନ କରିଥିଲେ। ପରବର୍ତ୍ତୀ ସମୟରେ ଉଭୟ ପରସ୍ପରକୁ ଭଲ ପାଇଥିଲେ। ଏପରିକି ବିବାହ କରିବେ ବୋଲି ପ୍ରତିଶ୍ରୁତି ଦେଇଥିଲେ। ପ୍ରେମିକଙ୍କଠାରୁ ଏମିତି ପ୍ରତିଶ୍ରୁତି ପାଇବା ପରେ ଯୁବତୀ ଜଣକ ନିଜ ଘର ଛାଡ଼ି ପଳାଇ ଆସିଥିଲେ।

ପ୍ରେମିକ ଦୀପକ ଓ ସେ ଏକାଠି ବିଭିନ୍ନ ସ୍ଥାନରେ ବୁଲି ଥିଲେ। ଏହି ସମୟରେ ଯୁବତୀଙ୍କ ଆକାଉଣ୍ଟରୁ ଦୀପକ ଅଢ଼େଇ ଲକ୍ଷ ଟଙ୍କା ନିଜ ପତ୍ନୀଙ୍କ ଆକାଉଣ୍ଟକୁ ଟ୍ରାନ୍ସଫର କରିଥିଲେ। ପରବର୍ତ୍ତୀ ସମୟରେ ଯୁବତୀ ଜଣକ ଜାଣିବାକୁ ପାଇଲେ ଦୀପକ ବିବାହିତ ଓ ତାଙ୍କର ସ୍ତ୍ରୀ ଅଛି। ଏପରିକି ସେ ଏକାଧିକ ଯୁବତୀଙ୍କୁ ନିଜ ପ୍ରେମ ଜାଲରେ ଫସାଇଥିବା ଜାଣିବାକୁ ପାଇଲେ ଯୁବତୀ।

ଦୀପକଙ୍କ ସମ୍ପର୍କରେ ଏପରି ସାଙ୍ଘାତିକ ତଥ୍ୟ ପାଇବା ପରେ ଯୁବତୀ ଜଣକ ଖସିବା ପାଇଁ ସୁଯୋଗ ଖୋଜିଥିଲେ। ଆଉ ସମୟ ସୁବିଧା ଦେଖି ଯୁବତୀ ଜଣକ ଦୀପକଙ୍କ ଜାଲରୁ ଖସିବାରେ ସଫଳ ହୋଇଥିଲେ। ପରେ ସେ ଏନେଇ ନିଜ ମାଆଙ୍କୁ ପୂରା ଘଟଣା ସମ୍ପର୍କରେ କହିଥିଲେ। ଝିଅଠାରୁ ସବୁ କଥା ଶୁଣିବା ପରେ ତାଙ୍କ ମାଆ (ଯୁବତୀଙ୍କ ମାଆ) ଏନେଇ ବଡ଼ମାଲ୍‌ ଥାନାରେ ଲିଖିତ ଅଭିଯୋଗ କରିଥିଲେ।

ଅଭିଯୋଗକୁ ଭିତ୍ତିକରି ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ସେପଟେ ଥାନାରେ ଅଭିଯୋଗ ହୋଇଥିବା ଜାଣିବାକୁ ପାଇଁ ଚମ୍ପଟ ମାରିଥିଲା। ଆଇଆଇସି ଅମିତାଭ ପଣ୍ଡାଙ୍କ ନେତୃତ୍ୱରେ ଗଠିତ ଟିମ୍‌ ଅଭିଯୁକ୍ତକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ କରିଥିଲା। ମାତ୍ର ଧରିବାରେ ସଫଳ ହୋଇନଥିଲା।

ଆଜି ଅଭିଯୁକ୍ତ ଦୀପକ ସୁନ୍ଦରଗଡ଼ ଜିଲ୍ଲାର ଦର୍ଲିପାଲିଠାରେ ଥିବା ଜାଣିବାକୁ ପାଇଥିଲା ପୁଲିସ। ପରେ ତାକୁ ଗିରଫ କରିବାରେ ସଫଳ ହୋଇଛି ପୁଲିସ। ତା’ ପାଖରୁ ଏକ ପୋର୍ଟାଲର ସାମ୍ବାଦିକ ପରିଚୟପତ୍ର, ବିଭିନ୍ନ ସନ୍ଦିଗ୍ଧ କାଗଜପତ୍ର ଜବତ କରାଯାଇଥିବା ଝାରସୁଗୁଡ଼ା ଏସ୍‌ଡିପିଓ ନିର୍ମଳ ମହାପାତ୍ର ଗଣମାଧ୍ୟମକୁ ସୂଚନା ଦେଇଛନ୍ତି।

ଏସ୍‌ଡିପଓ ଆହୁରି କହିଛନ୍ତି-“ଦୀପକ ନିଜର ୱେବ ଚ୍ୟାନେଲ୍‌ରେ ବିଭ୍ରାନ୍ତିକର ଖବର ପରିବେଷଣ କରନ୍ତି। ଏହାକୁ ତଦନ୍ତ ପରିସରଭୁକ୍ତ କରାଯାଇଛି। ଏହାଛଡ଼ା ଦୀପକ ଓ ତାଙ୍କ ପ୍ରଥମ ପତ୍ନୀଙ୍କ ଆକାଉଣ୍ଟକୁ ଫ୍ରିଜ୍‌ କରାଯାଇଛି। ମାତ୍ର ବର୍ତ୍ତମାନ ସେହି ଆକାଉଣ୍ଟରେ ଟଙ୍କା ନଥିବା ଜଣାପଡ଼ିଛି।”

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।