ସ୍ୱାମୀ-ସ୍ତ୍ରୀ ଝଗଡ଼ାରେ ବଳି ପଡ଼ିଲା ଛଅ ବର୍ଷର ଝିଅ

ବରଗଡ଼(ଦୀପକ ଶର୍ମା): ବରଗଡ଼ ଜିଲ୍ଲାରେ ସ୍ୱାମୀ-ସ୍ତ୍ରୀ ଝଗଡ଼ାର କରୁଣ ପରିଣତି ଦେଖିବାକୁ ମିଳିଛି। ସେମାନଙ୍କ କଳିରେ ଛଅ ବର୍ଷର ଝିଅ ବଳି ପଡ଼ିଥିବା ବେଳେ ସେମାନେ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି।

ଏ ଘଟଣା ଘଟିଛି ବରଗଡ଼ ଜିଲ୍ଲା ଅତାବିରା ଥାନା ଅନ୍ତର୍ଗତ କୁକେତିରା ଗାଁରେ। ମୃତ ଶିଶୁ କନ୍ୟାର ନାଁ ଲିଜା ସାହୁ। ଆହତମାନେ ହେଲେ ତାଙ୍କ ବାପା କୈଳାସ ସାହୁ (୩୫) ଓ ମା’ କସ୍ତୁରୀ ସାହୁ(୨୭)।

କୈଳାସଙ୍କ ନିଜ ଘର ଟିଟିଲାଗଡ଼ରେ। ସେ ୪ ମାସ ହେଲା ସ୍ତ୍ରୀ ଓ ଝିଅକୁ ନେଇ କୁକେତିରାରେ ଏକ ଭଡ଼ା ଘରେ ରହୁଥିଲେ।

ଗତ ମଙ୍ଗଳବାର ରାତିରେ କୈଳାସ ଓ କସ୍ତୁରୀଙ୍କ ମଧ୍ୟରେ କୌଣସି କଥାକୁ ନେଇ ଝଗଡ଼ା ହୋଇଥିଲା। ଏହି ସମୟରେ କୈଳାସ ଉତକ୍ଷିପ୍ତ ହୋଇ ଝିଅ ଓ ସ୍ତ୍ରୀଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ତା’ପରେ ସେ ନିଜ ଦେହରେ ମଧ୍ୟ ପେଟ୍ରୋଲ୍‌ ଢାଳି ନିଆଁ ଲଗାଇ ଦେଇଥିଲେ ବୋଲି କୁହାଯାଉଛି।

ଗାଁ ଲୋକେ ଘଟଣାସ୍ଥଳରେ ପହଞ୍ଚି ଦମକଳବାହିନୀ ଓ ପୁଲିସକୁ ଖବର ଦେଇଥିଲେ। ଦମକଳ ବାହିନୀ ସ୍ୱାମୀସ୍ତ୍ରୀଙ୍କୁ ଗୁରୁତର ଭାବେ ଉଦ୍ଧାର କରି ବୁର୍ଲା ବଡ଼ ମେଡିକାଲରେ ଭର୍ତ୍ତି କରିଥିଲେ। ଝିଅଟି ଘଟଣାସ୍ଥଳରେ ହିଁ ପ୍ରାଣ ହରାଇଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।