ଗୁରୁ ଗର୍ଜନ ଓ ବିବାଦ ଭିତରେ ଆରମ୍ଭ ହେଲା ମାଟ୍ରିକ ଖାତା ଦେଖା

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଗୁରୁ ଗର୍ଜନ ଓ ବିବାଦ ଭିତରେ ଆଜିଠୁ ଆରମ୍ଭ ହୋଇଛି ମାଟ୍ରିକ୍ ଖାତାଦେଖା। ମୂଲ୍ୟାୟନ ବର୍ଜନ ଡାକରା ଦେଇଥିବା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚ ରାଜ୍ୟର ପ୍ରାୟ ସମସ୍ତ ମୂଲ୍ୟାୟନ କେନ୍ଦ୍ର ସମ୍ମୁଖରେ ଧାରଣା ଓ ବିକ୍ଷୋଭ କରିଛି। ତେବେ ବୋର୍ଡ କର୍ତ୍ତୃପକ୍ଷ କହିଛନ୍ତି କେବଳ ଟିଟିଲାଗଡ଼ ଓ ନିମାପଡ଼ାକୁ ଛାଡ଼ିଦେଲେ ବାକି ସବୁ ସେଣ୍ଟରରେ ମୂଲ୍ୟାୟନ ପ୍ରକ୍ରିୟା ସୁରୁଖୁରୁରେ ଆରମ୍ଭ ହୋଇଛି।</p><p>ମାଟ୍ରିକ୍ ଖାତା ମୂଲ୍ୟାୟନ କେନ୍ଦ୍ରରେ ଅଭାବନୀୟ ଦୃଶ୍ୟ। କେଉଁଠି ଖାତା ଦେଖିବାକୁ ଚାହୁଁଥିବା ରେଗୁଲାଲ ଶିକ୍ଷକ ଓ ଆନ୍ଦୋଳନରତ ଶିକ୍ଷକଙ୍କ ଭିତରେ ମୁହାଁମୁହିଁ ସ୍ଥିତି ତ କେଉଁଠି ଖାତା ଦେଖି ଯାଅନା କହି କାକୁତି ମିନତି। ପୁଣି କେଉଁଠି ନାରାବାଜି, ହୋହଲ୍ଲା, ପୋଲିସ୍ ଆକ୍ସନ। ଭୁବନେଶ୍ୱର କ୍ୟାପିଟାଲ୍ ହାଇଇସ୍କୁଲ କେନ୍ଦ୍ର ପାଖରେ ଆନ୍ଦୋଳନକାରୀ ଶିକ୍ଷକଙ୍କୁ ହଟାଇବା ପାଇଁ ପୋଲିସ୍&zwnj;କୁ ଲାଠି ଚାଳନା କରିବାକୁ ପଡ଼ିଛି। କେନ୍ଦୁଝର ପୋଲିସ୍ ହାଇସ୍କୁଲ କେନ୍ଦ୍ରର ମେନ୍ ଗେଟ୍&zwnj;ରେ ଆନ୍ଦୋଳନ ଯୋଗୁଁ ଶିକ୍ଷକଙ୍କୁ ପଛଗେଟ୍ ଦେଇ ପୋଲିସ୍ ଭିତରକୁ ନେଇଛି। ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚର ଖାତା ଦେଖା ବର୍ଜନ ଡାକରାରେ ରାଜ୍ୟର ସବୁ ମୂଲ୍ୟାୟନ କେନ୍ଦ୍ର ଆଗରେ ଆଜି ଦେଖିବାକୁ ମିଳିଛି ଉଣା ଅଧିକେ ଏମିତି ସ୍ଥିତି। ତେବେ ଭୁବନେଶ୍ୱରରେ ଆନ୍ଦୋଳନରତ ଶିକ୍ଷୟିତ୍ରୀଙ୍କ ଉପରେ ପୋଲିସ୍&zwnj;ର ମାତ୍ରାଧିକ କାର୍ଯ୍ୟାନୁଷ୍ଠାନ ଅଭିଯୋଗ ହୋଇଛି।</p><p>ଏପଟେ ମୂଲ୍ୟାୟନ କେନ୍ଦ୍ର ବାହାରେ ଏସବୁ ଉତ୍ତେଜନା ଏବଂ ପ୍ରାୟ ୫ ହଜାର ଶିକ୍ଷକଙ୍କ ଅନୁପସ୍ଥିତିରେ ଆରମ୍ଭ ହୋଇଛି ଖାତା ଦେଖା। ବୋର୍ଡ କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ ବିରୋଧ ଯୋଗୁଁ କେବଳ ନିମାପଡ଼ା ଓ ଟିଟିଲାଗଡ଼ ସେଣ୍ଟରରେ ଖାତା ଦେଖା ହୋଇପାରି ନାହିଁ। ଅନ୍ୟ ସବୁଠି ପ୍ରକ୍ରିୟା ଆରମ୍ଭ ହୋଇଛି। ସେପଟେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ଆଜି ପୁଣି ଦୋହରାଇଛନ୍ତି ଆନ୍ଦୋଳନରତ ଶିକ୍ଷକଙ୍କ ମୂଲ୍ୟାୟନ ବର୍ଜନର ଖାତା ଦେଖା ଉପରେ ପ୍ରଭାବ ପକାଇବନି।</p><p>ଛାତ୍ରଛାତ୍ରୀଙ୍କ କ୍ୟାରିୟରକୁ ଗୁରୁତ୍ୱପୂର୍ଣ୍ଣ ଦିଶା ଦେଇଥାଏ ମାଟ୍ରିକ୍ ପରୀକ୍ଷା। ହେଲେ ରେଜଲ୍ଟ ଅପେକ୍ଷାରେ ଥିବା ଛାତ୍ରଛାତ୍ରୀଙ୍କ ଖାତା ଦେଖା ବେଳେ ଏ ବିବାଦ ସେମାନଙ୍କୁ ମୂଲ୍ୟାୟନର ମାନକୁ ଆଶଙ୍କା ଭିତରକୁ ଟାଣି ନେଇଛି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।