ମିଜଲେସ୍‌ ରୁବେଲା ଟୀକା ନେଲା ଜୀବନ!

ଭୁବନେଶ୍ୱର(ଓଡ଼ିଶା ରିପୋର୍ଟର): ଜୀବନକୁ ନିର୍ଭୟରେ ବଞ୍ଚିବା ପାଇଁ ଦିଆଯାଉଛି ଟୀକା। କିନ୍ତୁ ଏହି ଟୀକା ଏବେ ରାଜ୍ୟର ଅନେକ ଅଞ୍ଚଳରେ ଶିଶୁଙ୍କ ପାଇଁ ଯନ୍ତ୍ରଣାଦାୟକ ପାଲଟିଛି। ଏପରିକି ଜୀବନ ମଧ୍ୟ ନେଇଥିବା ଅଭିଯୋଗ ଆସିଛି। ମିଜଲେସ୍‌ ରୁବେଲା ଟୀକା ନେଇ ଝାରସୁଗୁଡ଼ାରେ ଜଣେ ଛାତ୍ରୀ ଜୀବନ ହରାଇଥିବା ବେଳେ କେତେକ ଅଞ୍ଚଳରେ ଶିଶୁ ଏବେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏହି ଲୋକଲୋଚନକୁ ଆସିବା ପରେ ସ୍ୱାସ୍ଥ୍ୟ ବିଭାଗର ଚେତା ପସିଛି। ଜୀବନ ରକ୍ଷକ କାହିଁକି ସାଜିଲା ଜୀବନ ଭକ୍ଷକ, ତାକୁ ଅନୁଧ୍ୟାନ କରାଯିବ ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଉଛି।

ମିଜଲେସ୍‌ ରୁବେଲା ଟୀକା ନେବା ପରେ କାହାର ଏଲର୍ଜି ବାହାରିଛି ତ ଆଉ କିଏ ଜ୍ୱରରେ ପୀଡ଼ତ ହେଉଛି। ଟୀକା ନେବା ପରେ ଯେତିକି ଆତଙ୍କିତ ହୋଇ ପଡ଼ିଛନ୍ତି ଛାତ୍ରଛାତ୍ରୀ। ସେତିକି ଆଶଙ୍କାରେ ଅଛନ୍ତି ଅଭିଭାବକ। ତେବେ ସବୁଠାରୁ ଦୁଃଖଦ ଘଟଣା ଘଟିଛି ଝାରସୁଗୁଡ଼ାରେ। ଲଖନପୁର ବ୍ଲକ୍ ପିପିଲିମାଲ୍ ଗାଁର ଦାନୀ କିଷାନ୍ ଝିଅ ଅଞ୍ଜୁ କିଷାନଙ୍କ ମୃତ୍ୟୁ ହୋଇଛି। ଅଞ୍ଜୁ, ବଞ୍ଜାରୀ ଆଦିବାସୀ ଆବାସିକ ବିଦ୍ୟାଳୟରେ ପଢୁଥିବା ବେଳେ ଟୀକା ନେଇ ଅସୁସ୍ଥ ହୋଇ ପଡ଼ିଥିଲେ। ଝିଅକୁ ଟୀକା ନ ଦେବା ପାଇଁ ସ୍କୁଲ କର୍ତ୍ତୃପକ୍ଷଙ୍କୁ ଅଞ୍ଜୁଙ୍କ ବାପା କହିଥିଲେ। ଏହା ସତ୍ତ୍ୱେ ଅଞ୍ଜୁଙ୍କୁ ଟୀକା ଦିଆଯାଇଥିବାରୁ ଝିଅର ମୃତ୍ୟୁ ହୋଇଥିବା ଅଭିଯୋଗ ହୋଇଛି।

ଜନସ୍ୱାସ୍ଥ୍ୟ ବିଭାଗ କିନ୍ତୁ, ଟୀକାକରଣ ଯୋଗୁ ମୃତ୍ୟୁ ହୋଇଥିବା ଅଭିଯୋଗକୁ ଅସ୍ୱୀକାର କରିଛି। ଘଟଣାର ତଦନ୍ତ ପାଇଁ ସ୍ୱତନ୍ତ୍ର ଟିମ୍ ଲଖନପୁର ପଠାଯାଇଛି। ଟୀକାକରଣ ପରେ କେତେକାଂଶରେ ଜ୍ୱର ଆସିପାରେ, ଦେହହାତ ଘୋଳାବିନ୍ଧା କରିପାରେ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ। ତେବେ ଏଭଳି ଅବସ୍ଥାରୁ ଶିଶୁଙ୍କୁ ରକ୍ଷା କରିବା ପାଇଁ ସ୍ୱାସ୍ଥ୍ୟ ବିଭାଗ କର୍ମୀଙ୍କୁ ଏଏଫ୍ଆଇ କିଟ୍ ପ୍ରଦାନ କରାଯାଇଛି ବୋଲି ନିର୍ଦ୍ଦେଶକ କହିଛନ୍ତି।

ରାଜ୍ୟରେ ୯ ମାସରୁ ୧୫ ବର୍ଷ ପର୍ଯ୍ୟନ୍ତ ମୋଟ୍ ଏକ କୋଟି ୧୨ ଲକ୍ଷ ୨୫ ହଜାର ୧୭୬ ଜଣ ଶିଶୁଙ୍କୁ ଏହି ଟୀକାକରଣ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଗତ ଛଅ ଦିନ ମଧ୍ୟରେ ୫୦ ଲକ୍ଷ ୫୪ ହଜାର ୬୨୪ଜଣ ଶିଶୁଙ୍କ ଟୀକାକରଣ ଶେଷ ହୋଇଛି। ଜାନୁୟାରୀ ୨୯ ତାରିଖରୁ ଆରମ୍ଭ ହୋଇଥିବା ଏହି ଟୀକାକରଣ ବିଭିନ୍ନ ପର୍ଯ୍ୟାୟରେ ମାର୍ଚ୍ଚ ୨୬ ତାରିଖ ପର୍ଯ୍ୟନ୍ତ ଜାରି ରହିବ।