ଦିଲ୍ଲୀରେ ଏକାଠି ହେଲେ ସୌମ୍ୟ-ନରସିଂହ-ନବୀନ ! ହେଲେ କ’ଣ ପାଇଁ ?  

ଭୁବନେଶ୍ୱର(ଓଡିଶା ରିପୋର୍ଟର): ରାଜ୍ୟର ଦୁଇ ପୁରୁଖାନେତା ଆମ ଓଡ଼ିଶା ପାର୍ଟି ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ଓ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ରଙ୍କ ରାଜନୈତିକ ଭବିଷ୍ୟତକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଛି। ଏହି ଦୁଇ ନେତା ବିଜେଡି ରାଜନୀତିରେ ନୂଆ ସମୀକରଣ ସୃଷ୍ଟି କରିପାରନ୍ତି ବୋଲି ଚର୍ଚ୍ଚା ହେଉଛି । ନରସିଂହ ଦିଲ୍ଲୀରେ ନବୀନଙ୍କୁ ଭେଟିଥିବା ବେଳେ ସୌମ୍ୟ ମଧ୍ୟ ତାଙ୍କୁ ସାକ୍ଷାତ କରିଛନ୍ତି। ହେଲେ କ’ଣ ପାଇଁ ସେ ପ୍ରଶ୍ନର ଉତ୍ତର ଆଗାମୀ ଦିନରେ ମିଳିଯିବ ବୋଲି ଚର୍ଚ୍ଚା ହେଉଛି।

ସୂଚନାଯୋଗ୍ୟ, ତୃତୀୟ ମହଲାର ପାଓ୍ୱାରଫୁଲ ଅଫିସର ଓ ଆମ ଓଡ଼ିଶା ପାର୍ଟିର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକଙ୍କ ମଧ୍ୟରେ ସମ୍ପର୍କ ଘନିଷ୍ଠ ହେଉଥିବା ଦେଖିବାକୁ ମିଳିଛି। ନୂଆଦିଲ୍ଲୀରେ ଭାରତୀୟ ହକି ଟିମ୍‌ ନୂଆ ଜର୍ସି ଉନ୍ମୋଚନ ଉତ୍ସବରେ ଦେଖିବାକୁ ମିଳିଥିଲା ଏହି ଚିତ୍ର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କୁ ମଧ୍ୟ ସୌମ୍ୟ ସାକ୍ଷାତ କରିଛନ୍ତି ।  କିଛି ଦିନ ଆଗରୁ ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ ସୌମ୍ୟ। ତା ହେଲେ ଏତେ କମ୍‌ ସମୟ ମଧ୍ୟରେ ନବୀନଙ୍କୁ ବାରମ୍ବାର ସାକ୍ଷାତ ଓ ତାଙ୍କ ବ୍ୟକ୍ତିଗତ ସଚିବଙ୍କ ସହ ମଧୁର ବାର୍ତ୍ତାଳାପ ଭିନ୍ନ କିଛି ଇଙ୍ଗିତ କରିବା ସ୍ୱାଭାବିକ।

ଏପଟେ ଦିଲ୍ଲୀରେ ନବୀନ-ନରସିଂହ ଭେଟଘାଟ ମଧ୍ୟ କୌତୁହଳ ସୃଷ୍ଟି କରିଛି। ଗତକାଲି ବିରୋଧୀ ଦଳ ନେତା ନରସିଂହ ନବୀନଙ୍କୁ ଭେଟିବାର ଅସଲ ଉଦ୍ଦେଶ୍ୟ ନ କହି ତେରଛା ଉତ୍ତର ଦେଇଥିଲେ।  ଦୀର୍ଘ ଦିନ ହେବ କଂଗ୍ରେସରେ ଲାଗି ରହିଥିବା ଗୋଷ୍ଠୀ କନ୍ଦଳ ଦୃଷ୍ଟିରୁ ନରସିଂହ ବିତସ୍ଫୃହ ହୋଇପାଡିଥିବା ବାସ୍ନା ଆସୁଛି। ତାହେଲେ କ’ଣ ଏ ଦୁଇ ଛାମୁଆ ନେତା ବିଜେଡି ପଟକୁ ଢଳୁଛନ୍ତ କି ବୋଲି ଏବେ ବାଟ ଘାଟରେ କଥା ପଡୁଛି।

ସେପଟେ ଏ ନେଇ ନବୀନ ଦିଲ୍ଲୀରୁ ଫେରି ପ୍ରତିକ୍ରିୟାରେ କହିଛନ୍ତି, ହକି କାର୍ଯ୍ୟକ୍ରମ ବିଷୟରେ ବୁଝିବାକୁ ନରସିଂହ ତାଙ୍କ ପାଖକୁ ଯାଇଥିଲେ । ଅନ୍ୟପକ୍ଷରେ ପ୍ରତିକ୍ରିୟା ରଖି ସୌମ୍ୟ କହିଛନ୍ତି ବିଜେଡି ମୋ କାମ କଲେ ଯୋଗଦାନ ସହ ସମାନ।