ଭୁବନେଶ୍ୱର (ଓଡ଼ିଶା ରିପୋର୍ଟର): ସାରା ରାଜ୍ୟରେ ହାଡ଼ଭଙ୍ଗା ଶୀତ ଜାରି ରହିଛି। ଓଡ଼ିଶାର କଶ୍ମୀର କୁହାଯାଉଥିବା କନ୍ଧମାଳ ଜିଲ୍ଲାର ଦାରିଙ୍ଗବାଡ଼ିରେ ସର୍ବନିମ୍ନ ତାପମାତ୍ରା ଆଜି ୩ ଡିଗ୍ରୀକୁ ଖସି ଆସିଛି। ଦାରିଙ୍ଗବାଡ଼ି ଆଖପାଖ ଅଞ୍ଚଳରେ ଆଜି ତୁଷାରପାତ ହୋଇଥିବା ଦେଖିବାକୁ ମିଳିଥିଲା। ସେହିଭଳି ଫୁଲବାଣୀରେ ସର୍ବନିମ୍ନ ତାପମାତ୍ରା ୪.୫ ଡିଗ୍ରୀ ରେକର୍ଡ କରାଯାଇଛି।
ଦାରିଙ୍ଗବାଡ଼ି ଓ ଫୁଲବାଣୀ ପରେ ଆଜି ସବୁଠୁ ଅଧିକ ଶୀତ ଅନୁଭୂତ ହୋଇଛି ଅନୁଗୋଳରେ। ଏଠାରେ ସର୍ବନିମ୍ନ ତାପମାତ୍ରା ୫.୬ ଡିଗ୍ରୀକୁ ଖସି ଆସିଛି।
ବଲାଙ୍ଗିରରେ ଆଜି ସର୍ବନିମ୍ନ ତାପମାତ୍ରା ୭.୧ ଡିଗ୍ରୀ ରହିଥିବା ବେଳେ କୋରାପୁଟରେ ୭.୨, ସମ୍ବଲପୁରରେ ୭.୩, ବାଲେଶ୍ୱରରେ ୭.୮, ସୁନ୍ଦରଗଡ଼ରେ ୮ ଓ ହୀରାକୁଦରେ ୮.୭ ଡିଗ୍ରୀ ରହିଥିଲା।
ରାଜ୍ୟର ଅନ୍ୟାନ୍ୟ ସ୍ଥାନ ଭଳି ଭୁବନେଶ୍ୱର ଓ କଟକରେ ମଧ୍ୟ ପ୍ରବଳ ଶୀତ ହେଉଛି। ଭୁବନେଶ୍ୱରରେ ଆଜି ସର୍ବନିମ୍ନ ତାପମାତ୍ରା ୮.୨ ଡିଗ୍ରୀ ରେକର୍ଡ କରାଯାଇଥିବା ବେଳେ କଟକରେ ବି ସେତିକି ରହିଛି।
ଜାନୁଆରୀ ୪ ତାରିଖ ପର୍ଯ୍ୟନ୍ତ ଏମିତି ଶୀତ ଲହରୀ ଜାରି ରହିବ ବୋଲି ସୂଚନା ମିଳିଛି।