ବଲାଙ୍ଗିର(ଘଟେଶ୍ୱର ମିଶ୍ର): ଯେଉଁ ବଡ଼ ଭାଇକୁ ନିଜ ଜୀବନଠୁ ଅଧିକ ଭଲ ପାଉଥିଲା, ତାହାର ଅଚାନକ ମୃତ୍ୟୁକୁ ସହଜେ ଗ୍ରହଣ କରିପାରିଲାନି ସାନଭାଇ। ମୁଣ୍ଡରେ ପଡ଼ିଲା ଚଡ଼କ । ଫଳରେ ବଡ଼ ଭାଇର କୋକେଇ ନ ଉଠୁଣୁ ନିଜେ ବି ବିଷ ପିଇଦେଲା ୧୪ ବର୍ଷୀୟ ସାନ ଭାଇ । ଗୋଟିଏ ପଟେ ବଡ଼ ପୁଅର ମୃତଦେହ ଘରେ ପହଞ୍ଚି ନ ଥିବା ବେଳେ ସାନ ପୁଅ ହସ୍ପିଟାଲରେ ମୃତ୍ୟୁ ସହ ସଂଘର୍ଷ କରୁଛି। ଏପରି ଅଭାବନୀୟ ଓ ହୃଦୟ ବିଦାୟକ ଘଟଣା ବଲାଙ୍ଗିର ଜିଲ୍ଲା ବେଲପଡା ଥାନା କୁମ୍ଭାରଖାନ ଗାଁରେ ଘଟିଛି।
ମୃତକ ହେଲେ କୁମ୍ଭାରଖାନ ଗାଁର ଅଶ୍ୱିନୀ ପୁଟେଲଙ୍କ ବଡ଼ ପୁଅ ୨୫ ବର୍ଷୀୟ ଦୀପକ ପୁଟେଲ । ବିଷ ପିଇ ଗୁରୁତର ହୋଇଛନ୍ତି ତାଙ୍କ ସାନ ପୁଅ ବିଶ୍ୱଜିତ ପୁଟେଲ । ଦୁଇ ପୁଅଙ୍କୁ ନେଇ ସୁଖର ସଂସାର କରିଥିବା ଅଶ୍ୱିନୀଙ୍କ ମୁଣ୍ଡରେ ହଠାତ୍ ଚଡ଼କ ପଡ଼ିଥିବା ବେଳେ ଛାରଖାର ହୋଇଗଲା ତାଙ୍କ ସୁନାର ସଂସାର।
ଗତକାଲି ସନ୍ଧ୍ୟାରେ ଦୀପକ ପୁଟେଲ ଝାଙ୍କ୍ରିପାଲି ଗାଁ ନିକଟରେ ଥିବା ଛେଲିଆମାଲ ଡ୍ୟାମକୁ ମାଛ ମାରିବାକୁ ଯାଇଥିଲେ । ପାଣି ଭିତରେ ପଶି ମାଛ ମାରୁଥିବା ସମୟରେ ଆଉ ବାହାରକୁ ବାହାରିପାରିନଥିଲେ । ପରିବାର ଲୋକେ ବହୁ ଖୋଜାଖୋଜି ପରେ ବି ତାଙ୍କ ସନ୍ଧାନ ପାଇ ନ ଥିଲେ। ଆଜି ଭୋରରୁ ତାଙ୍କ ମୃତଦେହ ପାଣିରେ ଭାସୁଥିଲା । ସ୍ଥାନୀୟ ଲୋକେ ଶବକୁ ଉଦ୍ଧାର କରି ବେଲପଡା ପୁଲିସକୁ ଖବର ଦେଇଥିଲେ । ପୁଲିସ୍ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
ବଡଭାଇ ଦୀପକଙ୍କ ମୃତ୍ୟୁ ଖବର ଶୁଣି ଦୁଃଖରେ ଭାଙ୍ଗି ପଡ଼ିଲେ ବିଶ୍ୱଜିତ । ବଡ଼ ଭାଇ ଆଉ ନ ଥିବାରୁ ବଞ୍ଚିବା ଅପେକ୍ଷା ଜୀବନ ହାରିବାକୁ ନିଷ୍ପତ୍ତି ନେଲେ। ଏହାପରେ ସେ ଘରେ ଥିବା ବିଷ ପିଇ ଦେଇଥିଲେ । ବିଷର ଜ୍ୱାଳା ସହି ନ ପାରି ଯନ୍ତ୍ରଣାରେ ଛଟପଟ ହେବାରୁ ପରିବାର ଲୋକେ ଗୁରୁତର ଅବସ୍ଥାରେ ତାଙ୍କୁ ପାଟଣାଗଡ ହସ୍ପିଟାଲରେ ଭର୍ତ୍ତି କରିଛନ୍ତି।
ଭାଇ-ଭାଇ ମଧ୍ୟରେ କଳହ ଘଟି ହଣାହଣି ଯାଏ କଥା ଯାଉଥିବା ବେଳେ ଏଠାରେ ଜଣଙ୍କ ମୃତ୍ୟୁ ଖବର ଶୁଣି ଆଉ ଜଣେ ଜୀବନ ହାରିବାକୁ ଉଦ୍ୟତ ହେବା ଖବର ଶୁଣି ବାକ୍ଶୂନ୍ୟ ହୋଇଯାଇଛନ୍ତି ସ୍ଥାନୀୟ ଲୋକେ । ସମସ୍ତଙ୍କ ଆଖିରୁ ଲୁହ ଗଡ଼ୁଥିବା ବେଳେ ବିଶ୍ୱଜିତ କିପରି ସୁସ୍ଥ ହୋଇ ଘରକୁ ଫେରିବେ ସେ ନେଇ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
