ଉତ୍‌କ୍ଷେପଣ ହେଲା ବାଲେଷ୍ଟିକ୍ ମିସାଇଲ ଅଗ୍ନି-୧(ଏ)

ବାଲେଶ୍ୱର: ଆଜି ସକାଳ ସାଢେ ୮ଟାରେ ବାଲେଷ୍ଟିକ୍ ମିସାଇଲ ଅଗ୍ନି-୧(ଏ)ର ବ୍ୟାବହାରିକ ପରୀକ୍ଷଣ ହୋଇଛି। ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷା କେନ୍ଦ୍ରର ଧାମରା ସ୍ଥିତ ଡ଼ଃ ଅବଦୁଲ କାଲାମ ଆଇଲ୍ୟାଣ୍ଡର ୪ନଂ ଲଞ୍ଚପ୍ୟାଡରୁ ଏହି କ୍ଷେପଣାସ୍ତ୍ରକୁ ଉତ୍‌କ୍ଷେପଣ କରାଯାଇଛି। ସ୍ୱଳ୍ପ ଦୂରଗାମୀ ଏହି କ୍ଷେପଣାସ୍ତ୍ରର ଲକ୍ଷ୍ୟଭେଦ କ୍ଷମତା ୭ ଶହରୁ ୯ ଶହ କିମି। ଏହି କ୍ଷେପଣାସ୍ତ୍ରର ଲମ୍ବ ୧୫ ମିଟର, ମୋଟେଇ ୧ ମିଟର ଏବଂ ଓଜନ ୧୨ହଜାର କିଲୋଗ୍ରାମ। ଏଥିରେ ୧ହଜାରରୁ ଅଢେଇ ହଜାର କିଲୋଗ୍ରାମ ପର୍ଯ୍ୟନ୍ତ ଉଭୟ ପାରମ୍ପରିକ ଓ ଆଣବିକ ଯୁଦ୍ଧାସ୍ତ୍ର ବହନ କରିବାର କ୍ଷମତା ରହିଛି। ଏହି ମିସାଇଲ ଶବ୍ଦର ବେଗଠାରୁ ଅଢେଇ ଗୁଣ ଅଧିକ ବେଗରେ ଗତି କରି ୨୫ ମିଟର ବ୍ୟାସାର୍ଦ୍ଧ ମଧ୍ୟରେ ଏହା ଟାର୍ଗେଟ୍ ହିଟ୍ କରିପାରିବ।

୨୦୦୪ରୁ ପ୍ରତିରକ୍ଷା ବିଭାଗରେ ବ୍ୟବହାର ହେଉଛି ଏହି କ୍ଷେପଣାସ୍ତ୍ର। ଆଜିର ପରୀକ୍ଷଣ ହୋଇଥିବା କ୍ଷେପଣାସ୍ତ୍ର ୨୦୧୮ର ଭର୍ସନ ବୋଲି ଜଣାପଡିଛି। ଏହି ଉତ୍‌କ୍ଷେପଣର ସଫଳତା ନେଇ ଡିଆରଡିଓ ଓ ପ୍ରତିରକ୍ଷା ବିଭାଗର ବୈଜ୍ଞାନିକମାନେ ବେଶ୍ ଆଶାବାଦୀ ଅଛନ୍ତି।  ମିସାଇଲ ଉତ୍‌କ୍ଷେପଣ ହେବା ପରେ ତଥ୍ୟ ସଂଗ୍ରହ ପାଇଁ ପ୍ରସ୍ତୁତ ଥିବା ରାଡାରର ତଥ୍ୟକୁ ନେଇ ସମୀକ୍ଷା ଚାଲିଛି।