ଦେବଗଡ଼ (ସିଦ୍ଧାର୍ଥ ଗୁରୁ): ଦେବଗଡ଼ ଜିଲ୍ଲା ରିଆମାଳ ଥାନା ଅନ୍ତର୍ଗତ ପାଲୁଣୀପଡ଼ା ଗାଁର କେନ୍ଦୁପତ୍ର ଫଡ଼ି ନିକଟସ୍ଥ ଏକ ବୁଦା ମଧ୍ୟରୁ ଜଣେ ଯୁବକଙ୍କ ଗଳିତ ମୃତଦେହ ଉଦ୍ଧାର କରାଯାଇଛି। ତାଙ୍କ ନାଁ ମନୋଜ ମହାନନ୍ଦ। ତାଙ୍କ ଘର ସେହି ଗାଁରେ। ସେ ଗତ ମଙ୍ଗଳବାର ଠାରୁ ନିଖୋଜ ଥିଲେ।
ଆଜି ସକାଳେ ମନୋଜଙ୍କ ମୃତଦେହ ବୁଦା ମଧ୍ୟରେ ପଡ଼ିଥିବା ଦେଖି କିଛି କେନ୍ଦୁପତ୍ର ତୋଳାଳି ପୁଲିସ୍କୁ ସୂଚନା ଦେଇଥିଲେ। ପୁଲିସ୍ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା।
ପାରିପାର୍ଶ୍ୱିକ ପରିସ୍ଥିତିରୁ ମନୋଜଙ୍କୁ ହତ୍ୟା କରାଯାଇଥିବା ପୁଲିସ୍ ସନ୍ଦେହ କରୁଛି। ତେଣୁ ଅଧିକ ତଦନ୍ତ ନିମନ୍ତେ ସାଇଣ୍ଟିଫିକ୍ ଓ ଡଗ୍ ସ୍କ୍ୱାଡ୍ର ସହାୟତା ଲୋଡ଼ିଛି।