ପ୍ରେମିକାର ନଗ୍ନ ଫଟୋ ଉଠାଇ ବ୍ଲାକମେଲ୍‌, ମଧ୍ୟସ୍ଥି ଥିଲା ଭଉଣୀ

ଭୁବନେଶ୍ୱର(ଓଡ଼ିଶା ରିପୋର୍ଟର): ଟ୍ୟୁସନ୍‌ରେ ପଢ଼ୁଥିବା ବେଳେ ଏକ ତରଫା ପ୍ରେମ କରୁଥିଲା ପ୍ରେମିକ। କିନ୍ତୁ ରାଜି ନଥିଲେ ଛାତ୍ରୀ। ସୁଯୋଗ ଉଣ୍ଡି ପିକ୍‌ନିକ ସମୟରେ ଶୌଚାଳୟରେ ଗାଧୋଇବାର ଫଟୋ ଉଠାଇ ଥିଲେ ହତାସ ପ୍ରେମିକ। ପରେ ସେହି ଫଟୋ ଦେଖାଇ ବ୍ଲାକ୍‌ମେଲ୍‌ କରିବା ସହିତ ଅର୍ଥ ଆଦାୟ କରୁଥିଲେ। ଭୟରେ ଛାତ୍ରୀ ଓ ତାଙ୍କ ସାଥୀ ଅର୍ଥ ମଧ୍ୟ ଦେଇଥିଲେ। ଏଥିରେ ମଧ୍ୟସ୍ଥି ସାଜିଥିଲେ ପ୍ରେମିକଙ୍କ ଭଉଣୀ। ଶେଷରେ ପ୍ରେମିକ ନିଜ ଭଉଣୀ ମାଧ୍ୟମରେ କାମ ହାସଲ କରିବା ପାଇଁ ପୀଡ଼ିତା ଛାତ୍ରୀଙ୍କୁ ନିଶା ଔଷଧ ଖାଇବାକୁ ଦେଇଥିବା ଅଭିଯୋଗ ହୋଇଛି। ଏମିତି ସାଂଘାତିକ ଅଭିଯୋଗ ଆଣିଛନ୍ତି ଭୁବନେଶ୍ୱର ସ୍ଥିତ ଉତ୍କଳ ସଂଗୀତ ମହାବିଦ୍ୟାଳୟର ଛାତ୍ରୀ।

ଘଟଣା ୨୦୧୬ ମସିହାର। ପୀଡ଼ିତା ଛାତ୍ର ଯୁକ୍ତ ୨ରେ ପଢ଼ୁଥିଲେ। ସେତେବେଳେ ସେ ଏକ କୋଚିଂ ସେଣ୍ଟରରେ ପଢ଼ୁଥିଲେ। ତାଙ୍କ ସାଙ୍ଗରେ ସମୀର କୁମାର ମହାନ୍ତି ଓ ତାଙ୍କ ଭଉଣୀ ପଢ଼ୁଥିଲେ। ସେହି ବର୍ଷ କୋଚିଂ ସେଣ୍ଟରର ସମସ୍ତ ଛାତ୍ରଛାତ୍ରୀ ପିକ୍‌ନିକ୍‌ ପାଇଁ ମୟୂରଭଞ୍ଜ ଯାଇଥିଲେ। ପୁଅ ଓ ଝିଅମାନେ ଅଲଗା ଅଲଗା ବସ୍‌ରେ ଯାଇଥିଲେ। ପିକ୍‌ନିକ୍‌ ସରିବା ପରେ ପୀଡ଼ିତା ଛାତ୍ରୀ ଓ ତାଙ୍କ ସାଙ୍ଗ ଶୌଚାଳୟ ଗାଧୋଇ ଥିଲେ। ଗାଧୋଇବା ବେଳେ ସମୀର କୁମାର ମହାନ୍ତି ସ୍କାଇଲାଇଟ୍‌ ବାଟେ ପୀଡ଼ିତା ଛାତ୍ରୀଙ୍କ ଅଶ୍ଳୀଳ ଫଟୋ ଉଠାଇ ଥିଲେ। ପରେ ସେହି ଫଟୋ ଦେଖାଇ ପୀଡ଼ିତା ଛାତ୍ରୀ ଓ ତାଙ୍କ ସାଥୀଙ୍କୁ ବ୍ଲକ୍‌ମେଲ୍‌ କରୁଥିଲା। ଏପରିକି ଅଶ୍ଳୀଳ ଫଟୋ ସୋସିଆଲ୍‌ ସାଇଟ୍‌ରେ ଛାଡ଼ି ଦେବାକୁ ଧମକ ଦେଉଥିଲା। ଏଥିପାଇଁ ପଇସା ମଧ୍ୟ ମାଗିଥିଲା। ଲୋକ ଲଜ୍ଜା ଭୟରେ ପୀଡ଼ିତା ଛାତ୍ରୀ ୧୦୦୦ ଓ ତାଙ୍କ ସାଥୀ ୨୦୦୦ ଟଙ୍କା ଦେଇଥିବା ସ୍ୱୀକାର କରିଛନ୍ତି। ପ୍ରେମିକଙ୍କ କଥାରେ ରାଜି ନହେଲେ ଫେବ୍ରୁଆରୀ ୧୫ ସୁଦ୍ଧା ଉଠାଇ ନେବାକୁ ଧମକ ଦେଇଛି।

ପୀଡ଼ିତା ଛାତ୍ରୀ କହିଛନ୍ତି-“ଦେହ ଭଲ ନଥିବା ମହାବିଦ୍ୟାଳୟ ଶୌଚାଳୟ ପାଖରେ ବସିଥିଲି। ଏହି ସମୟରେ ସମୀର ଭଉଣୀ ଆସି ମୋତେ ଔଷଧ ଖାଇବାକୁ ଦେଇଥିଲେ। ସେହି ଔଷଧ ଖାଇଲେ ଦେହ ସୁସ୍ଥ ହୋଇଯିବ ବୋଲି ସେ କହିଥିଲେ। ତା’ କଥାରେ ପଡ଼ି ମୁଁ ସେହି ଔଷଧ ସକାଳ ୮ଟା ଗୋଟିଏ ଓ ଦିନ ୧୧ରେ ଆଉ ଗୋଟିଏ ଖାଇଥିଲି। ତା’ପରେ ଦେହ ଆହୁରି ଅସୁସ୍ଥ ହୋଇ ପଡ଼ିଥିଲା।”