ଚାଷୀଙ୍କୁ ଏମିତି ଚିଟ୍ କରୁଛନ୍ତି ନବୀନ: ୩ ମିନିଟ୍‌ ଭେଟି ଫଟୋ ଉଠାଇଲେ, କିନ୍ତୁ ଟ୍ୱିଟରରେ ଲେଖିଲେ ଲମ୍ବାଚଉଡ଼ା ଭାଷଣ

ଭୁବନେଶ୍ୱର (ଓଡ଼ିଶା ରିପୋର୍ଟର): ସମସ୍ତଙ୍କ ହାତରେ ଥିଲା ଗୋଟିଏ ଗୋଟିଏ ବ୍ୟାଗ୍‌। ଡିଜାଇନ୍‌ ଏକା ପରି। କାହା ହାତରେ ଥିଲା ଫୁଲ ତୋଡ଼ା। ସମସ୍ତଙ୍କ ବେକରେ ଝୁଲୁଥିଲା ଗୋଟାଏ ଗୋଟାଏ ବ୍ୟାଚ୍‌। ତିନିଦିନ ତଳେ, ଗତ ୨୩ ତାରିଖ ଶନିବାର ଦିନ ଏମିତି ଅନେକ ପୁରୁଷ ମହିଳାଙ୍କ ଲାଇନ୍ ଲାଗିଥିଲା ନବୀନ ନିବାସକୁ। ଏମାନଙ୍କ ମଧ୍ୟରେ କେତେକ ବୃଦ୍ଧବୃଦ୍ଧା ମଧ୍ୟ ଆସିଥିଲେ। ସାଙ୍ଗରେ ପିଲାଛୁଆ ବି ଆସିଥାନ୍ତି। ଚାଷ ସମ୍ପର୍କିତ ଆଲୋଚନା ପାଇଁ ଉପାନ୍ତ ମୟୂରଭଞ୍ଜ ଜିଲ୍ଲାର ବହଳଦା ବ୍ଲକରୁ ଆସିଥିଲେ ଏହି ଚାଷୀଘରର ଲୋକମାନେ। ମନରେ ଅପୂର୍ବ ଇଚ୍ଛା ଏବଂ ଉତ୍ସାହ। କାହିଁକିନା ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବେ। ସେମାନଙ୍କ ବେଉସା ଚାଷ ସଂପର୍କରେ ଆଲୋଚନା କରିବେ। ତେଣୁ ୩୦୦ କିଲୋମିଟର ଦୂରରୁ ଧାଇଁ ଆସିଥିଲେ ରାଜଧାନୀ ଭୁବନେଶ୍ୱର। ମନରେ ଉତ୍କଣ୍ଠା କହିଲେ ନସରେ। ସମସ୍ତଙ୍କର ଇଚ୍ଛା ଥିଲା ନବୀନଙ୍କୁ ନିଜ ସମସ୍ୟା କଥା କହିବେ।

ନବୀନ ନିବାସର ବାବୁମାନେ, ସେଇ କମ୍ପାଉଣ୍ଡ ଭିତରେ ଗୋଟେ ଗଛ ତଳେ ଏକ ଛାମୁଣ୍ଡିଆ ମାରି ସେମାନଙ୍କୁ ଚେୟାରରେ ବସାଇଥିଲେ। ଠିକ୍ ସମୟ ଆସିଲା। ମୁଖ୍ୟମନ୍ତ୍ରୀ ସମସ୍ତଙ୍କୁ ଭେଟିବାକୁ ନିଜ ପାରିଷଦଙ୍କ ସହ ଆସିଲେ। ହାତ ଯୋଡ଼ି ସମସ୍ତଙ୍କୁ ନମସ୍କାର ହେଲେ। ବହଳଦାରର ଚାଷୀମାନଙ୍କ ହାତରୁ ଫୁଲତୋଡ଼ା ନେଲେ। ତା ପରେ କେହି କିଛି ପଚାରିବା ଆଗରୁ ସେ ଫଟୋ ପୋଜ୍ ଦେବାକୁ ସମସ୍ତଙ୍କ ସହ ଠିଆ ହୋଇଗଲେ। ନୀରିହ ଚାଷୀମାନେ ମୁଖ୍ୟମନ୍ତ୍ରୀଙ୍କ ସହ ଫଟୋ ଉଠାଇବାକୁ ବ୍ୟାନର ଧରି ଠିଆହେଲେ। ଜଣେ ବୟସ୍କ ଚାଷୀଙ୍କୁ (ଯିଏ କି ଆଗରେ ଥିଲେ) ଦେଖାଇ ନବୀନ ବାବୁ ଇଙ୍ଗିତ କଲେ ୟାଙ୍କ ଫଟୋ ଯେମିତି ଆସିବ। ଫଟୋ ଉଠା ସରିଗଲା। ଏମିତି ଏମିତି ସମସ୍ତ କାମ ସରିଗଲା ମାତ୍ର ୩ ମିନିଟ୍‌ରେ। ତା ପରେ ନବୀନ ବାବୁ ସମସ୍ତଙ୍କୁ ନମସ୍କାର ହୋଇ ପୁଣି ନବୀନ ନିବାସ ଭିତରକୁ ଚାଲିଗଲେ।

ହେଲେ ଚାଷ ସଂପର୍କିତ କୌଣସି ଆଲୋଚନା କଲେନାହିଁ କିମ୍ବା ଚାଷୀମାନେ ମଧ୍ୟ କେହି କିଛି ପଚାରିବାର ସୁଯୋଗ ପାଇଲେ ନାହିଁ। ନବୀନ କେବଳ ପଚାରିଥିଲେ- ପ୍ରୋଗ୍ରାମ ଭଲ ଚାଲିଛି? ଆପଣମାନେ ଭଲ ଅଛନ୍ତି? ବାସ୍‌ ଏତିକି ଥିଲା ଆଲୋଚନା। କିନ୍ତୁ ନବୀନଙ୍କ ଏହି ୩ ମିନିଟିଆ ଚାଷୀ-ଭେଟଘାଟକୁ ଯେଭଳି ପ୍ରଚାର ପ୍ରସାର କରାଗଲା ତାହା ଆପଣ ଆଖିରେ ନ ଦେଖିଲେ ବିଶ୍ୱାସ କରିପାରିବେ ନାହିଁ।

ନବୀନ ଯେଉଁ ଦୁଇପଦ ଆଲୋଚନା କଲେ ସେଥିରେ ଚାଷ ସମ୍ପର୍କରେ କିଛି କଥା ନଥିଲା।   ହେଲେ ଏହି ଚାଷୀ-ଭେଟଘାଟର ମାତ୍ର କିଛି ସମୟ ପରେ ଆସିଲା ନବୀନଙ୍କ ଟ୍ୱିଟ୍। ସେଥିରେ ଯାହା ଲେଖାଯାଇଛି ତାହା ପଢ଼ିଲେ ଆପଣଙ୍କ ହୋସ୍ ଉଡ଼ିଯିବ। ମୁଖ୍ୟମନ୍ତ୍ରୀ ନିଜ ଟ୍ୱଟରରେ କେମିତି ଡାହାମିଛ ଲେଖି ଓଡ଼ିଶାବାସୀଙ୍କୁ ଭକୁଆ ବନେଇ ପାରନ୍ତି ତାହା ଆପଣ ନିଜେ ପଢ଼ନ୍ତୁ। ତାଙ୍କ ଟ୍ୱିଟର ମେସେଜ୍‌ରେ ଲେଖାଥିଲା-

“ବହଳଦା ବ୍ଲକରୁ କୃଷକ ପ୍ରଶିକ୍ଷଣ ଶିବିରରେ ଯୋଗ ଦେବାକୁ  ଆସିଥିବା ଚାଷୀଭାଇମାନଙ୍କ  ସହିତ  ଚାଷ କାର୍ଯ୍ୟ ଓ ସେମାନଙ୍କ ଆବଶ୍ୟକତା ବିଷୟରେ ପଚାରି ବୁଝିଲି। ଉତ୍ତମଫସଲ ପରିଚାଳନା ପାଇଁ ନୂତନ ଜ୍ଞାନ କୌଶଳ ବ୍ୟବହାର ଏବଂ ଆମ ବିଭିନ୍ନ କୃଷକ କଲ୍ୟାଣକାରୀ ଯୋଜନାର ସୁବିଧା ନେବା ପାଇଁ ପରାମର୍ଶ ଦେଲି।”

କିନ୍ତୁ ବାସ୍ତବ କଥା ହେଲା ୩୦୦ କିଲୋମିଟର ଦୂରରୁ ଧାଇଁ ଆସିଥିବା ଏହି ଚାଷୀଙ୍କ ସହ ନବୀନ ସମୁଦାୟ ମାତ୍ର ୩ ମିନିଟ୍‌ ହିଁ ବିତାଇଥିଲେ। ସେଥିରେ କୌଣସି ଆଲୋଚନା ସ୍ଥାନ ପାଅ ଥିଲା। କିନ୍ତୁ ଟ୍ୱିଟର ଆକାଉଣ୍ଟରେ ଲମ୍ବାଚଉଡ଼ା ମେସେଜ୍ ଲେଖାଗଲା। ଇଏ ଭାତହାଣ୍ଡିରୁ ମାତ୍ର ଗୋଟିଏ। ବାସ୍ତବରେ ଓଡ଼ିଶାର ମୁଖ୍ୟମନ୍ତ୍ରୀ କେମିତି କାମ କରୁଛନ୍ତି, ତାଙ୍କ ବାସ୍ତବ କାମ ଓ ପ୍ରଚାର ଭିତରେ କେତେ ତଫାତ୍ ତାହା ଏହି ଘଟଣାରୁ ଧରାପଡ଼ି ଯାଇଛି। ଗତ ୧୮ ବର୍ଷ ହେଲା ନବୀନ ଏମିତି ଓଡ଼ିଶାବାସୀଙ୍କୁ ଭକୁଆ ବନେଇ ଆସୁଛନ୍ତି। ଦେଖନ୍ତୁ ନବୀନ ଚାଷୀଙ୍କୁ ଭେଟିବାର ସେହି ଭିଡିଓ।