‘ଦେଶରେ ଇସ୍ପାତ୍ ଉତ୍ପାଦନ କ୍ଷେତ୍ରରେ ଅଗ୍ରଣୀ ଭୂମିକା ଗ୍ରହଣ କରିଛି ଓଡ଼ିଶା’

ଭୁବନେଶ୍ୱର(ଓଡ଼ିଶା ରିପୋର୍ଟର): ଦେଶରେ ଇସ୍ପାତ୍ ଉତ୍ପାଦନ କ୍ଷେତ୍ରରେ ଅଗ୍ରଣୀ ଭୂମିକା ଗ୍ରହଣ କରିଛି ଓଡିଶା। ଦେଶରେ ଉତ୍ପାଦିତ ସମୁଦାୟ ଇସ୍ପାତର ୨୫ ପ୍ରତିଶତ କେବଳ ଓଡ଼ିଶାରୁ ମିଳୁଥିବା ବେଳେ ରାଜ୍ୟରେ କ୍ରୁଡ୍ ଷ୍ଟିଲ୍ ଉତ୍ପାଦନ ବାର୍ଷିକ ୩୩ ମିଲିୟନ୍ ଟନ୍‌ରେ ପହଞ୍ଚିଛି। ଭୁବନେଶ୍ୱରରେ ଆୟୋଜିତ ସପ୍ତମ ଏସିଆ ଷ୍ଟିଲ୍ ଅନ୍ତର୍ଜାତୀୟ ସମ୍ମିଳନୀର ଉଦ୍‌ଘାଟନୀ ଉତ୍ସବରେ ଯୋଗଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଲୌହ ଓ ମାଙ୍ଗାନିଜ ନିଲାମୀରେ ଓଡ଼ିଶାର ସ୍ଥାନ ଶୀର୍ଷରେ ଥିବାରୁ ଏଥିରେ ସାମିଲ ହେବାକୁ ଶିଳ୍ପପତି ଓ ନିବେଶକଙ୍କୁ ମୁଖ୍ୟମନ୍ତ୍ରୀ ଆହ୍ୱାନ କରିଛନ୍ତି।

ସେ ଆହୁରି କହିଛନ୍ତି-“୨୦୧୭ ଜାତୀୟ ଇସ୍ପାତ ନୀତି ଅନୁସାରେ ୨୦୩୦ ସୁଦ୍ଧା ମୁଣ୍ଡପିଛା ଇସ୍ପାତ ବ୍ୟବହାରକୁ ୬୧ କିଲୋରୁ ୧୫୮ କିଲୋକୁ ପହଞ୍ଚାଇବା ପାଇଁ ଲକ୍ଷ୍ୟ ରଖାଯାଇଛି।”

୪ ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ କେନ୍ଦ୍ର ଇସ୍ପାତ ସଚିବ ଅରୁଣା ଶର୍ମାଙ୍କ ସହ ଭାରତ ତଥା ବିଦେଶର ପ୍ରାୟ ୫୦୦ ଶିଳ୍ପ ବିଶେଷଜ୍ଞ ଓ ନିବେଶକ ଯୋଗ ଦେଇଛନ୍ତି।

କେନ୍ଦ୍ର ଇସ୍ପାତ ସଚିବ ଅରୁଣା ଶର୍ମା ମୁଖ୍ୟମନ୍ତ୍ରୀଙ୍କୁ ଭେଟିବା ପରେ କହିଛନ୍ତି-“କେନ୍ଦ୍ର ସରକାର ବାର୍ଷିକ ୩୦୦ ମିଲିୟନ୍ ଟନ୍ ଇସ୍ପାତ୍ ଉତ୍ପାଦନ ପାଇଁ ଲକ୍ଷ୍ୟ ରଖିଛନ୍ତି। ଲୁହାପଥର ଅଭାବର ସମାଧାନ ପାଇଁ  ନୂଆ ଖଣି କାର୍ଯ୍ୟକ୍ଷମ କରିବାକୁ ପ୍ରକ୍ରିୟା ତ୍ୱରାନ୍ୱିତ କରାଯାଉଛି।”