ପଲ୍ଲୀରୁ ଦିଲ୍ଲୀ ଯାଏଁ ଭାଇରାଲ ହେଉଛି ନୟାଗଡ଼ ଛାତ୍ରଛାତ୍ରୀଙ୍କ ଭିଡିଓ, ଟ୍ୱିଟ୍‌ କରି ଟ୍ୟାଗ୍‌ କଲେ ଗଡ଼କରୀ

ନୟାଗଡ଼(ଓଡ଼ିଶା ରିପୋର୍ଟର) ନୟାଗଡ଼ ଛାତ୍ରଛାତ୍ରୀଙ୍କ ଦ୍ଵାରା ପ୍ରସ୍ତୁତ ଏକ ଟ୍ରାଫିକ ସଚେତନତା ଭିଡ଼ିଓକୁ ପସନ୍ଦ କରିଛନ୍ତି କେନ୍ଦ୍ର ସଡକ ପରିବହନ ମନ୍ତ୍ରୀ ନିତିନ ଗଡ଼କରୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହାକୁ ପସନ୍ଦ କରିଛନ୍ତି  । ଉଭୟେ ଏନେଇ ଟୁଇଟ କରି ପ୍ରଶଂସା  କରିଛନ୍ତି । ଖାଲି ସେତିକି ନୁହେଁ ଲକ୍ଷ ଲକ୍ଷ ଲୋକେ ଏହି ଭିଡିଓକୁ ଦେଖି ପ୍ରଶଂସା କରିଛନ୍ତି। ଗତବର୍ଷ ଟ୍ରାଫିକ ସଚେତନତାକୁ ନେଇ ନୟାଗଡ଼ ନୋତର ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ ଏକ ସୁନ୍ଦର ଭିଡ଼ିଓ ପ୍ରସ୍ତୁତ କରିଥିଲେ ।

ଏହି ଭିଡ଼ିଓକୁ ବହୁ ଲୋକେ ସେ ସମୟରେ ପସନ୍ଦ ବି କରିଥିଲେ । ତେବେ ଚଳିତ ବର୍ଷ ସମ୍ପ୍ରତି ଟ୍ରାଫିକ ସଚେତନତା ସପ୍ତାହ ଚାଲିଥିବା ବେଳେ ଏହି ଭିଡ଼ିଓଟି ପୁଣି ଭାଇରାଲ ହେଉଛି ।ଯାହାକୁ ଗତକାଲି ଟୁଇଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କେନ୍ଦ୍ରକ୍ୟାବିନେଟର ସଡକ ପରିବହନ ମନ୍ତ୍ରୀ ନିତିନ ଗଡକରୀ । ତେବେ ଛାତ୍ରଛାତ୍ରୀ ଙ୍କ ଦ୍ଵାରା ପ୍ରସ୍ତୁତ ଏହି ଭିଡ଼ିଓଟିକୁ ବହୁତ ଲୋକଙ୍କ ମନକୁ ଛୁଇଁ ପାରିଛି।  ଗତବର୍ଷ ରାଜ୍ୟ ପରିବହନ ବିଭାଗ ପକ୍ଷରୁ ଏହି ଭିଡ଼ିଓ ପ୍ରସ୍ତୁତ ପାଇଁ ଏହି ସ୍କୁଲ ର ସଙ୍ଗୀତ ଶିକ୍ଷକ ଏବଂ ଛାତ୍ରଛାତ୍ରୀଙ୍କୁ ୧ ଲକ୍ଷ ଟଙ୍କାର ଚେକ ପୁରସ୍କାର ମିଳିଥିଲା ।

ଏହି ଆଦର୍ଶ ବିଦ୍ୟାଳୟ ର ସଙ୍ଗୀତ ଶିକ୍ଷକ କୁରେଶ ଚନ୍ଦ୍ର ସାହୁ ଗୀତଟର ସଙ୍ଗୀତ ନିର୍ଦେଶକ ଥିବା ବେଳେ ଭିଡ଼ିଓର ନିର୍ଦେଶନା ମଧ୍ୟ ଦେଇଛନ୍ତି । ବିଦ୍ୟାଳୟର ଶିକ୍ଷକ ବିଭୁ ପ୍ରସାଦ ସାହୁ ଏହି ଗୀତଟି ରଚନା କରିଛନ୍ତି ।ବିଦ୍ୟାଳୟ ର ଛାତ୍ରଛାତ୍ରୀ ମାନେ ଗୀତ ଗାଇବା ସହ ଅଭିନୟ ମଧ୍ୟ କରିଛନ୍ତି । ଗୀତ ମାଧ୍ୟମରେ ସଡକ ସୁରକ୍ଷା ବିଷୟରେ ସମସ୍ତ ନିୟମ ବିଷୟରେ ସୂଚନା ଦେଇ ସଚେତନତା କରିଛନ୍ତି ଛାତ୍ରଛାତ୍ରୀ । ତେବେ ଏଥିପାଇଁ ଅଭିଭାବକ ଏବଂ ସମଗ୍ର ଦେଶରୁ ଛୁଟି ଆସୁଛି ସାବାସିର ସୁଅ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।