ଶଙ୍କରାଚାର୍ଯ୍ୟଙ୍କ ପଟ୍ଟାଭିଷେକ ଉତ୍ସବରେ ଯୋଗଦେଲେ ନେପାଳ ରାଜା: ଉପହାର ଦେଲେ ଏହି ସବୁ ଦ୍ରବ୍ୟ

ପୁରୀ (ଓଡ଼ିଶା ରିପୋର୍ଟର): ଆଜିଠୁ ପୁରୀରେ ଆରମ୍ଭ ହୋଇଛି ଅନ୍ତଃରାଷ୍ଟ୍ରୀୟ ବିଦ୍ୱତ ସଂଗୋଷ୍ଠୀ। ଏଥିରେ ମୁଖ୍ୟ ଅତିଥିଭାବେ ନେପାଳ ନରେଶ ଜ୍ଞାନେନ୍ଦ୍ର ବୀର ବିକ୍ରମ ଶାହା ଯୋଗଦେଇ ଉଦ୍‌ଘାଟନ କରିଥିଲେ। ଜଗଦଗୁରୁ ଶଙ୍କରାଚାର୍ଯ୍ୟ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ମହାରାଜାଙ୍କ ପଟ୍ଟାଭିଷେକର ୨୫ବର୍ଷ ପୂର୍ତ୍ତି ଅବସରରେ ଏହି କାର୍ଯ୍ୟକ୍ରମ ଅନୁଷ୍ଠିତ ହେଉଥିବା ବେଳେ ଏହା ଏକ ଅପୂର୍ବ ସୁଯୋଗ ବୋଲି ନେପାଳ ନରେଶ କହିଛନ୍ତି।

ଆଜି ସମୟ ସକାଳ ପ୍ରାୟ ସାଢେ ୯ଟା। ନେପାଳ ନରେଶ ଜ୍ଞାନେନ୍ଦ୍ର ବୀର ବିକ୍ରମ ଶାହା ଦେବ ପହଞ୍ଚିବା ପରେ ବେଦଧ୍ୱନୀରେ ପ୍ରକମ୍ପିତ ହୋଇଥିଲା ଗୋବର୍ନ୍ଧନ ପୀଠ। ବେଦ ପାଠ ଓ ମନ୍ତ୍ର ଧ୍ୱନୀରେ ସ୍ୱାଗତ କରିଥିଲେ ପୁରୀ ଗଜପତି ମହାରାଜ ଦିବ୍ୟସିଂହ ଦେବ। ପରେ ଜଗଦଗୁରୁ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ମହାରାଜାଙ୍କ ପଟ୍ଟାଭିଷେକର ୨୫ବର୍ଷ ପୂର୍ତ୍ତି ମହୋତ୍ସବର ଅନ୍ତଃରାଷ୍ଟ୍ରୀୟ ବିଦ୍ୱତ ସଂଗୋଷ୍ଠୀକୁ ଉଦ୍‌ଘାଟନ କରିଥିଲେ ନେପାଳ ନରେଶ। ଏହି ଅବସରରେ ନେପାଳ ନରେଶ ଆଣିଥିବା ରୁଦ୍ରାକ୍ଷମାଳା, ଗଣ୍ଡୁକୀନଦୀର ଶାଳଗ୍ରାମ ଓ ସ୍ୱର୍ଣ୍ଣମୁଦ୍ରା ଆଦି ଶଙ୍କରାଚାର୍ଯ୍ୟଙ୍କୁ ପ୍ରଦାନ କରିଥିଲେ। ଶ୍ରୀକ୍ଷେତ୍ର ସହ ନେପାଳର ସମ୍ପର୍କ ସୁଦୀର୍ଘ। ଏଭଳି କାର୍ଯ୍ୟକ୍ରମରେ ଯୋଗଦେଇ ବେଶ ଖୁସି ଅନୁଭବ ବୋଲି ନେପାଳ ନରେଶ କହିଛନ୍ତି।  ଏହାସହ ହିନ୍ଦୁ ଧର୍ମକୁ ବିଶ୍ୱସ୍ତରରେ ବଳିଷ୍ଠ କରିବା ପାଇଁ ଜଗତଗୁରୁ ଶଙ୍କରାଚାର୍ଯ୍ୟଙ୍କ ଦିଗଦର୍ଶନ ଆବଶ୍ୟକ ବୋଲି ନେପାଳ ନରେଶ କହିଛନ୍ତି।

୨ଦିନ ଧରି ହେବାକୁ ଥିବା ଅନ୍ତଃରାଷ୍ଟ୍ରୀୟ ବିଦ୍ୱତ ସଂଗୋଷ୍ଠୀ କାର୍ଯ୍ୟକ୍ରମରେ ନେପାଳ ନରେଶ ସନ୍ଦର୍ଭ ରଖିବେ। ଶେଷ ଦିନର କାର୍ଯ୍ୟକ୍ରମକୁ ଉଦ୍‌ଯାପିତ ମଧ୍ୟ କରିବେ। ଏଥିରେ ଗୋବର୍ନ୍ଧନ ପୀଠର ପୀଠାଧିଶ ଶଙ୍କରାଚାର୍ଯ୍ୟଙ୍କ ସମେତ ଅନେକ ସାଧୁ, ସନ୍ଥ, ପଣ୍ଡିତ ଓ ବୁଦ୍ଧିଜୀବୀମାନେ ଯୋଗଦେଇ ଶ୍ରୀଜଗନ୍ନାଥଙ୍କ ସେବା ପୂଜା ପରମ୍ପରାରେ ଶଙ୍କରାଚାର୍ଯ୍ୟଙ୍କ ଭୂମିକା ଉପରେ ଆଲୋଚନା କରାଯିବ।

ଏହି ଅବସରରେ ଲିଭିଙ୍ଗ ଲିଜେଣ୍ଡ ଅଫ ମିଥିଲା ପୁସ୍ତକ ଉନ୍ମୋଚିତ ହୋଇଥିଲା। ୧୦ତାରିଖରେ ଏହି ମହୋତ୍ସବ ଉଦ୍‌ଯାପିତ ହେବ। ୧୧ ତାରିଖରେ ନେପାଳ ନରେଶ ଶ୍ରୀମନ୍ଦିରକୁ ଯାଇ ଶ୍ରୀଜୀଉଙ୍କର ସେବାପୂଜା କରିବାର କାର୍ଯ୍ୟକ୍ରମ ରହିଛି।