ଓଡ଼ିଶା ଆସିବେ ନେପାଳ ରାଜା

ଭୁବନେଶ୍ୱର: ଓଡ଼ିଶା ଗସ୍ତରେ ଆସିବେ ନେପାଳ ରାଜା ଜ୍ଞାନେନ୍ଦ୍ର ବୀର ବିକ୍ରମ ସାହା ଦେବ। ଆସନ୍ତା ୭ ତାରିଖରେ ରାଜା ଜ୍ଞାନେନ୍ଦ୍ର ଓଡ଼ିଶାରେ ପହଞ୍ଚିବେ। ନିଜର ବ୍ୟକ୍ତିଗତ କାର୍ଯ୍ୟ ତଥା ତୀର୍ଥଯାତ୍ରା ଲାଗି ଆସୁଥିବା ନେପାଳ ରାଜା ୧୨ ତାରିଖ ଯାଏଁ ଓଡ଼ିଶାରେ ରହିବେ। ୭ ତାରିଖରେ ସେ ଜଟଣୀସ୍ଥିତ ମିଶନ ୱାଓ କାଓ ଗୋଶାଳା ଉଦ୍‌ଘାଟନ କରିବାର କାର୍ଯ୍ୟକ୍ରମ ରହିଛି। ଏହାପରେ ସେ ଗୋ ବନ୍ଦାଣ ସହ ଗୋମାତା ଉପାସନା ଓ ପରେ ଏକ ସାଧାରଣ ସଭାକୁ ଉଦ୍‌ବୋଧନ କରିବେ। ୮ ତାରିଖରେ ଲିଙ୍ଗରାଜ ମନ୍ଦିର ଓ ପରେ ସାକ୍ଷୀଗୋପାଳ ମନ୍ଦିର ଯାଇ ଠାକୁରଙ୍କ ଦର୍ଶନ କରିବେ। ୯ ଓ ୧୦ ତାରିଖରେ ସେ ପୁରୀ ଯାଇ ଜଗତଗୁରୁ ଶଙ୍କରାଚାର୍ଯ୍ୟଙ୍କ ପାଟଭିଷେକର ରୌପ୍ୟ ଜୟନ୍ତୀ ଉତ୍ସବରେ ଯୋଗ ଦେବା କାର୍ଯ୍ୟକ୍ରମ ରହିଛି। ସେହିଭଳି ୧୧ ତାରିଖରେ ସେ ଶ୍ରୀମନ୍ଦିର ଯାଇ ଶ୍ରୀଜିଉଙ୍କୁ ଦର୍ଶନ କରି ୧୨ ତାରିଖରେ ସ୍ୱଦେଶ ପ୍ରତ୍ୟାବର୍ତ୍ତନ କରିବେ।