ନିୟମକୁ ଜଳାଞ୍ଜଳି: ଶ୍ରୀଜିଉଙ୍କୁ ଦାନରେ ମିଳିଥିବା ଅଳଙ୍କାର ଲକର୍‌ରେ ରଖାଯିବାକୁ ନେଇ ବିବାଦ

ପୁରୀ (ଓଡ଼ିଶା ରିପୋର୍ଟର): ରତ୍ନଭଣ୍ଡାର ବଦଳରେ ଷ୍ଟେଟ୍‌ବ୍ୟାଙ୍କ ଲକରକୁ କାହିଁକି ଗଲା ଶ୍ରୀଜିଉଙ୍କୁ ଦାନ ସୂତ୍ରରେ ମିଳିଥିବା ଅଳଙ୍କାର ? ଚାବିକୁ ନେଇ ହଟଚମଟ ଥମି ନଥିବାବେଳେ ଶ୍ରୀମନ୍ଦିର ପ୍ରଶାସନର ଏଭଳି ପଦକ୍ଷେପକୁ ନେଇ ମୁଣ୍ଡ ଟେକିଛି ନୂଆ ବିବାଦ। ଭକ୍ତଙ୍କ ପାଖରୁ ଦାନ ସ୍ୱରୂପ ମିଳୁଥିବା ଅଳଙ୍କାର ରତ୍ନଭଣ୍ଡାରରେ ରହିବାର ନିୟମ ଥିଲେ ବି କେଉଁ ପରିସ୍ଥିତିରେ ସବୁ ନିୟମକୁ ଜଳାଞ୍ଜଳି ଦିଆଗଲା ବୋଲି ପ୍ରଶ୍ନ କରିଛି ବିଜେପି।

ଜଗନ୍ନାଥ ମନ୍ଦିର ରୁଲସ୍‌ ୧୯୬୦ର ଧାରା-୭। ଏଥିରେ ସ୍ପଷ୍ଟ ଉଲ୍ଲେଖ ରହିଛି, ଦୈନନ୍ଦିନ ଭକ୍ତଙ୍କଠାରୁ ଦାନ ସୂତ୍ରରେ ଆସୁଥିବା ସୁନା, ରୁପା ଓ ଅନ୍ୟ ଅଳଙ୍କାର ସବୁକୁ ଏକ ରେଜିଷ୍ଟରରେ ଏଣ୍ଟ୍ରି କରାଯାଇ ତାଲିକା କରାଯିବ। ଏସବୁକୁ ରତ୍ନଭଣ୍ଡାରରେ ଅଲଗା କରି ରଖାଯିବ। ପ୍ରତି ମାସରେ ରାଜ୍ୟ ସରକାରଙ୍କୁ ଏହାର ହିସାବ ଦିଆଯିବ। ହେଲେ ଶୃଙ୍ଖଳାକୁ ନେଇ ସୁପ୍ରିମକୋର୍ଟଙ୍କ ଛାଟ ପରେ ଏବେ ଏ ନିୟମକୁ ଜଳାଞ୍ଜଳି ଦିଆଯାଇଥିବା ଅଭିଯୋଗ ହୋଇଛି। ଗତ ଶୁକ୍ରବାର ଦିନ ବିଗତ ୨୩ ବର୍ଷ ଧରି ଭକ୍ତମାନେ ଶ୍ରୀମନ୍ଦିର ହୁଣ୍ଡିରେ ଦେଇଥିବା ଅଳଙ୍କାରକୁ ଏସବିଆଇ ଲକରରେ ରଖାଯାଇଛି। ହେଲେ ଆନ୍‌ଇ ପରିବର୍ତ୍ତନ ହୋଇ ନଥିଲା ବେଳେ ସରକାର ଓ ପ୍ରଶାସନକୁ ଏ ଅଧିକାର କିଏ ଦେଲା ବୋଲି ପ୍ରଶ୍ନ କରିଛି ବିଜେପି ? ପ୍ରଶାସନର ଏ ପଦକ୍ଷେପରୁ ରତ୍ନଭଣ୍ଡାର ଯେ ଆଉ ସୁରକ୍ଷିତ ନାହିଁ, ତାହା ପ୍ରମାଣିତ ହେଉଛି ଏବଂ ରତ୍ନଭଣ୍ଡାରରେ ଆଉ କିଛି ରତ୍ନ ନାହିଁ ବୋଲି ସନ୍ଦେହ ହେଉଛି ବୋଲି ଦଳ ଅଭିଯୋଗ କରିଛି।

ଅନ୍ୟପକ୍ଷରେ ଭକ୍ତଙ୍କଠୁ ଦାନ ସ୍ୱରୂପ ମିଳୁଥିବା ଅଳଙ୍କାରକୁ ନାଜିର ସେକ୍ସନ୍‌ର ଷ୍ଟ୍ରଙ୍ଗ ରୁମ୍‌ରେ ରଖାଯାଉଥିବା ସୂଚନା ଦେଇଛନ୍ତି ଫାଇନାନ୍ସର ଡେପୁଟି ଆଡମିନିଷ୍ଟ୍ରେଟର କିଶୋଣ ଚନ୍ଦ୍ର ପ୍ରଧାନ।

ଏପଟେ ରତ୍ନଭଣ୍ଡାର ଚାବି ହଜିବା ଘଟଣା ପ୍ରତିବାଦରେ ବିଜେପି ଆସନ୍ତାକାଲିଠୁ ରାଜ୍ୟବ୍ୟାପୀ ଆନ୍ଦୋଳନକୁ ଓହ୍ଲାଉଛି। କାଲି ସବୁ ଜିଲ୍ଲା ଓ ସବଡିଭିଜନରେ ଦଳ ବିକ୍ଷୋଭ କରିବ। ୧୨ ତାରିଖରୁ ସପ୍ତାହେ ବ୍ୟାପି ରାଜ୍ୟର ସବୁ ଥାନା ସମ୍ମୁଖରେ ବିକ୍ଷୋଭ ସହ ଏଫ୍ଆଇଆର୍ ଦିଆଯିବ। ଏଥିସହ ସମସ୍ତ ଜଗନ୍ନାଥ ମନ୍ଦିରରରେ ସମୂହ ଦୀପଦାନ କରାଯିବ ଦଳ ପକ୍ଷରୁ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି। ଚାବି ହଜିବା ପ୍ରସଙ୍ଗରେ ବିଚାର ବିଭାଗୀୟ ତଦନ୍ତ ଘୋଷଣା କରି ସରକାର ପୂରା ଘଟଣାରୁ ଦୃଷ୍ଟି ହଟାଇବା ପାଇଁ ହୀନ ପ୍ରୟାସ କରୁଛନ୍ତି ବୋଲି ଅଭିଯୋଗ କରିଛି ବିଜେପି।

ଅନ୍ୟପକ୍ଷରେ ବିଜେପିର ଏହି ଅଭିଯୋଗ ପରେ ଉତ୍ତର ରଖିଛି ବିଜେଡି।