ମତେ ପୋଲିସ୍‌ ଧରିବ ଜାଣିଛି, ହେଲେ ତାଠାରୁ ତୁମେମାନେ ଦୂରେଇ ରୁହ

ଭୁବନେଶ୍ୱର(ଓଡ଼ିଶା ରିପୋର୍ଟର): ‘‘ସେ ଚେଞ୍ଜ ହୋଇଗଲା। ହେଲେ ମୁଁ ବଦଳି ପାରିଲିନି। ମୁଁ ଦୁନିଆ ଛାଡ଼ିବା ଆଗରୁ ସବୁ ପୁଅଙ୍କୁ ଅନୁରୋଧ କରୁଛି- ଏ ଝିଅଠାରୁ ଦୂରେଇ ରୁହନ୍ତୁ।” ନିଜ ଧୋକାବାଜ୍‌ ପ୍ରେମିକା ସମ୍ପର୍କରେ ସୋସିଆଲ୍ ମିଡିଆରେ ଏମିତି କିଛି ଧାଡ଼ି ପୋଷ୍ଟ ହୋଇଛି, ବାଳକୃଷ୍ଣ ନାମଧାରୀ ଜଣେ ବ୍ୟକ୍ତିଙ୍କ ଫେସ୍‌ବୁକ୍‌ ପେଜ୍‌ରେ। ଯାହାକୁ ପଢ଼ି ଲାଗୁଛି ଯୁବକ ଜଣକ ଅତିମାତ୍ରାରେ ଭାଙ୍ଗିପଡ଼ି ଶେଷରେ ପ୍ରେମିକାଙ୍କଠାରୁ ପ୍ରତିଶୋଧ ନେବାକୁ ଯାଇ ଏମିତି ପଦକ୍ଷେପ ନେଇଛନ୍ତି।

ଯୁବକ ଜଣକ ଜଣେ ଫିଲ୍ମ ନିର୍ମାତା ତଥା କଳାକାର ବୋଲି ସୋସିଆଲ୍ ମିଡିଆ ଆକାଉଣ୍ଟରୁ ଜଣାପଡୁଛି। ତାଙ୍କ ପୋଷ୍ଟ ପଢ଼ିଲେ ଲାଗୁଛି, ଭାଇରାଲ ହୋଇଥିବା ଫଟୋରେ ଥିବା ଯୁବତୀ ତାଙ୍କର କୌଣସି ଚଳଚ୍ଚିତ୍ରରେ କାମ କରିଛନ୍ତି। ଏପରିକି ଯୁବତୀ ଜଣଙ୍କ କ୍ୟାରିଅର ଗଢ଼ିବାରେ ମଧ୍ୟ ଏହି ଯୁବକ ଜଣକ ହିଁ ତାଙ୍କୁ ସାହାଯ୍ୟ କରିଛନ୍ତି। ପ୍ରେମିକାଠାରୁ ଧୋକା ଖାଇବା ପରେ ଯୁବକ ଜଣଙ୍କ ଶେଷରେ ନିଜ ହିତାହିତ ଜ୍ଞାନ ହରାଇ ଏଭଳି କରିଛନ୍ତି।

ସେ ଲେଖିଛନ୍ତି- “ମୁଁ ବହୁତ ଚେଷ୍ଟା କରିଛି ତା ଚରିତ୍ର ବଦଳାଇବାକୁ। ହେଲେ ପାରିଲିନି। ଅବଶ୍ୟ ସେ ଗୋଟେ…. ଡ୍ୟାନ୍‌ସର। ଏଣୁ ପ୍ରକୃତି ଛାଡ଼ିବ କେମିତି! ମୁଁ ଭାବିଥିଲି କେମେଡ଼ି କରି ସାରା ଦୁନିଆକୁ ହସେଇବି ବୋଲି। ହେଲେ… ବାରିକ୍‌ ଲାଗି ମୋ ଜୀବନଟା କମେଡ଼ି ହୋଇଗଲା। ନିଜ ଇଜ୍ଜତକୁ ବିକି ଏ ପୋଷ୍ଟ କରିଛି। ପରିସ୍ଥିତି ମତେ ବାଧ୍ୟ କରିଛି ଏମିତି କରିବାକୁ। ନିଜ ବାପା ମା’ଙ୍କ ସ୍ୱପ୍ନ ପୁରା କରିପାରିଲିନି, ଏ ବଦ୍‌ମାସ ଝିଅ ପାଇଁ। ମତେ ସମସ୍ତେ କ୍ଷମା କରିବେ।

ଏମିତି ଲେଖା ଥିବା କ୍ୟାପସନ୍‌ ତଳେ ପୋଷ୍ଟ ହୋଇଛି ପ୍ରାୟ ୫ଟି ‍ଫଟୋ। ଫଟୋଗୁଡ଼ିକ ଦେଖି ଲାଗୁଛି ଯୁବତୀଙ୍କ ଜାଣତରେ ହିଁ ସମସ୍ତ ଫଟୋ ଉଠାଯାଇଛି। ଯୁବକ ଜଣକଙ୍କ ବାହୁ ବନ୍ଧନରେ ଥାଇ ଉଭୟ ଅତି ଅନ୍ତରଙ୍ଗ ଭାବେ ଚୁମ୍ବନ ଦିଆନିଆ ହେଉଛନ୍ତି। ତଥାକଥିତ ପ୍ରେମିକା ଜଣକ ସ୍ୱଳ୍ପ ତଥା ଅତ୍ୟାଧୁନିକ ପୋଷାକ ପିନ୍ଧିଛନ୍ତି। ଲାଗୁଛି ଯେମିତି ପ୍ରଫେସନାଲ ଫଟୋ ଶୁଟ୍‌ ଲାଗି ଏଭଳି ଫଟୋ ଉଠାଯାଇଛି।

ଫଟୋ ନିକଟରେ ଏଭଳି ମଧ୍ୟ ଲେଖାଯାଇଛି ଯେ, “ଏହି ଫଟୋ ପୋଷ୍ଟ କରିବା ପରେ ହୁଏତ ମତେ ପୋଲିସ ବାନ୍ଧିନେବ। ମୁଁ ଗିରଫ ହୋଇପାରେ। ହେଲେ ମୋର ପରବାୟ ନାହିଁ। କାରଣ ମୁଁ ଜାଣିଛି ଆଜିକାଲି ନ୍ୟାୟ ବ୍ୟବସ୍ଥା ଝିଅମାନଙ୍କ ସପକ୍ଷରେ ଯିବ।

ତେବେ ଏହି ଘଟଣାରେ ଏବେସୁଦ୍ଧା ପୋଲିସ ପାଖରେ କୌଣସି ଅଭିଯୋଗ ହୋଇ ନଥିବାରୁ ଏ ଯାଏଁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ସୂଚନାଯୋଗ୍ୟ ଯେ, ରାଜଧାନୀ ଭୁବନେଶ୍ୱରରେ ଗୋଟିକ ପରେ ଗୋଟିଏ ଭାଇରାଲ ଭିଡିଓ ଘଟଣା ଏବେ କମିଶନରେଟ୍‌ ପୋଲିସ ପାଇଁ ଚିନ୍ତାର କାରଣ ହୋଇଥିବା ବେଳେ ଏହି ଘଟଣା ନୂଆ ସମସ୍ୟା ସୃଷ୍ଟି କରିଛି। ଏହା ପୂର୍ବରୁ ୟୁନିଟ୍‌-୮ ଅଞ୍ଚଳର ଜଣେ ଯୁବତୀଙ୍କ ଭିଡିଓ ଭାଇରାଲ ହୋଇଥିଲା। ଏହି ଘଟଣାର ଅଭିଯୁକ୍ତ ସୁଶାନ୍ତ ବେହେରାକୁ ପୋଲିସ୍ ଆଜି ଗିରଫ କରିଛି। ନିକଟରେ ପ୍ରେମିକା ସହ ଅନ୍ତରଙ୍ଗ ମୁହୂର୍ତ୍ତକୁ ଭାଇରାଲ କରି ସେ ଫେରାର ହୋଇଯାଇଥିଲେ। ଥାନାରେ ମାମଲା ପରେ ପୋଲିସ ତାଙ୍କୁ ଜଟଣୀରୁ ଗିରଫ କରିଛି।