ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ କୋଭିଡ୍ ସଂକ୍ରମଣ ମାମଲା କ୍ରମାଗତ ଭାବେ ବୃଦ୍ଧି ପାଉଥିବାବେଳେ ଭୁବନେଶ୍ୱର ମହାନଗର ନିଗମ(ବିଏମସି) ପକ୍ଷରୁ ଅଭିନବ ନିର୍ଦ୍ଦେଶନାମା ଜାରି ହୋଇଛି । ଏଣିକି ମାସ୍କ ପିନ୍ଧିନଥିଲେ ରାଜଧାନୀ ଭୁବନେଶ୍ୱରରେ ଥିବା ସପିଂ ମଲଠୁ ଆରମ୍ଭ କରି ସବୁ ଦୋକାନ, ଏପରିକି ପେଟ୍ରୋଲ ଟାଙ୍କିରେ ମଧ୍ୟ ଜିନିଷ କିମ୍ବା ତେଲ ମିଳିବ ନାହିଁ । ମାସ୍କ ପିନ୍ଧିନଥିବା ଲୋକଙ୍କୁ ପେଟ୍ରୋଲ କିମ୍ବା ଜିନିଷ ବିକ୍ରି ନକରିବା ପାଇଁ ସମ୍ପୃକ୍ତ ପ୍ରତିଷ୍ଠାନର ମାଲିକମାନଙ୍କୁ ଆଜି ବିଏମସି ପକ୍ଷରୁ ନିର୍ଦ୍ଦେଶ ଦିଆଯାଇଛି ।
ବିଏମସି କମିଶନରଙ୍କ ଦ୍ୱାରା ଜାରି ନିର୍ଦ୍ଦେଶନାମା ଅନୁସାରେ, ବିଏମସି ଅଂଚଳ ଭିତରେ ରହୁଥିବା ତଥା ବିଏମସି ଅଂଚଳକୁ ଆସୁଥିବା ସମସ୍ତ ଲୋକ ସର୍ବସାଧାରଣ ସ୍ଥାନରେ ଉଭୟ ପାଟି ଓ ନାକ ଠିକ୍ ଭାବେ ଘୋଡ଼ାଇ ହେଉଥିବା ଭଳି ମାସ୍କ ପିନ୍ଧିବା ଜରୁରୀ । ରାଜଧାନୀରେ ଥିବା ସମସ୍ତ ସପିଂ ମଲ୍ , ଦୋକାନ, ଷ୍ଟୋର ଆଦିର ମାଲିକମାନେ ତାଙ୍କ ପ୍ରତିଷ୍ଠାନ ଭିତରକୁ ବିନା ମାସ୍କରେ କୌଣସି କର୍ମଚାରୀ ଓ ଗ୍ରାହକଙ୍କୁ ପ୍ରବେଶର ଅନୁମତି ଦେବେନି । ମାସ୍କ ପିନ୍ଧିନଥିଲେ କୌଣସି ସାମଗ୍ରୀ ମଧ୍ୟ ସେମାନଙ୍କୁ ବିକ୍ରି କରିବେ ନାହିଁ । ଏସବୁ ପ୍ରତିଷ୍ଠାନର ପ୍ରବେଶ ପଥରେ ‘ନୋ ମାସ୍କ, ନୋ ଏଂଟ୍ରି / ନୋ ମାସ୍କ ନୋ ଗୁଡସ୍ ’ର ସାଇନ୍ ବୋର୍ଡ ସ୍ପଷ୍ଟ ଭାବେ ପ୍ରଦର୍ଶିତ କରିବାକୁ କୁହାଯାଇଛି ।
ସେହିପରି ପେଟ୍ରୋଲ ପମ୍ପଗୁଡ଼ିକରେ ମାସ୍କ ପିନ୍ଧିନଥିବା ଗ୍ରାହକଙ୍କୁ ତେଲ ନଦେବାକୁ ବିଏମସି ନିର୍ଦ୍ଦେଶ ଦେଇଛି । ପେଟ୍ରୋଲ ପମ୍ପ ମାଲିକମାନେ ମଧ୍ୟ ଏନେଇ ସାଇନ୍ ବୋର୍ଡ ମାରିବାକୁ ବିଏମସି ପରାମର୍ଶ ଦେଇଛି ।
ଏସବୁ ବ୍ୟତୀତ ବିଭିନ୍ନ ସରକାରୀ ଅଫିସର ମୁଖ୍ୟ ଓ ଘରୋଇ କମ୍ପାନୀର ସିଇଓ/ମ୍ୟାନେଜର ଆଦିଙ୍କୁ ମଧ୍ୟ ସେମାନଙ୍କ କର୍ମଚାରୀମାନେ ଅଫିସରେ ଥିବାବେଳେ ଯେପରି ସବୁ ସମୟରେ(କେବଳ ଖାଇବା ସମୟକୁ ଛାଡ଼ି) ମାସ୍କ ପିନ୍ଧିବେ ତାହା ସୁନିଶ୍ଚିତ କରାଇବେ ।
ଏହାସହିତ ସାମାଜିକ ଦୂରତ୍ୱ, ହାତ ପରିଷ୍କାର ରଖିବା, ସର୍ବସାଧାରଣରେ ଛେପ ନପକାଇବା ଉପରେ ମଧ୍ୟ ଗୁରୁତ୍ୱ ଦେବାକୁ ବିଏମସି କର୍ତ୍ତୃପକ୍ଷ ପରାମର୍ଶ ଦେଇଛନ୍ତି । ଏସବୁ ନିର୍ଦ୍ଦେଶନାମାକୁ ଉଲ୍ଲଘଂନ କଲେ ଓଡ଼ିଶା କୋଭିଡ-୧୯ ଗାଇଡଲାଇନ୍ ୨୦୨୦ର ବିଭିନ୍ନ ଧାରା ଓ ମ୍ୟୁନିସପାଲଟି ଆକ୍ଟ-୨୦୦୩ର ବିଭିନ୍ନ ପ୍ରାବଧାନରେ ଦଣ୍ଡର ବ୍ୟବସ୍ଥା ରହିଛି ।
ସୂଚନାଯୋଗ୍ୟ, ବିଏମସି ପକ୍ଷରୁ ପୂର୍ବରୁ ମାସ୍କ ପିନ୍ଧିନଥିଲେ ଜୋରିମାନା ଆଦାୟ କରାଯିବ ବୋଲି ଘୋଷଣା ହୋଇଥିଲା ।
BMC has issued the below advisory for all concerned to be cautious & follow appropriate #COVID behaviour like wearing #Mask properly covering nose & mouth, maintaining #SocialDistancing, #HandHygiene.
"No Mask No Entry/No Mask No Goods"#BMCFightsCOVID @CMO_Odisha @IPR_Odisha pic.twitter.com/WtJcWp1dde— BMC (@bmcbbsr) July 16, 2022
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
