ଏଥର ସାଧାରଣତନ୍ତ୍ର ଦିବସ ପରେଡ ଦେଖିପାରିବେନି ସାଧାରଣ ଲୋକ

ଭୁବନେଶ୍ୱର(ଓଡ଼ିଶା ରିପୋର୍ଟର): କୋଭିଡ  କଟକଣା ଭିତରେ ଚଳିତ ବର୍ଷ ପାଳିତ ହେବ ସାଧାରଣତନ୍ତ୍ର ଦିବସ। ଏନେଇ ରାଜ୍ୟ ସରକାରଙ୍କ ପକ୍ଷରୁ ଗାଇଡଲାଇନ୍ ଜାରି କରାଯାଇଛି । ଏନେଇ ସବୁ ଜିଲ୍ଲାପାଳ ଓ ଏସ୍‌ପିଙ୍କୁ ଚିଠି ଲେଖିଛି ଗୃହ ବିଭାଗ ।

ଗାଇଡଲାଇନ୍‌ ଅନୁଯାୟୀ, ସକାଳ ୮ଟା ୩୦ରେ  ମହାତ୍ମା ଗାନ୍ଧୀ ମାର୍ଗରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ମୁଖ୍ୟ ଅତିଥି ଭାବେ ଯୋଗ ଦେଇ ଜାତୀୟ ପତାକା ଉତ୍ତୋଳନ କରିବେ। ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ସମ୍ମାନିତ ଅତିଥି ଭାବେ ଯୋଗ ଦେବେ। ଏହାପରେ  ଜାତୀୟ ସଙ୍ଗୀତ ଗାନ କରାଯିବ । ପରେଡରେ କେବଳ ପୁଲିସ୍‌ ହିଁ ସାମିଲ ହେବେ।

ଚଳିତ ବର୍ଷ ଛାତ୍ରଛାତ୍ରୀ ଓ ଏନସିସି କ୍ୟାଡେଟ୍ ସାମିଲ ହେବେନି। ଗଣତନ୍ତ୍ର ଦିବସ ପରେଡଙ୍କୁ କିନ୍ତୁ ସାଧାରଣ ଜନତାଙ୍କୁ ବାରଣ କରାଯାଇଛି ।  କରୋନା ଯୋଦ୍ଧାଙ୍କ ସମେତ କିଛି ନିର୍ଦ୍ଦିଷ୍ଟ ବ୍ୟକ୍ତିଙ୍କୁ ଇ-ନିମନ୍ତ୍ରଣ ମାଧ୍ୟମରେ ଆମନ୍ତ୍ରୀତ କରାଯିବ।  ସେହିପରି ଉତ୍ସବ ସ୍ଥଳରେ ସାମାଜିକ ଦୂରତ୍ୱ ରକ୍ଷା କରିବା ଏବଂ ମାସ୍କ ବ୍ୟବହାରକୁ ବାଧ୍ୟତାମୂଳକ କରାଯାଇଛି। ସଭା ସ୍ଥଳକୁ ପୂର୍ବରୁ ସାନିଟାଇଜ କରାଯିବା ସହ ଅତିଥିଙ୍କ ନିମନ୍ତେ ବିଭିନ୍ନ ପ୍ରବେଶ ପଥରେ ସାନିଟାଇଜର ରଖାଯିବ।

ରାଜ୍ୟର ସମସ୍ତ ବ୍ଲକ ଓ ପଞ୍ଚାୟତ ସ୍ତରରେ ମଧ୍ୟ ସାଧାରଣତନ୍ତ୍ର ଦିବସ ପାଳନ ନିମନ୍ତେ ଏହି ଗାଇଡ଼ଲାଇନ୍‌ ପାଳନ ନିମନ୍ତେ ନିର୍ଦ୍ଦେଶ ଦିଆଯାଇଛି।

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।