ନବୀନଙ୍କୁ ଚିଠି ଲେଖିଲେ ଓଡ଼ିଶାର ସବୁ ବିଜେପି ସାଂସଦ

ଭୁବନେଶ୍ୱର (ଓଡ଼ିଶା ରିପୋର୍ଟର)  : କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାରେ ଓଡ଼ିଶା ସାମିଲ ହେଉ । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏନେଇ ଚିଠି ଲେଖି ନିବେଦନ କରିଛନ୍ତି ଓଡ଼ିଶାର ସମସ୍ତ ବିଜେପି ସାଂସଦ।

ରାଜ୍ୟରେ ଆୟୁଷ୍ମାନ ଭାରତ- ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଲାଗୁ କରିବାକୁ ସେମାନେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି । ଏହାଦ୍ୱାରା ରାଜ୍ୟବାସୀଙ୍କ ସହ ଦାଦନ ଶ୍ରମିକମାନେ ମଧ୍ୟ ଉପକୃତ ହେବେ ବୋଲି ସେମାନେ ଚିଠିରେ ଉଲ୍ଲେଖ କରିଛନ୍ତି । ଏହି ଚିଠିରେ ଓଡ଼ିଶାର ସମସ୍ତ ୮ଜଣ ବିଜେପି ଲୋକସଭା ସାଂସଦଙ୍କ ସହ ରାଜ୍ୟସଭା ସାଂସଦ ଅଶ୍ୱିନୀ ବୈଷ୍ଣବ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ମନୋନୀତ ସାଂସଦ ରଘୁନାଥ ମହାପାତ୍ର ଓ ସୋନାଲ ମାନସିଂହଙ୍କର ମଧ୍ୟ ସ୍ୱାକ୍ଷର ରହିଛି ।

ଭାରତ ସରକାରଙ୍କ ‘ଆୟୁଷ୍ମାନ ଯୋଜନା’ର ଶୁଭାରମ୍ଭ ପ୍ରାୟ ବର୍ଷେ ପୂର୍ବେ ହୋଇଥିବା ବେଳେ ବହୁ ରାଜ୍ୟ ଏହାକୁ ଲାଗୁ କରିଛନ୍ତି। ହେଲେ ଓଡ଼ିଶା ସରକାର ଏହାକୁ ଲାଗୁ କରିବାକୁ ଇଚ୍ଛୁକ ହେଉ ନ ଥିବାରୁ ରାଜ୍ୟର ବିଜେପି ସାଂସଦମାନେ ମୁଖ୍ୟମନ୍ତ୍ରୀଙ୍କୁ ଏପରି ଭାବେ ନିବେଦନ କରିଛନ୍ତି।  ତେବେ ଆଗକୁ ରାଜ୍ୟ ସରକାର କ’ଣ ପଦକ୍ଷେପ ନେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।