ରାଜ୍ୟ କଂଗ୍ରେସର ଗତି କୁଆଡ଼େ ?

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ବିଜେପୁରରେ କଂଗ୍ରେସ ଅମାନତ ହରାଇବା ପରେ ଚର୍ଚ୍ଚା ହେଉଥିଲା ଦଳ ହୁଏତ ଏଥିରୁ କିଛି ଶିଖିବ ଓ ସଂଗଠିତ ହେବ। କିନ୍ତୁ ଏଆଇସିସି ସଦସ୍ୟତାକୁ ନେଇ ଦଳରେ ଏବେ ବିସ୍ଫୋରକ ସ୍ଥିତି। ତାଲିକାରେ ସ୍ଥାନ ପାଇ ନଥିବା ବିଧାୟକ ଓ ବରିଷ୍ଠ ନେତା ଖୋଲାଖୋଲି ଦଳ ନେତୃତ୍ୱ ବିରୋଧରେ ବିଦ୍ରୋହ ଘୋଷଣା କରିଥିବା ବେଳେ ବିଶୃଙ୍ଖଳାକାରୀଙ୍କ ବିରୋଧରେ ଖୁବ୍ ଶୀଘ୍ର କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ।</p><p>ବିସ୍ଫୋରକ ମୋଡ଼ରେ ରାଜ୍ୟ କଂଗ୍ରେସ। ପିସିସି ସଭାପତିଙ୍କ ବିରୋଧରେ ପୁଣି ବିଷ ଓଗାଳିଛନ୍ତି ତାରାପ୍ରସାଦ ବାହିନୀପତି। ଯିଏ ପିସିସି ସଭାପତିଙ୍କ ଘରେ ଓ ଅଫିସ୍&zwnj;ରେ କାମ କରୁଥିଲେ ତାଙ୍କୁ ଏଆଇସିସି ସଦସ୍ୟତା ମିଳିଥିବା ନେଇ ଅଭିଯୋଗ କରିଛନ୍ତି ତାରା। କେବଳ ସେ ନୁହଁନ୍ତି, ଏଆଇସିସି ସଦସ୍ୟ ତାଲିକାରେ ସ୍ଥାନ ପାଇ ନଥିବା ସମସ୍ତ ୯ ବିଧାୟକ ଅତିମାତ୍ରାରେ କ୍ଷୁବ୍ଧ। ଯେଉଁଭଳି ସ୍ଥିତିରେ ନିର୍ବାଚିତ ପ୍ରତିନିଧିଙ୍କୁ ଏଆଇସିସି ସଦସ୍ୟରୁ ବଞ୍ଚିତ କରାଗଲା ତାକୁ ହଜମ୍ କରିବା ସ୍ଥିତିରେ ନାହାନ୍ତି ଏମାନେ। ଏପରିକି ଏ ବାବଦରେ ବିଧାୟକମାନେ ଏକାଠି ବସି ପରବର୍ତ୍ତି କାର୍ଯ୍ୟପନ୍ଥାର ନିଷ୍ପତ୍ତି ନେବେ ବୋଲି କହିଛନ୍ତି ତାରା। କେବଳ ବିଧାୟକ ନୁହଁନ୍ତି, ଏଆଇସିସି ତାଲିକାରୁ ଉପେକ୍ଷିତ ବରିଷ୍ଠ ନେତାଙ୍କ ଭିତରେ ବି ପ୍ରକାଶ ପାଇଛି ତୀବ୍ର ଅସନ୍ତୋଷ।</p><p>ପ୍ରସାଦଙ୍କ ବିରୋଧରେ ମେଳି ବଢ଼ି ଚାଲିଥିବା ବେଳେ ବିଦ୍ରୋହୀଙ୍କ ବିରୋଧରେ କାର୍ଯ୍ୟାନୁଷ୍ଠାନର ଧମକ ଦେଇଛନ୍ତି ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ। ସେ କହିଛନ୍ତି, &ldquo;ଯେଉଁ ବିଧାୟକମାନେ ବିଜେଡି ସହ ଯୋଗସୂତ୍ର ରଖିଛନ୍ତି ସେମାନେ ଏଭଳି ବିବୃତ୍ତି ଦେଉଛନ୍ତି। ରାହୁଲ ଗାନ୍ଧି ଏମାନଙ୍କ ବିରୋଧରେ ଶୀଘ୍ର ଦୃଢ଼ କାର୍ଯ୍ୟାନୁଷ୍ଠାନ ନେବେ।&rdquo;</p><p>ପଞ୍ଚାୟତ ନିର୍ବାଚନରେ ପରାଜୟ, ବିଜେପୁର ଉପ ନିର୍ବାଚନରେ ଅମାନତ ହରାଇବା ସାଙ୍ଗକୁ ବାରମ୍ବାର ନୂଆଦିଲ୍ଲୀ ଦୌଡ଼ ସତ୍ତ୍ୱେ ପ୍ରସାଦଙ୍କ ଚେୟାର ହଲାଇ ପାରି ନାହାଁନ୍ତି ଅସନ୍ତୁଷ୍ଟ କଂଗ୍ରେସ ନେତା। ଏଭଳି ସ୍ଥିତିରେ ପ୍ରସାଦ ମୁହଁ ଖୋଲୁ ନ ଥିବାବେଳେ ବିଧାୟକମାନେ ଆଗକୁ କେଉଁ ବିସ୍ଫୋରଣ କରୁଛନ୍ତି, ଆଉ ଘର ବଞ୍ଚାଇବାକୁ ଏଆଇସିସି କେଉଁ ପଦକ୍ଷେପ ନେଉଛି, ତା ଉପରେ ସମସ୍ତଙ୍କ ନଜର ରହିଛି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।