ଓଡ଼ିଶା ହେଲା ଭାରତୀୟ ହକି ଦଳର ନୂଆ ସ୍ପନସର୍‌

ଭୁବନେଶ୍ୱର (ଓଡ଼ିଶା ରିପୋର୍ଟର): ଭାରତୀୟ ହକିର ଉଭୟ ପୁରୁଷ ଓ ମହିଳା ଦଳକୁ ମିଳିଛି ନୂଆ ସ୍ପନସର୍‌। ଏହି ନୂଆ ସ୍ପନସର୍‌ ହୋଇଛି ଓଡ଼ିଶା। ଆଗାମୀ ୫ ବର୍ଷ ପାଇଁ ଓଡ଼ିଶା, ଉଭୟ ପୁରୁଷ ଓ ମହିଳା ହକି ଦଳର ପ୍ରାୟୋଜକ ରହିବ। ନୂଆଦିଲ୍ଲୀରେ ଭାରତୀୟ ଟିମ୍‌ର ନୂଆ ଜର୍ସି ଉନ୍ମୋଚନ ଉତ୍ସବରେ ଏହି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ନୂଆ ଜର୍ସିରେ ପ୍ରାୟୋଜକ ହିସାବରେ ଓଡ଼ିଶାର ନାଁ ରହିଛି।

ସ୍ପନସର୍‌ ହେବା ପରେ ଏଣିକି ଓଡ଼ିଶା ଟ୍ୟାଗ୍‌ରେ ପରିଚିତ ହେବ ଭାରତୀୟ ପୁରୁଷ ଓ ମହିଳା ହକି ଟିମ୍। ରାଜ୍ୟରେ କ୍ରୀଡ଼ାର ବିକାଶ ଉଦ୍ୟମ ଅନ୍ତର୍ଗତ ଏହାକୁ ଆଉ ଏକ ବଳିଷ୍ଠ ପଦକ୍ଷେପ ଭାବେ ବିବେଚନା କରାଯାଉଛି। ସେହିପରି ଭାରତୀୟ ହକି ଟିମ୍‌କୁ ସ୍ପନସର କରିବାରେ ଓଡ଼ିଶା ଦେଶର ପ୍ରଥମ ରାଜ୍ୟ ହୋଇଛି। ଆଜି ନୂଆଦିଲ୍ଲୀରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଟିମ୍‌ର ନୂଆ ଜର୍ସି ଉନ୍ମୋଚନ କରିଛନ୍ତି। ଜର୍ସିରେ ଓଡ଼ିଶା- Indias Best Kept Secret  ଲେଖାଯାଇଛି। ଜର୍ସି ଉନ୍ମୋଚନ ଉତ୍ସବରେ ଉଭୟ ମହିଳା ଓ ପୁରୁଷ ଟିମ୍ ଓ ସପୋର୍ଟ ଷ୍ଟାଫ୍, ଏଫ୍ଆଇଏଚ୍ ସଭାପତି ନରିନ୍ଦର ବାତ୍ରା ଓ ପୂର୍ବତନ ହକି ଖେଳାଳି ଏବଂ ବିଶିଷ୍ଟ ବ୍ୟକ୍ତିମାନେ ଯୋଗ ଦେଇଥିଲେ।

ଚାମ୍ପିୟନସ ଟ୍ରଫି ହକି, ଏସିଆନ ଆଥଲେଟିକ୍ସ ଚାମ୍ପୟନସିପ୍ ଓ ତା’ପରେ ହକି ବିଶ୍ୱ ଲିଗ୍। ଗୋଟିକ ପରେ ଗୋଟିଏ ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟ ଆୟୋଜନ କରି ଓଡ଼ିଶା ଏହାର ଦକ୍ଷତା ପ୍ରତିପାଦିତ କରିଛି। ଏହାସହ ନଭେମ୍ବର ୨୮ରୁ କଳିଙ୍ଗ ଷ୍ଟାଡିୟମ୍‌ରେ ଅନୁଷ୍ଠିତ ହେବାକୁ ଯାଉଛି ପୁରୁଷ ହକି ବିଶ୍ୱକପ୍। ତା’ପୂର୍ବରୁ ଓଡ଼ିଶା, ଭାରତୀୟ ହକି ଦଳର ପ୍ରୟୋଜକ ହେବା ଓଡ଼ିଶା ଖେଳାଳିଙ୍କୁ ଅଧିକ ଉତ୍ସାହିତ କରିବ ବୋଲି ଆଶା ପ୍ରକାଶ କରିଛନ୍ତି ଟିମ୍ ଇଣ୍ଡିଆର ପୂର୍ବତନ କ୍ୟାପଟେନ୍ ଦିଲ୍ଲୀପ ତିର୍କୀ।

ସେପଟେ ହକି ବିଶ୍ୱକପ୍‌ରେ ଭାଗ ନେବାକୁ ଭୁବନେଶ୍ୱର ଆସିବ ପାକିସ୍ତାନ ଦଳ। ତ୍ରୟୋଦଶ ଦଳ ଭାବେ ପାକିସ୍ତାନ, ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିଛି।