ମୁନିଗୁଡ଼ା (ନନ୍ଦ କିଶୋର ପଟ୍ଟନାୟକ): ସକାଳୁ ସକାଳୁ ଖଟ ବିକ୍ରି କରିବାକୁ ଯାଉଥିଲେ। ସାଇକେଲ୍ରେ ଖଟର ବାହି ଓ ପୁଆକୁ ବାନ୍ଧି ସେ ଯାଉଥିଲେ। ହେଲେ ବାଟରେ ଅପେକ୍ଷା କରି ରହିଥିଲା ଯମ। ଏକ ତେଲ ଟ୍ୟାଙ୍କର ତାଙ୍କୁ ଧକ୍କା ଦେଇ ସାଇକେଲ୍ ସହିତ କିଛି ବାଟ ଘୋଷାଡ଼ି ନେଇଥିଲା। ତା’ପରେ ଟ୍ୟାଙ୍କରଟି ବି ଓଲଟି ପଡ଼ିଥିଲା। ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା।
ଏ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ରାୟଗଡ଼ା ଜିଲ୍ଲା ମୁନିଗୁଡ଼ା ଥାନା ଅନ୍ତର୍ଗତ ବୁର୍ଜୀଗୁଡ଼ା ନିକଟରେ। ମୃତ ବ୍ୟକ୍ତିଙ୍କ ନାଁ ଯୁଧିଷ୍ଠିର କୁସୁଲିଆ। ତାଙ୍କ ଘର ଅମ୍ୱାଦଳା ଥାନା ଅନ୍ତର୍ଗତ ଖମ୍ୱାରୀଗୁଡ଼ା ଗାଁରେ।
ଦୁର୍ଘଟଣା ପରେ ଯୁଧିଷ୍ଠିରଙ୍କ ପରିବାର ଲୋକେ ଓ ବୁର୍ଜୀଗୁଡ଼ା ଗ୍ରାମବାସୀ ରାସ୍ତାରୋକ କରିଥିଲେ। ମୁନିଗୁଡ଼ା ପୁଲିସ୍ ଓ ତହସିଲଦାର ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ।
ଦୁର୍ଘଟଣା ଘଟାଇବା ପରେ ଟ୍ୟାଙ୍କର ଡ୍ରାଇଭର ଫେରାର ହୋଇଯାଇଛନ୍ତି।