ବାହାଘର ଭୋଜି ଖାଇବାକୁ ଯାଉଥିଲେ, ବାଇକ୍‌ରୁ ଛିଟିକି ପଡ଼ିବା ପରେ ପିଟିଦେଲା ଟ୍ରକ୍‌

ସୋର (ନିରଞ୍ଜନ ବେହେରା): ବାଲେଶ୍ୱର ଜିଲ୍ଲା ସୋର ଥାନା କୁଆମରା ଛକ ନିକଟରେ ଟ୍ରକ୍ ମାଡ଼ି ଯିବାରୁ ଜଣେ ଯୁବକଙ୍କ ମୃତ୍ୟୁ ଘଟିଛି। ତାଙ୍କ ନାଁ ମାନସ ପ୍ରଧାନ (୨୫) ବୋଲି ଜଣାପଡ଼ିଛି। ତାଙ୍କ ଘର ପଶ୍ଚିମବଙ୍ଗରେ। ସେ ସୋରରେ ଏକ ମିକ୍ସଚର ଫ୍ୟାକ୍ଟ୍ରିରେ କାମ କରୁଥିଲେ।

ମାନସ ଆଜି ସନ୍ଧ୍ୟାରେ ବାଇକ୍‌ରେ ଦୁଇ ଜଣ ସାଙ୍ଗଙ୍କ ସହିତ ଏକ ବାହାଘର ଭୋଜି ଖାଇବାକୁ ଯାଉଥିଲେ। କୁଆମରା ଛକ ନିକଟରେ ଏକ ସ୍କୁଟି ସେମାନଙ୍କୁ ଧକ୍କା ଦେଇଥିଲା। ଏହା ପରେ ସେମାନେ ରାସ୍ତାରେ ଛିଟିକି ପଡ଼ିଥିଲେ। ଦୁଇ ଜଣ ରାସ୍ତାକଡ଼ରେ ପଡ଼ିଥିବା ବେଳେ ମାନସ ରାସ୍ତା ମଝିରେ ପଡ଼ିଥିଲେ। ଏହି ସମୟରେ ଦ୍ରୁତଗତିରେ ଯାଉଥିବା ଏକ ଟ୍ରକ୍ ମାନସଙ୍କୁ ପିଟି ଦେଇଥିଲା।

ସ୍ଥାନୀୟ ଲୋକେ ମାନସଙ୍କୁ ଉଦ୍ଧାର କରି ସୋର ଡାକ୍ତରଖାନା ଆଣିଥିଲେ। ତେବେ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।