ଛତ୍ରପୁର(ଆଲୋକ ଗୌଡ): ଆଖି ବୁଜି ସାରିଥିବା ଭାବି ଜଣେ ମହିଳାଙ୍କୁ ମଶାଣିକୁ ନେଇଯାଇଥିଲେ ମାଲ ଭାଇ। ପରିବାର ଲୋକଙ୍କ କାନ୍ଦ ବୋବାଳିରେ ଫାଟି ପଡ଼ୁଥିଲା ଦାଣ୍ଡ ଅଗଣା। ଜୁଇ ବି ସଜଡ଼ା ସରିଥିଲା। ହେଲେ ମୃତଦେହକୁ ଜୁଇ କି ନେବା ବେଳେ ଅଚାନକ ଭାବେ ମହିଳାଜଣକ ବଞ୍ଚିଥିବା ଜାଣିପାରିଥିଲେ ମାଲ ଭାଇ। ତୁରନ୍ତ ଆମ୍ବୁଲାନ୍ସ ଯୋଗେ ତାଙ୍କୁ ମେଡିକାଲ ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହାପରେ ତାଙ୍କ ଶବ ସତ୍କାର ରୀତିନୀତି ଅନୁଯାୟୀ କରିବାକୁ ଚାଲିଛି ପ୍ରସ୍ତୁତି । ଏପରି କିଛି ଘଟଣା ଏବେ ଗଞ୍ଜାମ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ପୋଲସରା ବ୍ଲକ କଣିଆପଲି ଗାଁର ଦୁଃଖୀ ବେହେରା(୪୫)ଙ୍କ ପରିବାର କହିଲେ ତାଙ୍କ ୩ ଭଉଣୀ। ସେମାନେ ସମସ୍ତେ ଅବିବାହିତ ଥିବା ବେଳେ ସରକାରଙ୍କ ତରଫରୁ ମିଳୁଥିବା ୩୫ କେଜି ଚାଉଳ ଓ ୫୦୦ ଟଙ୍କା ହିଁ ସେମାନଙ୍କ ବଞ୍ଚିବାର ଆଶ୍ରା ଥିଲା। ଅନ୍ୟ କିଛି ରୋଜଗାର ନ ଥିବାରୁ ସେମାନେ ଅଧିକାଂଶ ସମୟ ଖାଇବାକୁ ନ ପାଇ ଅନାହାରରେ ରହୁଥିବା ଗାଁ ଲୋକେ କହିଥିଲେ।
ଦୀର୍ଘ ଦିନ ହେଲା ଶଯ୍ୟାଶାୟୀ ହୋଇ ପଡ଼ିଥିବା ଦୁଃଖୀ ଆଜି ଭୋର ପ୍ରାୟ ୪ଟା ବେଳେ ଆଖି ବୁଜିଥିବା ପରିବାର ଲୋକେ ଜାଣିବାକୁ ପାଇଥିଲେ। ଏହାପରେ ଶବ ସତ୍କାର କରିବାକୁ ପଡ଼ୋଶୀ ଶ୍ମଶାନକୁ ନେଇଥିଲେ । ଜୁଇ ସଜଡ଼ା ସରିଥିଲା। ହେଲେ ଦୁଃଖୀଙ୍କୁ ଜୁଇକୁ ଉଠାଉଥିବା ବେଳେ ନାଡ଼ି ଦେଖି ସେ ବଞ୍ଚିଥିବା ଅନୁମାନ କରିଥିଲେ ସାଙ୍ଗରେ ଆସିଥିବା ମାଲ ଭାଇ । ଏହାପରେ ତୁରନ୍ତ ଆମ୍ବୁଲାନ୍ସରେ ତାଙ୍କୁ ନିକଟସ୍ଥ ହସ୍ପିଟାଲ୍କୁ ନିଆଯାଇଥିଲା। ସେଠାରେ କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଫଳରେ ସେଠାରୁ ତାଙ୍କୁ ପୁଣି ମଶାଣିକୁ ଫେରାଇ ନିଆଯାଇଥିଲା।