ଖେଳ କରୁଛନ୍ତି ତୃତୀୟ ମହଲାର ଜଣେ ଦୁର୍ନୀତିଗ୍ରସ୍ତ ଅଣଓଡ଼ିଆ ଅଫିସର?

<p>କେନ୍ଦ୍ରାପଡ଼ା (ଓଡ଼ିଶା ରିପୋର୍ଟର): କେନ୍ଦ୍ରାପଡ଼ା ଜିଲ୍ଲା ମାହାଙ୍ଗାରେ ପୁଣି ତେଜିଲା ପ୍ରତାପ ଜେନା ବନାମ ବୈଜୟନ୍ତ ପଣ୍ଡା କଳି। ସାଂସଦ ବୈଜୟନ୍ତଙ୍କ ଜନକଲ୍ୟାଣ କାର୍ଯ୍ୟକ୍ରମକୁ ଭଣ୍ଡୁର କରିବାକୁ ଚକ୍ରାନ୍ତ ଚଳାଇଛି ବିଜେଡିର ଗୋଟିଏ ଗୋଷ୍ଠୀ। ଆସନ୍ତା ୧୧ ତାରିଖରେ ନିଶ୍ଚିନ୍ତକୋଇଲିରେ ଏକ ପାଣିଟାଙ୍କି ଉଦ୍&zwnj;ଘାଟନ ଉତ୍ସବକୁ ଅନୁମତି ନଦେବାକୁ ସଂପୃକ୍ତ ଗୋଷ୍ଠୀ ଜିଲ୍ଲାପାଳଙ୍କ ନିକଟରେ ଫେରାଦ ହୋଇଛି। କିନ୍ତୁ ଉତ୍ସବ ଆୟୋଜନ ଦାବିରେ ବୈଜୟନ୍ତଙ୍କ ସମର୍ଥକମାନେ, ପାଲଟା ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ତୃତୀୟ ମହଲାର ଜଣେ ଦୁର୍ନୀତିଗ୍ରସ୍ତ ଅଣଓଡ଼ିଆ ଅଫିସର ଚକ୍ରାନ୍ତକାରୀଙ୍କୁ ସୁରକ୍ଷା ଦେଉଥିବା ବୈଜୟନ୍ତଙ୍କ ଅଫିସ ଅଭିଯୋଗ କରିଛି।</p> <p>ସ୍ଥାନୀୟ ନେତାଙ୍କୁ ଉପେକ୍ଷା କରି ସାଂସଦ ପଣ୍ଡା ଏକପାଖିଆ ଭାବେ କାର୍ଯ୍ୟକ୍ରମ ଆୟୋଜନ କରୁଥିବାରୁ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବା ଆଶଙ୍କା ଥିବା ଦର୍ଶାଇ ଏହାକୁ ବାତିଲ କରିଦେବା ଲାଗି ଜିଲ୍ଲାପାଳଙ୍କୁ ଚିଠି ଲେଖିଥିଲେ ନିଶ୍ଚିନ୍ତକୋଇଲି ବ୍ଲକ୍ ବିଜେଡି ସଭାପତି। ତେବେ ପାଣିଟାଙ୍କି ଦ୍ୱାରା ହଜାର ହଜାର ଲୋକ ଉପକୃତ ହେବେ ଓ ଶୃଙ୍ଖଳାର ସହ କାର୍ଯ୍ୟକ୍ରମ ଆୟୋଜନ ଲାଗି ଆଜି ଜିଲ୍ଲାପାଳଙ୍କ ନିକଟରେ ଦାବି କରିଛନ୍ତି ସ୍ଥାନୀୟ ବୁହାଳୋ ସରପଞ୍ଚ ଓ ଜନସାଧାରଣ।</p> <p>ବିଜେଡି ବ୍ଲକ୍ ସଭାପତି ରମାକାନ୍ତ ମହାନ୍ତି କହିଛନ୍ତି- &ldquo;ଦଳ ଭିତରେ ସାଂସଦ ପଣ୍ଡାଙ୍କୁ ବିରୋଧ କରାଯାଇଛି। ସେ ଦଳୀୟ ଫୋରମରେ ଆସି ଆମ ସହିତ ଆଲୋଚନା କରିନଥିବାରୁ କାର୍ଯ୍ୟକ୍ରମରେ ସହଯୋଗ କରିବୁ ନାହିଁ।&rdquo;</p> <p>ବୁହାଳୋ ସରପଞ୍ଚଙ୍କ ପ୍ରତିନିଧି କ୍ଷୀରୋଦ ଦାସ କହିଛନ୍ତି-&ldquo;ଆମ ପଞ୍ଚାୟତରେ ପାନୀୟ ଜଳର ବହୁ ଆବଶ୍ୟକତା ରହିଛି। ରାଜନୈତିକ ଉଦ୍ଦେଶ୍ୟ ରଖି ଏମାନେ ବିରୋଧ କରୁଛନ୍ତି। କିନ୍ତୁ ଆମେ ସାଂସଦଙ୍କୁ ସୁରକ୍ଷା ଦେବୁ। ଏପରିକି ତାଙ୍କୁ ସ୍ୱାଗତ କରିବୁ।&rdquo;</p> <p>ଏପଟେ ନିଶ୍ଚିନ୍ତକୋଇଲି ବ୍ଲକ୍ ବିଜେଡି ପକ୍ଷରୁ ଅଣାଯାଇଥିବା ଅଭିଯୋଗ ଅମୂଳକ ବୋଲି ସାଂସଦ ବୈଜୟନ୍ତ ପଣ୍ଡାଙ୍କ ଅଫିସ୍ ପକ୍ଷରୁ କୁହାଯାଇଛି। ଲୋକାର୍ପଣ ଉତ୍ସବକୁ ଆସିବା ପାଇଁ ସମସ୍ତ ସ୍ଥାନୀୟ ନେତାଙ୍କୁ ଲିଖିତ ଭାବେ ନିମନ୍ତ୍ରଣ କରାଯାଇଥିବା ବୈଜୟନ୍ତଙ୍କ ରାଜନୈତିକ ସଚିବ ଜ୍ୟୋତି ପ୍ରକାଶ ଘୋଷ କହିଛନ୍ତି।</p> <p>ସେ ଆହୁରି କରିଛନ୍ତି- &ldquo;ଏମ୍&zwnj;ପି ଲାଡ୍&zwnj; ଫଣ୍ଡରୁ ପିସି ମିଳୁନଥିବାରୁ କିଛି ସ୍ଥାନୀୟ ନେତା ଅସନ୍ତୁଷ୍ଟ ଥାଇପାରନ୍ତି ବୋଲି ଆଶା କରାଯାଉଛି। ଅନ୍ୟପକ୍ଷରେ ତୃତୀୟ ମହଲାର ଜଣେ ଦୁର୍ନୀତିଗ୍ରସ୍ତ ଅଣଓଡ଼ିଆ ଅଫିସର ଏଭଳି ଅସାମାଜିକ ବ୍ୟକ୍ତିଙ୍କୁ ସୁରକ୍ଷା ଓ ସମର୍ଥନ ଦେଉଛନ୍ତି। ଦଳୀୟ ସଭାପତି ତଥା ମୁଖ୍ୟମନ୍ତ୍ରୀ ସତ୍ୟକୁ ଜାଣି ଦଳ ଓ ଲୋକଙ୍କ ହିତରେ ଉଚିତ୍ ପଦକ୍ଷେପ ନେବେ।&rdquo;</p> <p>ସ୍ଥାନୀୟ ବିଧାୟକ ତଥା ମନ୍ତ୍ରୀ ପ୍ରତାପ ଜେନା କହିଛନ୍ତି- &ldquo;ମାହାଙ୍ଗା ପ୍ରତି ମୋର ଯେତିକି ଦାୟିତ୍ୱ ଅଛି ସାଂସଦଙ୍କର ମଧ୍ୟ ସେତିକି ଦାୟିତ୍ୱ ରହିଛି। ଲୋକଙ୍କ ପ୍ରତି ଯତ୍ନବାନ ନହେଲେ ସେମାନେ ଉତ୍ତର ଦେବେ। ଆମେ ଯେଉଁମାନେ ରାଜନୀତିରେ ଅଛୁ, ସମସ୍ତେ ନିଜର ଦାୟିତ୍ୱ ପ୍ରତି ସତେଚନ ରହିବା ଦରକାର।&rdquo;</p> <p>ରାଜନଗର ଢୋଲମରାରେ ଆଜି ଏକାଦଶ ପାଣିଟାଙ୍କି ଉଦ୍&zwnj;ଘାଟନ କରିବା ଅବସରରେ ବୈଜୟନ୍ତ କହିଛନ୍ତି- &ldquo;ଏଠି ଲୋକେ ମୋ ସହିତ ଅଛନ୍ତି। ଅଫିସର ଅଛନ୍ତି। ତେଣୁ ତା ବିଷୟରେ ମୁଁ କିଛି କହିବାକୁ ଚାହୁଁନି।&rdquo;</p>