ଭୁବନେଶ୍ୱର (ଓଡ଼ିଶା ରିପୋର୍ଟର): ଅବସରର ମାସକ ପୂର୍ବରୁ ଛୁଟିରେ ପଠାଯିବା ପ୍ରସଙ୍ଗ ନେଇ ଓୟୁଏଟି କୁଳପତି ସୁରେନ୍ଦ୍ରନାଥ ପଶୁପାଳକ ଆଣିଛନ୍ତି ଗୁରୁତର ଅଭିଯୋଗ। ସେ ଏଥିପାଇଁ ସିଧାସଳଖ ରାଜ୍ୟପାଳଙ୍କ କାର୍ଯ୍ୟାଳୟ ଉପରେ ଦୋଷ ଲଦିଛନ୍ତି। ଅଭିସନ୍ଧି ରଖି ଏଭଳି କରାଯାଇଥିବା ସେ ଅଭିଯୋଗ କରିଛନ୍ତି।
ପଶୁପାଳକ କହିଛନ୍ତି ଯେ ଏ ସଂପର୍କରେ ସେ କୁଳାଧିପତିଙ୍କୁ ମଧ୍ୟ ଅବଗତ କରିଥିଲେ ବି କିଛି ସୁଫଳ ମିଳି ନଥିଲା।
ସେ କହିଛନ୍ତି, ଯାହାବି ଅଭିଯୋଗ ଆସିଥିଲା ପ୍ରାଥମିକ ସ୍ତରରେ ତା’ର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେଇଥିଲେ ଭଲ ହୋଇଥା’ନ୍ତା। କୌଣସି ପ୍ରକାର ଆର୍ଥିକ ଅନିୟମିତତା ହୋଇନାହିଁ। ନିଯୁକ୍ତିରେ ବି କୌଣସି ଦୁର୍ନୀତି ହୋଇନାହିଁ। କିଛି ଲୋକ ଚକ୍ରାନ୍ତ କରି ତାଙ୍କୁ ବଦନାମ କରିବାକୁ ଚାହୁଁଛନ୍ତି। ସେମାନଙ୍କ କଥା ନଶୁଣିବାରୁ ପ୍ରତିକ୍ରିୟାଶୀଳ ହୋଇ ସେମାନେ ଏଭଳି ଚକ୍ରାନ୍ତ କରିଛନ୍ତି ବୋଲି ପଶୁପାଳକ କହିଛନ୍ତି।