ଭୁବନେଶ୍ୱର(ଓଡ଼ିଶା ରିପୋର୍ଟର):ପିଆଜ ପରେ ଖାଉଟିଙ୍କ ହୋସ୍ ଉଡ଼ାଇଲା ଆଳୁ । ବଢ଼ିଲା ଆଳୁ ଟେନ୍ସନ। ୧୫ ଦିନ ତଳେ କିଲୋ ୧୮-୨୦ ଥିବା ଆଳୁର ଦର ଏବେ ଟପିଲାଣି ୩୦। ରାଜ୍ୟର ନୂଆ ଆଳୁ ଅମଳରେ ବିଳମ୍ବ ଓ ପଶ୍ଚିମବଙ୍ଗରୁ ଆମଦାନୀ କମିବାରୁ ହଠାତ ବୃଦ୍ଧି ପାଇଛି ରୋଷେଇ ଘରର ଏ ମୁଖ୍ୟ ପରିବା ଦର। ଯାହାକୁ ନେଇ ଚିନ୍ତାରେ ଖାଉଟି।
କଟକ ଛତ୍ର ବଜାରରେ ଆଜି ଆଳୁ କିଲୋ ୩୦ ଛୁଇଁଛି। ଏପଟେ ରାଜଧାନୀ ଭୁବନେଶ୍ୱରରେ ବି ସମାନ ଅବସ୍ଥା । ହାଣ୍ଡିଶାଳର ଏ ମୁଖ୍ୟ ପରିବାର ଏ ଭାଉକୁ ଦେଖି ପୁଣି ହରଡ଼ ଘଣାରେ ଖାଉଟି।
ଆଳୁର ନିଅଣ୍ଟିଆ ସ୍ଥିତି ଓ ଚଢା ଦର ରାଜ୍ୟର ଅନ୍ୟ ଅଞ୍ଚଳରେ ବି ଦେଖିବାକୁ ମିଳିଛି। ପଶ୍ଚିମରେ ରାଉରକେଲାରୁ ଦକ୍ଷିଣରେ ବ୍ରହ୍ମପୁର ଯାଏଁ ସବୁଠି ଆଳୁର ଦର ଉପର ମୁହାଁ । ତେବେ ବ୍ୟବସାୟୀଙ୍କ ମତରେ ନିକଟରେ ବର୍ଷା ଯୋଗୁଁ ନୂଆ ଆଳୁ ଖୋଳାରେ ବିଳମ୍ବ ହୋଇଛି। ତେଣୁ ବଜାରକୁ ଯଥେଷ୍ଟ ପରିମାଣର ଆଳୁ ପହଞ୍ଚି ପାରିନି। ଏପଟେ ପଶ୍ଚିମବଙ୍ଗରେ ମଧ୍ୟ ରେଟ୍ ଉଚ୍ଚା ରହିଛି । ଯାହାର ପ୍ରଭାର ଓଡ଼ିଶା ବଜାର ଉପରେ ପଡ଼ିଛି । ତେବେ ୧୫ ଦିନ ଭିତରେ ଦର ସ୍ୱାଭାବିକ୍ ହେବା ଅନୁମାନ କରୁଛନ୍ତି ବ୍ୟବସାୟୀ। ପିଆଜ ଦର ସ୍ୱାଭାବିକ୍ ସ୍ଥିତିକୁ ଆସି ନଥିଲା ବେଳେ ଆଳୁର ଦର ବୃଦ୍ଧି ସାଧାରଣ ଖାଉଟିଓ ଗରିବଗୁରୁବାଙ୍କ ପାଇଁ ବେଡ଼ି ଉପରେ କୋରଡ଼ା ସଦୃଶ ହୋଇଛି।