ଭଦ୍ରକ (ପାର୍ଥ ସାରଥୀ ନାୟକ): କିଛି ଦିନ ତଳେ ଭଦ୍ରକ ଜିଲ୍ଲା ତିହିଡ଼ି ବ୍ଲକ୍ ଭାଟପଡ଼ା ପଞ୍ଚୟାତ କ୍ୱାରେଣ୍ଟାଇନ୍ ସେଣ୍ଟରର ଟିକ୍ଟକ୍ ଭିଡିଓକୁ ନେଇ ଜୋରଦାର ସମାଲୋଚନ ହୋଇଥିଲା। ତେବେ ସେହି କ୍ୱାରେଣ୍ଟାଇନ୍ ସେଣ୍ଟରରେ ଏବେ ଦେଖିବାକୁ ମିଳିଛି ଭିନ୍ନ ଚିତ୍ର। ବାହାର ରାଜ୍ୟରୁ ଆସି ଏଠାରେ କ୍ୱାରେଣ୍ଟାଇନ୍ରେ ରହୁଥିବା ଲୋକେ ଆଉ ଟିକ୍ଟକ୍ କରୁ ନାହାନ୍ତି। ତା’ବଦଳରେ ସେମାନେ ଯୋଗ, ପ୍ରାଣାୟମ ଓ ବ୍ୟାୟାମରେ ମନ ଦେଇଛନ୍ତି। ସବୁଦିନେ ସକାଳେ ଉଠି ଯୋଗ କରୁଛନ୍ତି। ତା’ସହିତ ପ୍ରାଣାୟମ ଓ ବ୍ୟାୟାମ ଆଦି କରୁଛନ୍ତି। ସେହିଭଳି ସନ୍ଧ୍ୟାରେ ଏଠାରେ ପ୍ରବଚନ କାର୍ଯ୍ୟକ୍ରମ ଆୟୋଜିତ ହେଉଛି। ମନକୁ ଶାନ୍ତ ରଖିବା ସହ ସମୟ ଅତିବାହିତ କରିବାକୁ ଅନ୍ତେବାସୀମାନେ ଏଭଳି କରୁଛନ୍ତି। ତେବେ ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏସବୁ କାର୍ଯ୍ୟକ୍ରମ ବେଳେ ସେମାନେ ନିୟମ ଅନୁଯାୟୀ ସାମାଜିକ ଦୂରତା ରକ୍ଷା କରୁଛନ୍ତି।
ସାମ୍ନାକୁ ଆସିଥିବା ଟିକ୍ଟକ୍ ଭିଡିଓ ଗୁଡ଼ିକରେ କେଉଁଥିରେ ସେମାନେ ମେଳି କରି ନାଚୁଥିଲେ ତ ଆଉ କେଉଁଥିରେ ଯାତ୍ରା ଡାଏଲଗ୍ କହି କୋଳାକୋଳି ହୋଇ ପଡ଼ୁଥିଲେ। ଏହି ସବୁ ଭିଡିଓ ଭାଇରାଲ ହେବା ପରେ ଏହାକୁ ବିଭିନ୍ନ ମହଲରେ ଖୁବ୍ ନିନ୍ଦା କରାଯାଇଥିଲା। ଏପରିକି ସେମାନଙ୍କ ବ୍ୟବହାରରେ ଅତିଷ୍ଠ ହୋଇ ୭ ଜଣଙ୍କ ନାଁରେ ଏତଲା ଦେଇଥିଲେ ସ୍ଥାନୀୟ ସରପଞ୍ଚ। ଏଭଳି ଅଭିଯୋଗ ଆସିବା ପରେ ଜିଲ୍ଲା ପ୍ରଶାସନ ସେମାନଙ୍କ କ୍ୱାରେଣ୍ଟାଇନ୍ ଅବଧିକୁ ଏକ ମାସ ପର୍ଯ୍ୟନ୍ତ ବଢ଼ାଇ ଦେଇଥିଲେ।