ବାଲେଶ୍ୱର(ଓଡ଼ିଶା ରିପୋର୍ଟର): ବ୍ୟାଙ୍କକୁ ଗଲେ ଉପଯୁକ୍ତ ସେବା ମିଳୁନି। କର୍ମଚାରୀମାନେ ସବୁବେଳେ ଦୁର୍ବ୍ୟବହାର ପ୍ରଦର୍ଶନ କରୁଛନ୍ତି। ଉପରିସ୍ଥ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ କିଛି ସମାଧାନ କରାଯାଉନି। ନୀଳଗିରି ଗୁଣ୍ଡିଚା ମନ୍ଦିର ପାଖରେ ଥିବା ଷ୍ଟେଟ ବ୍ୟାଙ୍କରେ ସମ୍ମୁଖୀନ ହେଉଥିବା ଏପରି ସମସ୍ୟାର ସମାଧାନ ଦାବି କରି ଆଜି ଆନ୍ଦୋଳନକୁ ଓହ୍ଲାଇଛନ୍ତି ବହୁ ସଂଖ୍ୟାରେ ଗ୍ରାହକ। ସେମାନେ ବିଷ ବୋତଲ ଧରି ଧାରଣାରେ ବସିଥିବା ବେଳେ ବ୍ୟାଙ୍କ କାର୍ଯ୍ୟ ବାଧାପ୍ରାପ୍ତ ହୋଇଥିବା ଜଣାଯାଇଛି।
ଉତ୍ତ୍ୟକ୍ତ ଲୋକେ କର୍ମଚାରୀଙ୍କୁ ଭିତରକୁ ଛାଡ଼ୁ ନ ଥିବାରୁ ବ୍ୟାଙ୍କ ବନ୍ଦ ରହିଛି। ପୁଲିସ୍ ଓ ଉପରିସ୍ଥ ଅଧିକାରୀ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା ଜାରି ରଖିଥିଲେ ମଧ୍ୟ କୌଣସି ସମାଧାନର ବାଟ ବାହାରି ପାରି ନ ଥିବା ଜଣାଯାଇଛି।