ଦ୍ୱିତୀୟ ଈଶ୍ୱରଙ୍କୁ ଝୁରିଲା ପୂରା ଗାଁ, ଝରିଲା ବିଦାୟୀ ଅଶ୍ରୁ  

ନବରଙ୍ଗପୁର(ସନ୍ତୋଷ ପଲାଇ): ଡାକ୍ତରବାବୁ ଏଣିକି ପରଦେଶୀ ହୋଇଯିବେ। ଆଉ ଆମ ଗାଁରେ ତାଙ୍କ ପାଦ ପଡିବନି। ଏଇ କଥା ଭାବି ସମସ୍ତେ କାନ୍ଦୁଥିଲେ। କିଏ ତାଙ୍କୁ କୁଣ୍ଢାଇ ଭୋ ଭୋ କାନ୍ଦୁଥିଲା ତ ପୁଣି କିଏ ଥରଥର ହାତରେ ଡାକ୍ତରବାବୁଙ୍କ ସହ ଉଠାଉଥିଲା ସେଲ୍ଫି। ଏମିତି ଆତ୍ମୀୟପଣ ଦେଖି ଖୋଦ୍‌ ଡାକ୍ତରବାବୁ ଜଣକ ବି ନିଜର କୋହ ସମ୍ଭାଳି ପାରି ନ ଥିଲେ। ଆଖିରୁ ଲୁହ ପୋଛୁ ପୋଛୁ ସେ ବି ଅନ୍ୟମାନଙ୍କ ସହ ମନେ ମନେ ଭାଙ୍ଗି ପଡିଥିଲେ। ଆଉ ଗଲା ବେଳକୁ ଏମିତି ଭଲପାଇବା ପାଇଁ ହାତ ଯୋଡି ସମସ୍ତଙ୍କୁ ପ୍ରଣିପାତ କରିବାର ଦୃଶ୍ୟ ଥିଲା ବେଶ୍‌ ମର୍ମସ୍ପର୍ଶୀ। ଆଉ ଏହି ଦୃଶ୍ୟ ସୂଚାଇ ଦେଇଥିଲା ମଣିଷ ପଣିଆ ଏବେ ବି ବଞ୍ଚିଛି ବୋଲି।

ବାଣ ଫୁଟୁଥିଲା, ବାଜା ବି ବାଜୁଥିଲା। ପୂରା ପଟୁଆର ମାଡ଼ି ଚାଲିଥିଲା ଆଗକୁ ଆଗକୁ। କାର, ବାଇକ୍‌, ସାଇକେଲ ଆରୋହୀଙ୍କ ସହ ଚାଲିଚାଲି ଯାଉଥିଲେ ଲୋକେ। ଲୋକେ ନୁହେଁ ତ ପୂରା ଯେମିତି ତେନ୍ତୁଳିଖୁଣ୍ଟି ବ୍ଲକ। ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଭାରପ୍ରାପ୍ତ ଅଧିକାରୀ ଯୁବ ଡାକ୍ତର କିଶୋର ଦାଶଙ୍କ ପାଇଁ ଥିଲା ଏହି ଶୋଭାଯାତ୍ରା। ଡାକ୍ତରବାବୁ ଉଚ୍ଚଶିକ୍ଷା କରିବାକୁ ବିଦେଶ ଯିବେ। ଆଉ ସେଇଥିପାଇଁ ଆଜି ସେ ନବରଙ୍ଗପୁରରୁ ଭୁବନେଶ୍ୱର ଫେରୁଥିଲେ। ଏ କଥା ଶୁଣି ସତେ ଯେମିତି ଏହି ଅଞ୍ଚଳର ଲୋକଙ୍କ ମୁଣ୍ଡରେ ଆକାଶ ଖସି ପଡିଥିଲା। କାରଣ କିଶୋର ଖାଲି ଡାକ୍ତର ନ ଥିଲେ। ସେ ଥିଲେ ଏହି ଅଞ୍ଚଳ ପାଇଁ ଦେବଦୂତ। ସୁଖ ଦୁଃଖରେ ଲୋକଙ୍କ ସାଥୀ ହେବା ସହ ମାଗଣାରେ ଚିକିତ୍ସା କରାଇ ସେ ପାଲଟି ଯାଇଥିଲେ ସମସ୍ତଙ୍କ ପ୍ରିୟ। ଆଉ ନିଜ ପ୍ରିୟ ଡାକ୍ତରବାବୁଙ୍କୁ ଏଠୁ ଯାଉଛନ୍ତି ଶୁଣି ସମସ୍ତଙ୍କ ଆଖିରୁ ଝରି ଆସିଥିଲା ଲୁହ।

ଏଠାରେ ଚାକିରି କାରିବା ବେଳେ ଡାକ୍ତର ଦାସ ଡାକ୍ତରଖାନା ସଂସ୍କାର କାର୍ଯ୍ୟରେ ନିଜକୁ ସାମିଲ କରିଥିଲେ। ଓଟିରେ ଏସି ଲଗାଇବା, ଡାକ୍ତରଖାନା ସମ୍ମୁଖରେ ବଗିଚା କରିବା ଭଳି କାର୍ଯ୍ୟ ମଧ୍ୟ କରିଥିଲେ । ଖାଲି ସେତିକି ନୁହେଁ ଆପତକାଳୀନ ସ୍ଥିତିରେ ରୋଗୀଙ୍କୁ ମାଗଣାରେ ଚିକିତ୍ସା ମଧ୍ୟ କରାଇଛନ୍ତି। ଆଉ ଖାସ୍‌ ସେଇଥିପାଇଁ ହସି ହସି କଥା କହୁଥିବା ଏହି ଡାକ୍ତର ବାବୁଙ୍କୁ ଆଜି ଝୁରୁଛି ତେନ୍ତୁଳିଖୁଣ୍ଟି।

ସୂଚନାଯୋଗ୍ୟ, ଭୁବନେଶ୍ୱର ଉପକଣ୍ଠ କୋଳଥିଆ ବାସିନ୍ଦା କୈଳାସ ଚନ୍ଦ୍ର ଦାଶ ଏବଂ ରଜନୀମାଳା ଦାଶଙ୍କ ସୁପୁତ୍ର ହେଉଛନ୍ତି ଡାକ୍ତର କିଶୋର। ଡାକ୍ତରୀ ପଢା ସରିବା ପରେ ୨୦୧୦ରେ ସେ ତେନ୍ତୁଳିଖୁଣ୍ଟି ସିଏଚ୍‌ସିରେ ଡାକ୍ତର ଭାବେ ଯୋଗଦିଅନ୍ତି । ରହଣୀ କାଳ ମଧ୍ୟରେ ବଦଳାଇ ଦିଅନ୍ତି ଡାକ୍ତରଖାନାର ରୂପରେଖ । ନିଜ ରୁମ୍ ବଦଳରେ ଡେଲିଭରୀ ରୁମ, ଅପରେସନ୍ ଥିଏଟର, ଲେବର ରୁମ୍‌ରେ ଶୀତତାପ ନିୟନ୍ତ୍ରଣ ବ୍ୟବସ୍ଥା କରନ୍ତି । ମେଡ଼ିକାଲ ପରିସରରେ ବୃକ୍ଷରୋପଣ ସହ ସ୍ୱାସ୍ଥ୍ୟକର ପରିବେଶ ପାଇଁ ଗଠନ ମୂଳକ ପଦକ୍ଷେପ ନିଅନ୍ତି। ସବୁଠୁ ବଡ଼କଥା ହେଲା ଦିନରାତି ଯେକୌଣସି ମୁହୂର୍ତ୍ତରେ ବି ସେ ଦେଇ ଆସୁଥିଲେ ନିଃସ୍ୱାର୍ଥପର ସେବା।