ଯୁକ୍ତଦୁଇ ବିଜ୍ଞାନ ପରୀକ୍ଷା ଫଳ ପ୍ରକାଶ: ୭୬.୯୮% ପାସ୍‌

ଭୁବନେଶ୍ୱର(ଓଡ଼ିଶା ରିପୋର୍ଟର): ଉଚ୍ଚ ମାଧ୍ୟମିକ ଶିକ୍ଷା ପରିଷଦ(ସିଏଚ୍‌ଏସଇ) ଦ୍ୱାରା ପରିଚାଳିତ ଯୁକ୍ତ ଦୁଇ ବିଜ୍ଞାନ ବିଭାଗ ପରୀକ୍ଷା ଫଳ ଆଜି ପ୍ରକାଶ ପାଇଛି। ପୂର୍ବାହ୍ନ ୧୧ଟାରେ ପରିଷଦ କାର୍ଯ୍ୟାଳୟରେ  ବିଦ୍ୟାୟଳ ଓ ଗଣଶିକ୍ଷା ମନ୍ତ୍ରୀ ବଦ୍ରି ନାରାୟଣ ପାତ୍ରଙ୍କ ଉପସ୍ଥିତିରେ ଫଳ ଘୋଷଣା କରାଯାଇଛି।

ଚଳିତ ବର୍ଷ ପାସ୍ ହାର ୭୬.୯୮% ରହିଛି। ବିଜ୍ଞାନରେ ପରୀକ୍ଷା ଦେଇଥିବା ମୋଟ  ୯୫,୦୯୬ ଜଣ ପିଲା ପରୀକ୍ଷା ଦେଇଥିବା ବେଳେ ୭୩,୨୧୧ ଜଣ କୃତକାର୍ଯ୍ୟ ହୋଇଛନ୍ତି। ସେମାନଙ୍କ ମଧ୍ୟରୁ ପ୍ରଥମ ଶ୍ରେଣୀରେ ୧୯, ୫୬୧ ପିଲା ପାସ୍ କରିଛନ୍ତି। ଦ୍ୱିତୀୟ ଶ୍ରେଣୀରେ ୨୪, ୧୬୪ ପିଲା ପାସ୍ କରିଥିବା ବେଳେ ତୃତୀୟ ଶ୍ରେଣୀରେ ୨୮,୯୬୮ ପିଲା ପାସ୍ କରିଛନ୍ତି।

ନୟାଗଡ଼ ଜିଲ୍ଲାରେ ପାସ୍ ହାର ସର୍ବାଧିକ ୯୨.୨୩ % ରହିଥିବା ବେଳେ ଗଜପତିରେ ପାସ୍ ହାର ସର୍ବନିମ୍ନ ୪୩.୪୩% ରହିଛି। ମୋଟ ୪୧ ଛାତ୍ରଛାତ୍ରୀ ୯୦%ରୁ ଅଧିକ ନମ୍ବର ରଖିଛନ୍ତି। ସେମାନଙ୍କ ମଧ୍ୟରେ ୨୮ ଛାତ୍ର ଓ ୧୩ ଛାତ୍ରୀ ଅଛନ୍ତି।

ରେଗୁଲାର ଓ ଏକ୍ସ-ରେଗୁଲାର ସାମଗ୍ରିକ ଭାବେ ହାରାହାରି ପରୀକ୍ଷା ଫଳାଫଳରେ ଛାତ୍ରୀମାନେ ଆଗରେ ଅଛନ୍ତି। ମୋଟ ୭୮.୮୮ ପ୍ରତିଶତ ଛାତ୍ରୀ ପାସ୍ କରିଥିବା ବେଳେ ୭୫.୬୯ ପ୍ରତିଶତ ଛାତ୍ର ପାସ୍ କରିଛନ୍ତି।

କେଉଁଠି ପାଇବେ ରେଜଲ୍ଟ?: ଛାତ୍ରଛାତ୍ରୀ‘www.chseodisha.nic.inwww.orissaresults.nic.in’ ୱେବସାଇଟ୍‌ ମାଧ୍ୟମରେ  ସେମାନଙ୍କ ଫଳ ଜାଣିପାରିବେ। ଗତଥର  ପରି ଏଥର ମଧ୍ୟ ରେଜଲ୍ଟ ଜାଣିବା ଲାଗି ପରୀକ୍ଷାର୍ଥୀଙ୍କୁ ରୋଲ ନମ୍ବର ଏବଂ ରେଜିଷ୍ଟେସନ ନମ୍ବରର ଆବଶ୍ୟକତା ରହିଛି। ୱେବସାଇଟରେ  ଉଭୟ ନମ୍ବର ଦାଖଲ ନ କଲେ ପରୀକ୍ଷା ଫଳ ବାହାରିବ ନାହିଁ ବୋଲି ପରିଷଦ ପକ୍ଷରୁ କୁହାଯାଇଛି।

କେତେ ପିଲା ପରୀକ୍ଷା ଦେଇଥିଲେ?: ଗତ ମାର୍ଚ୍ଚ୫ରୁ୨୯ ତାରିଖ ପର୍ଯ୍ୟନ୍ତ ୧୧୦୪ଟି ପରୀକ୍ଷା କେନ୍ଦ୍ରରେ ୧୫୦୦ରୁ ଅଧିକ ଯୁକ୍ତ ଦୁଇ କଲେଜର ୩,୬୫,୮୨୬ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ବିଜ୍ଞାନ ବିଭାଗରେ ୯୫,୦୯୬ ଜଣ ପରୀକ୍ଷା ଦେଇଥିବା ବେଳେ କଳା ବିଭାଗରେ ୨,୩୩,୯୭୮ ଏବଂ ବାଣିଜ୍ୟ ବିଭାଗରେ  ୨୭,୪୪୭ ଛାତ୍ରଛାତ୍ରୀ ପରୀକ୍ଷା ଦେଇଥିଲେ।

ଗତବର୍ଷ କେତେ ପାସ୍ କରିଥିଲେ?: ୨୦୧୭ ମସିହାରେ  ବିଜ୍ଞାନ ବିଭାଗ ପରୀକ୍ଷା ଫଳ ମେ’୧୨ରେ ପ୍ରକାଶ ପାଇଥିଲା। ପାସ୍‌ହାର୮୧.୧୧ ପ୍ରତିଶତ ଥିଲା।

କେବେ ବାହାରିବ କଳା ଓ ବାଣିଜ୍ୟ ପରୀକ୍ଷା ଫଳ?: ବାଣିଜ୍ୟ, କଳା ଏବଂ ଧନ୍ଦାମୂଳକ ଶିକ୍ଷା ବିଭାଗର ପରୀକ୍ଷା ଫଳ ଜୁନ୍‌ ପ୍ରଥମ ସପ୍ତାହ ସୁଦ୍ଧା ବାହାରିବ ବୋଲି ଜଣାପଡ଼ିଛି।