ବଲାଙ୍ଗିର(ଓଡ଼ିଶା ରିପୋର୍ଟର) ସୁରକ୍ଷା ବଳୟରେ ବିଜେଡିର ବାହୁବଳୀ ବିଧାୟକ ସରୋଜ ମେହେର। ଯନ୍ତ୍ରୀଙ୍କୁ ଯନ୍ତ୍ରଣା ଅଭିଯୋଗରେ ସଂଗୀନ ଦଫା ଲାଗିଥିଲେ ବି ଆଗକୁ ବଢୁନି ପୁଲିସ। କେବଳ ଦଫା ନୁହେଁ, ବିଭାଗୀୟ ଅଧିକାରୀଙ୍କ ଠାରୁ ପକ୍କା ପ୍ରମାଣ ବି ପାଇଛନ୍ତି ଜିଲ୍ଲାପାଳ । ଏହାପରେ ବି, ନା ତାଙ୍କୁ ଗିରଫ କରାଯାଉଛି, ନା ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉଛି ସରକାରୀ ଦଳ । ଘଟଣାକୁ ୫ ଦିନ ବିତିଯାଇଥିଲେ ବି ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉନଥିବାରୁ ଭୟ ଆଉ ଆଶଙ୍କାରେ ରହିଛନ୍ତି ପରିବାର ସଦସ୍ୟ । ସେପଟେ ବିଭିନ୍ନ ସଂଗଠନ ପକ୍ଷରୁ ମଧ୍ୟ ଅସନ୍ତୋଷ ତୀବ୍ର ହେବାରେ ଲାଗିଛି ।
ଜୁନ୍ ୫, ସମୟ ପ୍ରାୟ ୩ଟା । ଗମ୍ଭାରୀ ଗାଁର ନିର୍ମାଣାଧିନ ରାସ୍ତାରେ ନିମ୍ନମାନର କାମ ହେଉଥିବା ଦର୍ଶାଇ ସର୍ବସାଧାରଣରେ କନିଷ୍ଠ ଯନ୍ତ୍ରୀଙ୍କୁ ଦଣ୍ଡବିଧାନ କରିଥିଲେ ବିଧାୟକ ସରୋଜ ମେହେର । ୫ ମିନିଟ୍ରେ ଶହେ ଥର ଉଠ୍ବସ୍ ହେବାକୁ ନିର୍ଦ୍ଦେଶ ଦେଇଥିଲେ ଯନ୍ତ୍ରୀ ଜୟକାନ୍ତ ଶବରଙ୍କୁ। ଘଟଣାକୁ ଇତିମଧ୍ୟରେ ବିତିଗଲାଣି ୫ ଦିନ । ଥାନାରେ ପତ୍ନୀଙ୍କ ଏତଲା ଆଧାରରେ ମାମଲା ବି ରୁଜୁ ହୋଇଛି। ହେଲେ ସରୋଜଙ୍କ ପାଖରେ ପହଞ୍ଚିପାରୁନି ପୁଲିସ। ଫଳରେ ଭୟ ଆଉ ଆତଙ୍କରେ ଥିବା ପରିବାର ସଦସ୍ୟ ପାଟଣାଗଡ଼ ଛାଡ଼ି ଗାଁକୁ ଫେରିଛନ୍ତି । ଘଟଣାପରଠୁ ଜୟକାନ୍ତ କାର୍ଯ୍ୟରେ ବି ଯୋଗଦେଇନାହାଁନ୍ତି । ସେପଟେ ବିଧାୟକଙ୍କ ଏଭଳି ବେଆଇନ କାର୍ଯ୍ୟକୁ ବିରୋଧ କରି ଜିଲ୍ଲା ଯନ୍ତ୍ରୀ ସଂଘ ୩ ଦିନ ହେଲା କାର୍ଯ୍ୟବନ୍ଦ ଆନ୍ଦୋଳନ ଜାରି ରଖିଥିବାବେଳେ ଓବିସି ସଂଘ ବି ଘଟଣାକୁ ନିନ୍ଦା କରିଛି । ଅପରପକ୍ଷେ ବେଲପଡ଼ା ଥାନାର ଦ୍ୱାରସ୍ଥ ହୋଇ ବଲାଙ୍ଗିର ଜିଲ୍ଲା ଆଦିବାସୀ ସଂଘ ବିଧାୟକଙ୍କ ଗିରଫ ଦାବି କରିଛି ।
ଏପଟେ କନିଷ୍ଠ ଯନ୍ତ୍ରୀ ଜୟକାନ୍ତଙ୍କୁ ଉଠ୍ବସ୍ ଘଟଣାର ପକ୍କା ପ୍ରମାଣ ପାଇଛନ୍ତି ଜିଲ୍ଲାପାଳ। ନିମ୍ନମାନର ରାସ୍ତା କାମ ହେଉଥିବାରୁ ବିଧାୟକ ସରୋଜ ମେହେର କନିଷ୍ଠ ଯନ୍ତ୍ରୀ ଜୟକାନ୍ତଙ୍କୁ ସର୍ବସାଧାରଣରେ ଦଣ୍ଡିତ କରିଛନ୍ତି ବୋଲି ସ୍ପଷ୍ଟ କରିଛି ପ୍ରଶାସନ । ଏହାବ୍ୟତୀତ ବିଧାୟକ ବାଧ୍ୟ କରିବାରୁ ପିଡବ୍ଲୁଡିର କାର୍ଯ୍ୟନିର୍ବାହୀ ଯନ୍ତ୍ରୀ ସଂପୃକ୍ତ କନିଷ୍ଠ ଯନ୍ତ୍ରୀଙ୍କୁ ସର୍ବସାଧାରଣରେ ଓ ବିଭାଗୀୟ ଅଧିକାରୀଙ୍କ ସାମ୍ନାରେ ଚାପୁଡ଼ା ମାରିଥିବା ଉପଜିଲ୍ଲାପାଳ ଓ ତହସିଲଦାରଙ୍କ ରିପୋର୍ଟରେ ଦର୍ଶାଯାଇଛି । ରିପୋର୍ଟକୁ ରାଜ୍ୟ ସରକାରଙ୍କୁ ପଠାଇ ଦିଆଯାଇଥିବା ଜିଲ୍ଲାପାଳ କହିଛନ୍ତି ।
ତେବେ ବିଧାୟକଙ୍କ ବିରୋଧରେ ଏତେ ସବୁ ପ୍ରମାଣ ଓ ଏସ୍ସି/ଏସ୍ଟି ଧାରା ୩ ଅନୁଯାୟୀ ସଂଗୀନ ମାମଲା ସହ ୮ଟି ଦଫା ସତ୍ତ୍ୱେ କାହିଁକି ଗିରଫ କରୁନି ପୋଲିସ ? ଏତଲାର ୪ ଦିନ ପରେ ବି ବିଧାୟକଙ୍କ ପ୍ରତି ଏତେ ଦରଦ କାହିଁକି ? ସେନେଇ ନାନା ପ୍ରଶ୍ନ ଉଠୁଥିବାବେଳେ ପୁଲିସ କିନ୍ତୁ ମୁହଁ ଖୋଲିବାକୁ ନାରାଜ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
