କୋରାପୁଟ(ସୂର୍ଯ୍ୟ ପଣ୍ଡା): ହରିଆଣା ଚାଲାଣ ହୋଇଥାଆନ୍ତା। କୌଣସି ସୂତ୍ରରୁ ଖବର ପାଇ ଅଚାନକ ପୁଲିସ ଚଢ଼ଉ କରି ୯ କ୍ୱିଣ୍ଟାଲ୍ ୨୧ କେଜି ଗଞ୍ଜେଇ ଜବତ କରିଛି। ଏଥିସହିତ ଟ୍ରକ୍, ପିକ୍ଅପ୍ ଭେନ ଓ ୟାମା ବାଇକ ଜବତ କରିଛି। ଏହି ଘଟଣାରେ ସେମିଳିଗୁଡ଼ା ଥାନା ପୁଲିସ ଜଣକୁ ଅଟକ ରଖି ପଚରାଉଚରା କରୁଛି।
କୋରାପୁଟ ଜିଲ୍ଲା ସେମିଳିଗୁଡାଠାରୁ ୬ କିମି ଦୂର କୋକ୍ରିଗୁଡା-ପାକଝୋଲା ରାସ୍ତାରେ ଗତକାଲି ବିଳମ୍ବିତ ରାତିରେ ଗାଡ଼ିରେ ଗଞ୍ଜେ ଲୋଡିଂ ହେଉଥିଲା। ଏ ସମ୍ପର୍କରେ ପୁଲିସ ଜାଣିପାରି ଅଚାନକ ଚଢ଼ଉ କରିଥିଲା। ପୁଲିସକୁ ଦେଖି ଗଞ୍ଜେଇ ମାଫିଆମାନେ ଅନ୍ଧାରର ସୁଯୋଗ ନେଇ ଚମ୍ପଟ ମାରିଥିଲେ। ତେବେ ଜଣକୁ ମାଡ଼ି ବସିଥିଲା ପୁଲିସ। ତା’ ମାଧ୍ୟମରେ ଅଭିଯୁକ୍ତଙ୍କ ଧରିବାକୁ ପୁଲିସ ଉଦ୍ୟମ ଜାରି ରଖିଛି।
ଅଭିଯୁକ୍ତମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ସେମିଳିଗୁଡା ଥାନା ଅଧିକାରୀ ଧିରେନ ବେହେରା କହିଛନ୍ତି।