ଜଳେଶ୍ୱର/ବଣାଇ (ଓଡ଼ିଶା ରିପୋର୍ଟର): ଚାଷୀଙ୍କୁ ସ୍ୱାବଲମ୍ବୀ କରିବା ପାଇଁ ରାଜ୍ୟ ସରକାର 'କାଳିଆ' ଯୋଜନା ଘୋଷଣା କରିଛନ୍ତି। ଜାନୁଆରୀ ୧୦ ତାରିଖ ସୁଦ୍ଧା ଚାଷୀମାନେ ନିଜ ପଞ୍ଚାୟତରେ ଆବେଦନ କରିପାରିବେ। ସେଥିପାଇଁ ଚାଷୀମାନେ ପ୍ରତିଦିନ ସକାଳେ ଅଫିସରେ ପହଞ୍ଚୁଛନ୍ତି। ମାତ୍ର ସେମାନଙ୍କୁ 'କାଳିଆ' ଫର୍ମ ମିଳୁନାହିଁ। ଆଉ ଯେଉଁଠି ଫର୍ମ ମିଳୁଛି, ତାକୁ ପୂରଣ କରି ଦେବା ପରେ ଚାଷୀଙ୍କୁ ରସିଦ ମିଳୁନି। ଯାହାଫଳରେ ଏହି ଯୋଜନାକୁ ନେଇ ଚାଷୀଙ୍କ ମନରେ ସନ୍ଦେହ ସୃଷ୍ଟି ହେବାରେ ଲାଗିଛି। ଏହାକୁ ନେଇ ଆଜି ବାଲେଶ୍ୱର ଜିଲ୍ଲା ରେମୁଣା, ଜଳେଶ୍ୱର, ଜଗତସିଂହପୁର ଜିଲ୍ଲାର ବାଲିକୁଦା ଓ ରଘୁନାଥପୁର ଏବଂ ସୁନ୍ଦରଗଡ଼ ଜିଲ୍ଲା ବଣାଇ ବ୍ଲକରେ କେତେକ ପଞ୍ଚାୟତରେ ଉତ୍ତେଜନା ଦେଖାଦେଇଛି। ବଣାଇ ରଜାମୁଣ୍ଡାରେ ସ୍ଥାନୀୟ ଲୋକଙ୍କ ରାସ୍ତା ଅବରୋଧ କରିଥିବା ଜଣାପଡ଼ିଛି।
ଆଜି ଭୋଗରାଇ ବ୍ଲକ ଗୁଣୁସାଗର, ନହରା ଓ କମର୍ଦ୍ଦା ପଞ୍ଚାୟତର ଚାଷୀମାନେ କାଳିଆ ଯୋଜନାରେ ଫର୍ମ ପାଇଁ ପଞ୍ଚାୟତ ଅଫିସରେ ପହଞ୍ଚିଥିଲେ। ଫର୍ମ ପୂରଣ କରି ପଞ୍ଚାୟତ ନୋଡାଲ ଅଫିସରଙ୍କ ପାଖରେ ଜମା ବି କଲେ। ହେଲେ ନୋଡାଲ ଅଧିକାରୀ ସେମାନଙ୍କୁ ରିସିଟ୍ ଦେଲେନାହିଁ। ଫଳରେ ଚାଷୀମାନେ ପଞ୍ଚାୟତ ଅଫିସରେ ହୋ-ହଲ୍ଲା କରିଥିଲେ। ରିସିଟ୍ ଦେବାକୁ ଚାଷୀମାନେ ଦାବି କରିଥିଲେ।
ରେମୁଣା ବ୍ଲକ କଲ୍ୟାଣପୁର ପଞ୍ଚାୟତରେ କାଳିଆ ଯୋଜନାରେ ଫର୍ମ ପାଇଁ ଚାଷୀମାନେ ପଞ୍ଚାୟତ ଅଫିସରେ ପହଞ୍ଚିଥିଲେ। ମାତ୍ର ଆବଶ୍ୟକଠାରୁ କମ୍ ଫର୍ମ ଆସିଥିବାରୁ ଚାଷୀ ଫର୍ମ ପାଇନଥିଲେ। ଫଳରେ କିଛି ସମୟ ପାଇଁ ପଞ୍ଚାୟତ ଅଫିସରେ ପାଟିତୁଣ୍ଡ ହୋଇଥିଲା।
ସମାନ ଚିତ୍ର ଜତସିଂହପୁର ଜିଲ୍ଲା ଇଚ୍ଛାପୁର ଓ ଏରଡଙ୍ଗ ପଞ୍ଚାୟତରେ ଦେଖିବାକୁ ମିଳିଥିଲା। ଆବଶ୍ୟକତାଠାରୁ କମ୍ ଫର୍ମ ମିଳିବାରୁ ପଞ୍ଚାୟତ ଅଫିସରେ ପାଟିତୁଣ୍ଡ ହୋଇଥିଲା। ଏପରିକି ଏରଡଙ୍ଗ ପଞ୍ଚାୟତର ଚାଷୀମାନେ ରାସ୍ତାରୋକ କରିଥିଲେ।
କାଳିଆ ଯୋଜନାରେ ଭାଗ ଚାଷୀ ଓ ଭୂମିହୀନମାନେ ମଧ୍ୟ ସାମିଲ୍ ହୋଇପାରିବେ ବୋଲି ସରକାର କହିଥିଲେ। ମାତ୍ର ସରକାରଙ୍କ ଗାଇଡ୍ଲାଇନ୍ ଅନୁସାରେ ଭୂମିହୀନମାନେ ସ୍ଥାନୀୟ ଅରଆଇଙ୍କଠାରୁ ପ୍ରମାଣପତ୍ର ଆଣିବେ ଓ ଭାଗ ଚାଷୀମାନେ ଜମି ମାଲିକଙ୍କଠାରୁ ଲିଖିତ ଆକାରରେ ଆଣିବେ। କିନ୍ତୁ ଏହା ସମ୍ଭବପର ହେଉନାହିଁ। ମାତ୍ର ଆର୍ଆଇ ଚିହ୍ନଟ କରି ପ୍ରମାଣ ପତ୍ର ଦେଉନାହାନ୍ତି। ଜମି ମାଲିକ ମଧ୍ୟ ଲେଖିକି ଦେଉନାହାନ୍ତି। ଯାହାଫଳରେ ଭାଗ ଚାଷୀ ଓ ଭୂମିହୀନମାନେ ହତାଶ ହୋଇଛନ୍ତି।
https://youtu.be/OMYDQchD-mM