ଶଙ୍କରାଚାର୍ଯ୍ୟଙ୍କ ପଟ୍ଟାଭିଷେକ ଉତ୍ସବରେ ଯୋଗଦେବେ ନେପାଳ ରାଜା

ପୁରୀ(ଓଡ଼ିଶା ରିପୋର୍ଟର): ପୁରୀ ଶଙ୍କରାଚାର୍ଯ୍ୟ ତଥା ଗୋବର୍ଦ୍ଧନ ପୀଠର ମୁଖ୍ୟ ସ୍ୱମୀ ନିଶ୍ଚଳାନନ୍ଦ ସରସ୍ୱତୀଙ୍କ ପଟ୍ଟାଭିଷେକକୁ ୨୫ ବର୍ଷ ପୂରଣ ହୋଇଛି। ଏହି ଅବସରରେ ଆସନ୍ତା ୯ ଓ ୧୦ ତାରିଖ ଦୁଇ ଦିନ ଧରି ପୁରୀରେ ଅନ୍ତରାଷ୍ଟ୍ରୀୟ ବିଦ୍ୱତ ସଂଗୋଷ୍ଠୀ ଆଲୋଚନାଚକ୍ର ହେବ। ଏଥିରେ ସନାତନ ଧର୍ମ ଓ ଶ୍ରୀଜଗନ୍ନାଥଙ୍କ ସେବା ପୂଜାରେ ଶଙ୍କରାଚାର୍ଯ୍ୟଙ୍କ ଭୂମିକା ଏବଂ ବିଶ୍ୱକୁ ତାଙ୍କର ଅବଦାନ ସଂପର୍କରେ ଆଲୋଚନା ହେବ। ଏହି ଆଲୋଚନାଚକ୍ରକୁ ଉଦ୍‌ଘାଟନ କରିବେ ନେପାଳର ରାଜା ଜ୍ଞାନେନ୍ଦ୍ର ବୀର ବିକ୍ରମ ଶାହା ଦେବ। ଏଥିପାଇଁ ଆସନ୍ତାକାଲି ସେ ଭୁବନେଶ୍ୱରରେ ପହଞ୍ଚିବେ। ଆଲୋଚନାଚକ୍ରରେ ନେପାଳ ରାଜା ଏକ ସନ୍ଦର୍ଭ ମଧ୍ୟ ଉପସ୍ଥାପନ କରିବେ।

ଶ୍ରୀମନ୍ଦିର ସହିତ ନେପାଳ ରାଜାଙ୍କ ନିବିଡ଼ ସଂପର୍କ ରହିଛି। ଏପରିକି ରତ୍ନସିଂହାସନ ଉପରେ ଚଢ଼ି ସେ ଆରତୀ ଓ ବନ୍ଦାପନା କରିବାର ବିଧି ରହିଛି। ଶ୍ରୀଜଗନ୍ନାଥଙ୍କ ଶ୍ରୀଅଙ୍ଗକୁ ସ୍ପର୍ଶ କରି ସେ ଭେଟ ଦେବାର ପରମ୍ପରା ମଧ୍ୟ ରହିଛି। ୧୧ ତାରିଖରେ ନେପାଳ ରାଜା ଶ୍ରୀଜିଉଙ୍କୁ ଦର୍ଶନ କରିବେ। ସେହି ଦିନ ନୀତିକାନ୍ତିକୁ ଶୃଙ୍ଖଳିତ କରିବାକୁ ଛତିଶା ନିଯୋଗ ବୈଠକରେ ନିଷ୍ପତ୍ତି ହୋଇଛି। ରାତ୍ରି ୩ଟାରୁ ଦ୍ୱାରଫିଟା ହେବ। ଦିନ ସାଢ଼େ ୯ଟା ସୁଦ୍ଧା ଭୋଗମଣ୍ଡପ ଶେଷ ହେବା ପରେ ଶ୍ରୀମନ୍ଦିରକୁ ଶୋଧ କରାଯିବ। ସକାଳ ସାଢ଼େ ୯ଟାରୁ ସାଢ଼େ ୧୨ଟା ଯାଏଁ ସାଧାରଣ ଭକ୍ତଙ୍କ ଦର୍ଶନ ବନ୍ଦ ରହିବ।

ନଥିପତ୍ରରୁ ଜଣାଯାଏ ଯେ, ପ୍ରଥମ ଥର ପାଇଁ ନେପାଳର ରାଜା ମହେନ୍ଦ୍ର ବୀର ବିକ୍ରମ ଶାହା ଦେବ ୧୯୬୫ରୁ ମହାରାଣୀଙ୍କ ସହ ଶ୍ରୀମନ୍ଦିର ଆସି ମହାପ୍ରଭୁଙ୍କ ପୂଜାର୍ଚ୍ଚନା କରିଥିଲେ।