‘ଶ୍ରୀଜଗନ୍ନାଥ ମନ୍ଦିର କାରଖାନା ନୁହେଁ, ବଂଶଗତ ସେବା ପରମ୍ପରା ରକ୍ଷା ହେବା ଆବଶ୍ୟକ’

ପୁରୀ(ମଧୁସୂଦନ ମିଶ୍ର): “ଶ୍ରୀଜଗନ୍ନାଥ ମନ୍ଦିର କୌଣସି କାରଖାନା ନୁହେଁ। ଏଠାରେ ବଂଶଗତ ସେବା ପରମ୍ପରା ରକ୍ଷା ହେବା ଆବଶ୍ୟକ। ସେବା ପରମ୍ପରା ବ୍ୟବସ୍ଥିତ ଢଙ୍ଗରେ ହେବା ଉଚିତ୍।” ଗୁରୁବାର ପୁରୀ ଗୋବର୍ଦ୍ଧନ ମଠରେ ଅନୁଷ୍ଠିତ ଗୁରୁତ୍ୱପୂର୍ଣ୍ଣ ବୈଠକରେ ଶଙ୍କରାଚାର୍ଯ୍ୟ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ଏକଥା କହିଛନ୍ତି।

ସେ କହିଥିଲେ,“ଜଗନ୍ନାଥ ମନ୍ଦିର ଗାନ୍ଧିଜୀଙ୍କ ସମାଧିର ରୂପ ଧାରଣ ନକରୁ। ସେବାୟତଙ୍କୁ ଆର୍ଥିକ ସଙ୍କଟରୁ ରକ୍ଷା କରିବା କଥା ଚିନ୍ତା କରାଯାଉ। ସେବାୟତଙ୍କ ଲାଗି ଶିକ୍ଷା ସଂସ୍କାର ପ୍ରକଳ୍ପ କଥା ଚିନ୍ତା କରାଯାଉ। ନ୍ୟାୟଧୀଶଙ୍କ ନିକଟରେ ବଂଶଗତ ସେବାର ସବୁ ତଥ୍ୟ ଉପସ୍ଥାପନ କରିବାର ଆବଶ୍ୟକତା ରହିଛି।”

puri

ସେହିପରି ବୈଠକ ଶେଷରେ ଗଜପତି ମହାରାଜ ଦିବ୍ୟସିଂହ ଦେବ କହିଥିଲେ,“ଏହି ସମସ୍ୟାର ସମାଧାନ ଲାଗି ସବୁ ସେବାୟତ ଏକଜୁଟ ହେବା ଆବଶ୍ୟକ। ଏକ ଲିଗାଲ୍‌ ସେଲ୍ ଗଠନ କରିବାର ଆବଶ୍ୟକତା ରହିଛି। ଆଇନ ସଂପର୍କିତ ଜ୍ଞାନ ଥିବା ଅଭିଜ୍ଞ ସେବାୟତଙ୍କୁ ନେଇ ଏହି ସେଲ୍ ଗଠନ ହେଉ।”

ଏହି ବୈଠକରେ ଗଜପତି ମହାରାଜା ଦିବ୍ୟସିଂହ ଦେବଙ୍କ ସମେତ ବହୁ ବରିଷ୍ଠ ସେବାୟତ ଏବଂ ଛତିଶା ନିଯୋଗ ପ୍ରତିନିଧି ଯୋଗ ଦେଇଥିଲେ।

ସେହିପରି ପାରାଦୀପରେ ଏକ ପ୍ରବଚନ କାର୍ଯ୍ୟକ୍ରମରେ ବାବା ବଳିଆ କହିଛନ୍ତି ଯେ ଶ୍ରୀମନ୍ଦିରରେ ପାରମ୍ପରିକ ସେବା ଉଚ୍ଛେଦ ହେବା ଉଚିତ୍‌ ନୁହେଁ। ତେବେ ଏହା ଶୃଙ୍ଖଳିତ ଭାବେ ହେବା ଆବଶ୍ୟକ।

This website uses cookies to improve your experience. We'll assume you're ok with this, but you can opt-out if you wish. AcceptRead More