ଡାହାଣୀ ସଜାଇଲା ଦାରିଦ୍ର୍ୟ: ୪ ବର୍ଷର ପୁଅକୁ ଝୁଲାଇ ଝୁଲିପଡ଼ିଲା ମା’!

ରାୟଗଡ଼ା (ମନୋଜ ପାତ୍ର): ୬ ମାସ ତଳେ ସ୍ୱାମୀଙ୍କୁ ଛଡ଼ାଇ ନେଇଥିଲା ମହାମାରୀ କରୋନା। ସ୍ୱାମୀଙ୍କ ପରେ ପରେ ଅଫେରା ରାସ୍ତାରେ ଚାଲିଯାଇଥିଲେ ଶ୍ୱଶୂର। ଦୁଇ ଜଣ ରୋଜଗାରିଆଙ୍କୁ ହରାଇବା ପରେ ଦାରିଦ୍ର୍ୟ ଭିତରେ ଘାଣ୍ଟି ହେଉଥିଲେ ପି. ଦିବ୍ୟ। ଶେଷରେ ୪ ବର୍ଷର ପୁଅକୁ ଝୁଲାଇ ଦେଇ ନିଜେ ଝୁଲି ପଡ଼ିଲେ ପି.ଦିବ୍ୟ! ଆଜି ଏପରି ଲୋମଟାଙ୍କୁରା ଦୃଶ୍ୟ ରାୟଗଡା ଜିଲ୍ଲାରେ ଘଟିଛି।

୬ ମାସ ତଳେ କରୋନାରେ ଆକ୍ରାନ୍ତ ହୋଇ ପି. ଦିବ୍ୟଙ୍କ ସ୍ୱାମୀ ପି.ଶ୍ରୀନୁଙ୍କ ମୃତ୍ୟୁ ଘଟିଥିଲା। ସ୍ୱାମୀଙ୍କ ମୃତ୍ୟୁର ମାସକ ପରେ ଶ୍ୱଶୂରଙ୍କ ମୃତ୍ୟୁ ଘଟିଥିଲା। ଏବେ ପି.ଦିବ୍ୟ, ତାଙ୍କର ୪ ବର୍ଷର ପୁଅ ପି.ସାଇ ଓ ଶାଶୁ ରହୁଥିଲେ। ଦୁଇ ଦୁଇ ଜଣ ରୋଜଗାରିଆଙ୍କୁ ପି.ଦିବ୍ୟ ଓ ତାଙ୍କ ଶାଶୁ ଭାଙ୍ଗି ପଡ଼ିଥିଲେ। ନାନା ଆର୍ଥିକ ଅନଟନ ଦେଇଗତି କରୁଥିଲେ। ଯାହାକୁ ନେଇ ଦିବ୍ୟ ବିବ୍ରତ ଥିଲେ।

ଶନିବାର ଅପରାହ୍ନରେ ଦିବ୍ୟଙ୍କ ଶାଶୁ କୌଣସି କାମରେ ବାହାରକୁ ଯାଇଥିଲେ। ଘରେ ଦିବ୍ୟ ଓ ତାଙ୍କୁ ପୁଅ ଥିଲେ। ଶାଶୁଙ୍କ ଅନୁପସ୍ଥିତିରେ ନିଜର ଜନ୍ମକଲା ପୁଅକୁ ପ୍ରଥମେ ଝୁଲାଇ ଦେଇଥିଲେ। ପରେ ଶାଢ଼ୀରେ ନିଜେ ଝୁଲି ପଡ଼ିଥିଲେ। କାମରୁ ଫେରି ବୋହୂ ଓ ନାତିଙ୍କ ମୃତଦେହ ଝୁଲୁଥିବା ଦେଖି ଶାଶୁ ପୁଲିସକୁ ଖବର ଦେଇଥିଲେ। ମାଜିଷ୍ଟ୍ରେଟ୍‌ଙ୍କ ଉପସ୍ଥିତିରେ ଚାନ୍ଦିଲି ପୁଲିସ ଓ ସାଇଣ୍ଟିକ୍‌ଫିକ୍‌ ଟିମ୍‌ ଘଟଣାର ତଦନ୍ତ ଆରମ୍ଭ କରିଛି। ଆତ୍ମହତ୍ୟାର ପ୍ରକୃତ କାରଣ ଜଣାପଡ଼ି ନାହିଁ। ପ୍ରାଥମିକ ଅନୁସନ୍ଧାନରୁ ଦାରିଦ୍ର୍ୟତା କାରଣରୁ ସେ ଆତ୍ମହତ୍ୟା କରିଥିବା ଜଣାପଡ଼ିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।