ଅଲିଭ ରିଡେଲଙ୍କ ପ୍ରଜନନ ଆରମ୍ଭ: ମାଛଧରାରେ ଲାଗିଲା ୭ ମାସ କଟକଣା

<p>ପୁରୀ/ପାରାଦୀପ (ଓଡ଼ିଶା ରିପୋର୍ଟର): ଅଲିଭ ରିଡଲେ କଇଁଛଙ୍କ ପ୍ରଜନନ ପ୍ରକ୍ରିୟା ଆରମ୍ଭ ହୋଇଛି। ତେଣୁ ଏହି କଇଁଛଙ୍କ ସୁରକ୍ଷା ପାଇଁ ଆଜିଠାରୁ ମାଛଧରା ଉପରେ କଟକଣା ଲାଗୁ କରାଯାଇଛି। ଏହି କଟକଣା ୭ ମାସ ପାଇଁ ଲାଗୁ କରାଯାଇଛି। ତେବେ ଏପରି କଟକଣାକୁ ନେଇ ଚିନ୍ତାରେ ପଡିଯାଇଛନ୍ତି ମତ୍ସ୍ୟଜୀବୀ ପରିବାର। କଟକଣା ଯୋଗୁଁ ସେମାନଙ୍କ ବ୍ୟବସାୟ ପ୍ରଭାବିତ ହେବା ବୋଲି ସେମାନେ ଅଭିଯୋଗ କରିବା ସହ ସହାୟତା ଯୋଗାଇ ଦେବାକୁ ଦାବି କରିଛନ୍ତି।</p> <p>ଓଡିଶାର ଦେବୀ, ବରୁଣେଇ ଓ ଋଷିକୁଲ୍ୟା ମୁହାଣରେ କଇଁଛମାନେ ଅଣ୍ଡାଦାନ ଦେବାକୁ ଆସୁଥିବାରୁ ଏସବୁ ଜାଗାରେ ମାଛ ମାରିବା ନିଷେଧ କରାଯାଇଛି। ଫଳରେ ପାରାଦୀପରେ ପ୍ରାୟ ୫୦ ହଜାର ମତ୍ସ୍ୟଜୀବୀ ପ୍ରଭାବିତ ହେବାର ଆଶଙ୍କା ଦେଖାଦେଇଛି। ପାରାଦୀପରେ ପ୍ରାୟ ୬୫୦ ଟ୍ରଲର ଓ ୩୦୦ ଯନ୍ତ୍ରଚାଳିତ ଡଙ୍ଗା ଦ୍ୱାରା ମତ୍ସ୍ୟଜୀବୀମାନେ ସମୁଦ୍ରରେ ମାଛମାରି ପରିବାର ପ୍ରତିପୋଷଣ କରିଥାନ୍ତି। ପ୍ରତିବର୍ଷ ମାଛ ଉତ୍ପାଦନ ସମୟରେ ଏଭଳି କଟକଣା ଯୋଗୁଁ ଅନେକ କ୍ଷତି ହେଉଥିବା ସେମାନେ ଅଭିଯୋଗ କରିଛନ୍ତି।</p> <p>ସେହିପରି ପୁରୀ ଜିଲ୍ଲାର ବାଲି ହରଚଣ୍ଡୀଠାରୁ ଅସ୍ତରଙ୍ଗ ଦେବୀନାସୀ ପର୍ଯ୍ୟନ୍ତ ଉପକୂଳରୁ ୫ କିମି ଯାଏଁ ମୋଟର ଚାଳିତ ଡଙ୍ଗାରେ ମାଛ ମାରିବା ନିଷିଦ୍ଧ କରାଯାଇଛି। ଏଥିସହ ଦେବୀ ନଦୀ ମୁହାଣର ୨୦ କିମି ଭିତରେ ଟ୍ରଲର ଓ ମୋଟର ଚାଳିତ ଡଙ୍ଗା ବ୍ୟବହାର ଉପରେ ମଧ୍ୟ କଟକଣା ଜାରି କରାଯାଇଛି। ବେଆଇନ ମାଛଧରା ରୋକିବା ପାଇଁ ବନବିଭାଗ, ସାମୁଦ୍ରିକ ମତ୍ସ୍ୟ ବିଭାଗ, ମେରାଇନ ପୋଲିସ ଓ କୋଷ୍ଟ ଗାର୍ଡ ଦ୍ୱାରା ମିଳିତ ପାଟ୍ରୋଲିଂ କରାଯାଉଛି।</p> <p>କଟକଣାକୁ ନେଇ କ&rsquo;ଣ କହୁଛନ୍ତି ମତ୍ସ୍ୟଜୀବୀ ଶୁଣନ୍ତୁ ଏହି ଭିଡିଓରେ।</p>