ଆରଟିଓଙ୍କୁ ଚାପିଦେଲା ହାଇଓ୍ୱା

ଯାଜପୁର (ଓଡ଼ିଶା ରିପୋର୍ଟର): ରାସ୍ତାରେ ଗାଡ଼ି ଯାଞ୍ଚ ବେଳେ ଆରଟିଓଙ୍କୁ ଚାପିଦେଲା ହାଇଓ୍ୱା। ଘଟଣା ଘଟିଛି  ଯାଜପୁର ଜିଲ୍ଲା କୋରେଇ ଥାନା ଅନ୍ତର୍ଗତ ନୂଆପଦା ଛକ ଦେଇ ଯାଇଥିବା ୨୧୫ ନମ୍ବର ଜାତୀୟ ରାଜପଥରେ। ଗତକାଲି ରାତିରେ ଘଟିଛି ଏଭଳି ଅଭାବନୀୟ ଘଟଣା।

ଯାଜପୁର ଟାଉନ୍‌ର ଭାରପ୍ରାପ୍ତ ଆରଟିଓ ମନୋଜ ବେହେରା ଓ ତାଙ୍କର ସହକର୍ମୀମାନେ ଗାଡ଼ି ଯାଞ୍ଚ କରୁଥିଲେ। ଏହି ସମୟରେ ଏକ ଚିପ୍ସ ବୋଝେଇ ହାଇୱା ଗାଡି ବ୍ୟାକ୍ କରୁଥିବା ବେଳେ ମନୋଜଙ୍କୁ ଚାପି ଦେଇଥିଲା। ଘଟଣାସ୍ଥଳରେ ଆରଟିଓଙ୍କର ମୃତ୍ୟୁ ଘଟିଥିଲା।  ଯାଜପୁର ଏସ୍‌ପି ଏବଂ ଯାଜପୁର ରୋଡ୍‌ ଏସ୍‌ଡିପିଓଙ୍କ ସମେତ ତିନିଟି ଥାନାର ଅଧିକାରୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ।  ମୃତଦେହକୁ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଡାକ୍ତରଖାନାକୁ ପଠାଯାଇଛି। ହାଇଓ୍ୱାର ଡ୍ରାଇଭରକୁ ଅଟକ ରଖାଯାଇଛି। କୋରେଇ ପୋଲିସ ଘଟଣାର ତଦନ୍ତ ଚଳାଇଛି।