କୁନ୍ଦୁଲି ଘଟଣାର ତଦନ୍ତ ପାଇଁ ପୀଡ଼ିତାଙ୍କ ଗାଁକୁ ଗଲେ ଅନୁସୂଚିତ ଜାତି କମିଶନ ସଦସ୍ୟ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): କୁନ୍ଦୁଲି ଦୁଷ୍କର୍ମ ଓ ପୀଡିତାଙ୍କ ଆତ୍ମହତ୍ୟା ଘଟଣାର ଖୋଳତାଡ଼ ପାଇଁ ଅନୁସୂଚିତ ଜାତି କମିଶନଙ୍କ ୩ ଜଣିଆ ପ୍ରତିନିଧି ଦଳ କୁନ୍ଦୁଲି ଯାଇଛି। ପ୍ରତିନିଧି ଦଳ ସରଜମିନ୍ ତଦନ୍ତ କରିବା ସହ ପୀଡ଼ିତାଙ୍କ ପରିବାର ସଦସ୍ୟଙ୍କୁ ସାକ୍ଷାତ କରିବ। କୁନ୍ଦୁଲିରୁ ଫେରିବା ପରେ ପ୍ରତିନିଧି ଦଳ ମୁଖ୍ୟ ଶାସନ ସଚିବ, ଡିଜିପି ଓ ଗୃହ ସଚିବଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଏହି ଘଟଣାରେ ଯେ କେହି ଦୋଷୀ ହୋଇଥିବ ତା&rsquo; ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ପ୍ରୟାସ କରାଯିବ ବୋଲି ପ୍ରତିନିଧି ଦଳରେ ଆସିଥିବା ଅନୁସୂଚୀତ ଜାତି କମିଶନ ସଦସ୍ୟ ଯୋଗେନ୍ଦ୍ର ପାଶଓ୍ୱାନ କହିଛନ୍ତି।</p> <p>ଅନ୍ୟପକ୍ଷରେ, ପୋଲିସ, କ୍ରାଇମବ୍ରାଞ୍ଚ, ଏସ୍&zwnj;ଆଇଟି, ବିଚାର ବିଭାଗୀୟ ତଦନ୍ତ କୌଣସି ଗୋଟିଏ ଉପରେ ବି କୁନ୍ଦୁଲି ପୀଡିତାଙ୍କ ପରିବାରର ଭରସା ନାହିଁ। ଗଣଦୁଷ୍କର୍ମ ଅଭିଯୋଗ ଘଟଣାର ସିବିଆଇ ତଦନ୍ତ ଦାବି କରି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ପୀଡିତାଙ୍କ ଭାଇ। ପୋଲିସ ଠିକ୍&zwnj;ରେ ତଦନ୍ତ ନକରିବା, ଡିଜି ପୀଡିତାଙ୍କୁ ଟଙ୍କା ଯାଚିବା ଓ ଫୋରେନ୍ସିକ୍ ଲ୍ୟାବ୍ ରିପୋର୍ଟ ଦ୍ୱନ୍ଦ୍ୱ ପ୍ରସଙ୍ଗକୁ ଆବେଦନରେ ଦର୍ଶାଇ, ରାଜ୍ୟ ସରକାରଙ୍କ ତଦନ୍ତରୁ ନ୍ୟାୟ ମିଳିବାରେ ଆଶଙ୍କା ପ୍ରକାଶ କରିଛି ପୀଡିତାଙ୍କ ପରିବାର। ଘଟଣାର ନୀରପେକ୍ଷ ତଦନ୍ତ ଲାଗି ସିବିଆଇକୁ ଦାୟିତ୍ୱ ଦେବା ପାଇଁ ପିଟିସନରେ ପୀଡ଼ିତାଙ୍କ ଭାଇ ନିବେଦନ କରିଛନ୍ତି।</p> <p>ସେହିପରି ଏହି ଘଟଣାର ସିବିଆଇ ତଦନ୍ତ ଦାବି କରି ରାଜ୍ୟପାଳ ଏସ୍&zwnj;ସି ଜମିରଙ୍କୁ ଚିଠି ଲେଖିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପି ନେତା ଗିରିଧର ଗମାଙ୍ଗ। ରାଜ୍ୟ ସରକାରଙ୍କ ପକ୍ଷରୁ ଯେଉଁ ତଦନ୍ତ ଚାଲିଛି ସେଥିରେ ପୀଡିତାଙ୍କ ପରିବାର ଓ ସାଧାରଣ ଲୋକ ସନ୍ତୁଷ୍ଟ ନୁହଁନ୍ତି, ତେଣୁ&nbsp; ଘଟଣାର ତଦନ୍ତ ଦାୟିତ୍ୱ ସିବିଆଇକୁ ଦେବା ଲାଗି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ପାଇଁ ସେ ଚିଠିରେ ଅନୁରୋଧ କରିଛନ୍ତି।</p>